လါနိၣ်၀့ဘၢၣ် ၄ သီ, ၂၀၂၄ နံၣ်, ခ့ၣ်အဲးစံၣ်
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ကွံၥ် ခီပူးပယီၤသုးကလၢၤဝံၤအလီၢ်ခံ ပယီၤသုးလၢအဃ့ၢ်ဖျိးတဖၣ်လၢကက့ၤပၥ်ဖှိၣ်သးဒီး ဖၣ်ပူၣ်ဒုးယၤသုးကလၢၤအဂီၢ် ဂုၥ်ကျဲးစၢးဝဲဒၣ်အဂ့ၢ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
ပယီၤသုးကီၣ်ကးအပှၤလၢတူၢ်တၢ်ဒုးတန့ၢ်ဒီးဃ့ၢ်ဖျိးကွံၥ်သ့ၣ်တဖၣ်အံၤလၢကက့ၤပၥ်ဖှိၣ်သးဒီးဖၣ်ပူၣ်ဒုးယၤသုးကလၢၤ ကရ့ၣ်နံၣ်ကိ(ကိး)ဝ့ၤနိၤသုးကလၢၤအဂီၢ်ဂုၥ်ကျဲးစၢးဝဲအဖၢမုၢ်ဒီး ပယီၤသုးသ့ၣ်တဖၣ်အံၤအသးတအိၣ်လၢကဟ့ၣ်လီၤသးဒီးယူၥ်ထီၣ်နီၣ်တယၢ်ဝါဘၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်အပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဘၣ်ဝဲဒၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ဒုၣ်ဒါအသုးလၢအအိၣ်ဖဲ ခီပူးသုးကလၢၤ လၢတၢ်လဲၤထီၣ်ဒုးအီၤ,တူၢ်ဝဲတန့ၢ်ဘၣ်ဃ့ၢ်ထီၣ်ကွံၥ်သ့ၣ်တဖၣ်န့ၣ် ဂုၥ်ကျဲးစၢးက့ၤလူၤထီၣ်က့ၤဝဲဒၣ် ဖၣ်ပူၣ်ဒုးယၤသုးကလၢၤလၢအအိၣ်ဖဲ ကရ့ၣ်နံၣ်ကိ ပကိးလၢ ဝ့ၤနိၤန့ၣ်လီၤ. လၢကက့ၤပၥ်ဖှိၣ်သးအဂီၢ်ကျဲးစၢးဝဲသပှၢ်ကတၢၢ်န့ၣ်လီၤ. သနၥ်က့ သုးလၢအံၤတပၤ ဆီလီၤသးတဲၥ်အဃိန့ၣ် လူၤထီၣ်တဲတန့ၢ်ဘၣ်. လၢအဝဲသ့ၣ်ကဟ့ၣ်လီၤသး ယူၥ်ထီၣ်နီၣ်တယၢ်ဝါအဂီၢ်န့ၣ် လ့ၤတက့ၤအသးတအိၣ်နီတဆဲးဘၣ်.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ခီဖျိသုးကီၣ်ကးအပှၤသ့ၣ်တဖၣ်အံၤကျဲးစၢးလၢကက့ၤပၥ်ဖှိၣ်သးဒီး ဒုးယၤသုးကလၢၤအဂီၢ်ဒ်အံၤအဖီခိၣ် ဖဲလါနိၣ်ဝ့ဘၢၣ်(၃)သီအနံၤ တဘျီ တၢ်ဒုးကဲထီၣ်ဝဲဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးသုးပၥ်ဖှိၣ်အဃိ ပယီၤသုးသံ(၁၆)ဂၤ,အကျါပၣ်ဃုၥ်သုးရ့ၣ်ခိၣ်(၂)တဂၤဒီး ဘၣ်တၢ်ဖီၣ်မူဒံးန့ၢ်(၁၇)ဂၤအကျါၢပၣ်ဃုၥ်သုးရ့ၣ်ခိၣ်(၂)တဂၤအဂ့ၢ်သုးဒိၣ်ဂီၢ်ဂ့ၢ်စီၤကျၢၤဒိၣ်စံးဝဲဒၣ်စ့ၢ်ကီးန့ၣ်လီၤ.
သုးကီၣ်ကးအပှၤလၢဘၣ်တၢ်ဖီၣ်မူဒံးန့ၢ်အီၤ(၁၇)ဂၤအကျါန့ၣ်ပၣ်ဃုၥ်ဒီး ပှၤဘၣ်ဒိဘၣ်ထံးနးနးကျံၥ်ကျံၥ်အဃိဘၣ်တၢ်ကူဆါယါဘျါအဝဲသ့ၣ်အဂ့ၢ် သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်တဲအါထီၣ်ဝဲဒ်အံၤစ့ၢ်ကီးန့ၣ်လီၤ.
အဝဲစံးဝဲလၢ“လၢပှၤဖီၣ်မူဒံးန့ၢ်အကျါန့ၣ် ပှၤဘၣ်ဒိဘၣ်ထံးနးနးကျံၥ်ကျံၥ်န့ၣ်အိၣ်တနီၤအဃိ, ကူဆါယါဘျါ,ဒုးအီၣ်ဒုးအီဒီးတူၢ်လိၥ်က့ၤဝဲန့ၣ်လီၤ. မ့မ့ၢ်လၢတဘၣ်ဒိဘၣ်ထံးဘၣ်သ့ၣ်တဖၣ် န့ၣ် တူၢ်လိၥ်က့ၤဝဲ,ဒုးအီၣ်ဒုးအီဒီးကဟုကယၤက့ၤဝဲဒၣ်န့ၣ်လီၤ.”အဂ့ၢ် စံးဝဲဒၣ်န့ၣ်လီၤ.
ခီပူးပယီၤသုးလၢကက့ၤပၥ်ဖှိၣ်သးဒီး ဖၣ်ပူၣ်ဒုးယၤသုးကလၢၤတဖၣ်အံၤတၢ်တယးကွၢ်အနီၣ်ဂံၢ်ကအိၣ်အဂၤ(၅၀)ဘျဲၣ်ဃၣ်ဃၣ်ဒီးလၢအလီၤပြံလီၤပြါန့ၣ်အိၣ်ဒံးအဃိတၢ်လူၤမၤရှဲဝဲဟီၣ်ကဝီၤအဖၢမုၢ်လီၤအဂ့ၢ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.
ဒ်န့ၣ်အသိးခီပူးပယီၤသုးကလၢၤအံၤန့ၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲသုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲဖဲအပူၤကွံၥ်လါအီးကထိဘၢၣ်(၂၉)သီအနံၤဒီး ပယီၤသုးသံအဂၤ(၁၀)ဘျဲၣ်အကျါပၣ်ဃုၥ် သုးရ့ၣ်ခိၣ်တဂၤဒီးသုးရ့ၣ်ခိၣ်(၂)တဂၤအဂ့ၢ်ကီၢ်ရ့ၣ်ပှၤဘၣ်မူဘၣ်ဒါစံးဝဲဒၣ်န့ၣ်လီၤ.
ခီပူးသုးကလၢၤဒီး ဖၣ်ပူၣ်ဒုးယၤသုးကလၢၤအံၤအိၣ်ဝဲဒၣ်လၢ ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ် ဘုသိၣ်ကီၢ်ဆၣ်အပူၤဒီး ဖၣ်ပူၣ်ဒုးယၤသုးကလၢၤအံၤအိၣ်ဝဲလၢဖၣ်ပူၣ်ဝ့ၢ်မုၢ်နုၥ် စီၤစုၥ်ဒီးဖၣ်ပူၣ်ဝ့ၢ် (၄)တၢၣ်ဃၣ်ဃၣ်အဂ့ၢ်သ့ၣ်ညါဘၣ်န့ၣ်လီၤ.