လါအီးကထိဘၢၣ် ၂၃ သီ, ၂၀၂၄ နံၣ် ခ့ၣ်အဲးစ့ၣ်
ပကိကီၢ်ခီဒိၣ်-ဝီကီၢ်ဆၣ်(ၡါကဲ)သဝီဟီၣ်ကဝီၤအပူၤဖဲလါအီးကထိဘၢၣ်မဟါ(၂၂)သီအနံၤန့ၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်သ့ၣ် တဖၣ်လဲၤထီၣ်ခးဝဲဒၣ်ပယီၤသုးကီၣ်ကး(ယ့တကါ)သုးကလၢၤတၢ်သမံသမိးတြဲၤ,တၢ်မၤန့ၢ်ဃုၥ်ဝဲဒၣ်ဒီးတၢ်စုကဝဲၤသ့ၣ်တဖၣ်ဒီးပယီၤသုးသံ(၅)ဂၤအဂ့ၢ်ဝီကီၢ်ကီၢ်ဆၣ်ကမျၢၢ်တၢ်ဒီသဒၢသုးကရူၢ်ထုးထီၣ်ပၥ်ဖျါဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
ဘၣ်ထွဲဒီးတၢ်လဲၤထီၣ်ခးဝဲပယီၤသုးတၢ်သမံသမိးတြဲၤတၢ်လီၢ်အံၤန့ၣ်လီၢ်ကဝီၤပှၤဟ့ၣ်တၢ်ကစီၣ်ဖိတဂၤစံးဝဲလၢ “(ပရဲလိာ်ကျိ) တိၥ်လၢဘးခီန့ၣ်ပှၤကိး(ၡါကဲ,ညီၣ်ခါၡ့ၣ်)တၢ်လီၢ်မီၤနီၤ. မ့မ့ၢ်လၢအံၤတကပၤန့ၣ်ပှၤကိးလၢ(ပရဲလိၥ်)န့ၣ်လီၤ. အဘၢၣ်စၢၤအိၣ် ဝဲ(ပရဲလိၥ်ကျိ)တဘိလီၤ. ပှၤလဲၤခီဃီၤဝဲလၢဘးခီဝဲန့ၣ်ဒီးပှၤလဲၤခးအဝဲသ့ၣ်ဖဲထံတမၢၢ်အခိၣ်ထိးတၢ်လီၢ်လီၤ.” အဂ့ၢ်န့ၣ်စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲတၢ်လဲၤထီၣ်ခးဝဲသုးကီၣ်ကး(ယ့တကါ)တၢ်သမံသမိးတြဲၤဘျီဝဲအံၤန့ၣ်တၢ်မၤန့ၢ်ဃုၥ်ဝဲဒၣ်ဒီးတၢ်စုကဝဲၤသ့ၣ်တဖၣ်တကးဒံးဘၣ်ပယီၤသုးကီၣ်ကးသံ(၂)ဂၤ,ပယီၤသုးအပှၤ(ပျူစောထီး)သံ(၃)ဂၤခဲလၢၥ်(၅)ဂၤဒီးဘၣ်ဒိ(၂)ဂၤအသိးအပှၤတီခိၣ်ရိၤမဲသုးကလၢၤတၢ်သမံသမိးတြဲၤအခိၣ်ဃ့ၢ်ပူၤဖျဲးထီၣ်ဝဲအဂ့ၢ်တၢ်ပၥ်ဖျါပူၤအသိးပၥ်ဖျါဝဲဒၣ်န့ၣ်လီၤ.
စုကဝဲၤလၢတၢ်မၤန့ၢ်အီၤသ့ၣ်တဖၣ်ခီန့ၣ်မ့ၢ်ဝဲ(ကျိဖုၣ် – ၁ ခိၣ်, G-3 ကျိ – ၄ ခိၣ်, Uzi ကျိ – ၁ ခိၣ်ဒီးကျိချံပှၥ်သၣ်တဆံးတက့ၢ်)အ ဂ့ၢ်သ့ၣ်ညါဘၣ်အသိးပယီၤသုးကီၣ်ကး(ယ့တကါ)သုးကလၢၤတၢ်သမံသမိးတြဲၤအဝဲအံၤန့ၣ်မ့ၢ်ဝဲတၢ်သမံသမိးတြဲၤတဖျၢၣ်လၢအဃ့ၢ်အီၤဝဲပှၤကမျၢၢ်ကျိၣ်စ့ဒီးမၤအၢမၤသီ,မၤတံၥ်တၥ်ကမျၢၢ်သ့ၣ်တဖၣ်အဂ့ၢ်န့ၣ်ဒိးန့ၢ်ဘၣ်တၢ်ကစီၣ်အဃိဘၣ်တၢ်လဲၤထီၣ်မၤၡဲလဲကွံၥ်ဝဲဒၣ်အီၤအဂ့ၢ်န့ၣ်သ့ၣ်ညါဘၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါပယီၤသုးကီၣ်ကးအံၤဖဲတၢ်လဲၤခးအဝဲသ့ၣ်တၢ်သမံသမိးတြဲၤဝံၤအလီၢ်ခံပယီၤသုးသ့ၣ်တဖၣ်ဟဲနုၥ်ဟူးဂဲၤမၤအါထီၣ်ဝဲအပှၤသ့ၣ်တဖၣ်လၢ(စွ့ၤမနူ)ဒီး(ခလိၣ်)ဒူသဝီတကပၤအမဲၥ်ညါနုၥ်လီၤခွံခွးဝဲပှၤဒူဖိသဝီဖိအဟံၣ်အဃီအဂ့ၢ်န့ၣ်လီၢ်ကဝီၤပှၤဟ့ၣ်တၢ်ကစီၣ်ဖိတဂၤဃီဝဲန့ၣ်စံးအါထီၣ်ဝဲဒၣ်ဒ်အံၤစ့ၢ်ကီးန့ၣ်လီၤ.
“အခဲအံၤန့ၣ်တၢ်အိၣ်သးအိၣ်န့ၣ်ဖဲမဟါတၢ်ကဲထီၣ်အသးလၢဘးခီန့ၣ်အဃိပယီၤသုးမၤအါထီၣ်အပှၤလၢ(စွ့ၤမနူ)ဒီး(ခလိၣ်)တကပၤဒီးနုၥ်လီၤခွံခွးဝဲပှၤသဝီဖိအဟံၣ်လီၤ. ပယီၤသုးအံၤဆိကမိၣ်ဝဲလၢတၢ်ပၢၢ်ဆၢသုးသ့ၣ်တဖၣ်အိၣ်လၢဘးခီန့ၣ်တဟဲက့ၤဒံးဘၣ်အ ဃိဟးပၥ်လီၤဝဲအပှၤဒ်သိးကအိၣ်ခိးဝဲပှၤအခိၣ်ဒံးန့ၣ်မီၤနီၤ. လၢ(ခိလိၣ်)သီခါဖၠၣ်တကပၤန့ၣ်ပယီၤသုးအပှၤကအိၣ်လၢအဂၤ(၆၀) ညါလီၤ. မ့မ့ၢ်လၢ(စွ့ၤမနူ)တကပၤနါက့န့ၣ်အိၣ်လၢယဲၢ်ဆံ,ဃုဆံညါန့ၣ်လီၤ.” အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးပကိကီၢ်ခီဒိၣ်ဝီကီၢ်ဆၣ်(လဲပါ)သဝီအပူၤန့ၣ်ပူၤကွံၥ်မဟါလါစဲးပထ့ဘၢၣ်(၁၃)သီအနံၤစ့ၢ်ကီးန့ၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်သ့ၣ်တဖၣ်လဲၤတ့ၢ်လီၤစ့ၢ်ကီးဝဲဒြိမ့ၣ်ပိၢ်လၢပယီၤသုးကီၣ်ကးအပှၤ(ပျူစောထီး)ခိၣ်အဟံၣ်,ပယီၤသုးကျိဖးဒိၣ်တၢ်ပၥ်ကီၤအလီၢ်ဒီးအသုးတၢ်သမံသမိးတြဲၤအလီၢ်သ့ၣ်တဖၣ်အဂ့ၢ်န့ၣ်ဝီကီၢ်ဆၣ်ကမျၢၢ်တၢ်ဒီသဒၢသုးကရူၢ်ထုးထီၣ်ပၥ်ဖျါတ့ၢ်ဃၥ်အသိးသ့ၣ်ညါဘၣ်န့ၣ်လီၤ.
