လါယူၤလံ ၂၇သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးကညီဘၣ်ကီဘၣ်ခဲဒဲကဝီၤအပူၤ ပှၤဘၣ်ကီဘၣ်ခဲဖိပိၥ်ခွါဒီပုၢ်ဝဲၢ်(၃)ဂၤဘၣ်တၢ် ဖီၣ်အီၤလၢ ကၠီၣ်တဲၣ်ပှၤဘၣ်မူဘၣ်ဒါတဖၣ်ဝံၤအလီၢ်ခံ, တၢ်ဆဲးကျိးဆဲးကျၢ ဒီးဟံၣ်ဖိဃီဖိလီၤမၢ်ကွံၥ်ဝဲ အဂ့ၢ်, အဟံၣ် ဖိဃီဖိတဖၣ် စံးဝဲဒၣ်န့ၣ်လီၤ.
မဲၢ်လးကညီဘၣ်ကီဘၣ်ခဲ ဒဲကဝီၤ ကဝီၤဒိၣ်(C1BB) ဟံၣ်နီၢ်ဂံၢ်(၂၇၁) စီၤစိစိ သးနံၣ်(၃၀)နံၣ်, စီၤတၢ်ဂ့ၤဒိၣ် သးနံၣ် (၂၆)နံၣ်, စီၤတၢ်ဝါဒိၣ်(ကိး)တၢ်ဝါဆံးသးနံၣ်(၁၈)နံၣ်သ့ၣ်တဖၣ်အံၤ အပူၤကွံၥ်လါယူၤလံ(၁၃)သီအနံၤန့ၣ် ဘၣ်တၢ် ဖီၣ်ဝဲဒၣ်လၢ ကီၢ်ကၠီၣ်တဲၣ် ပှၤဘၣ်မူဘၣ်ဒါတဖၣ်ဖဲမဲၢ်လးဟီၣ်ကဝီၤ ထံလီၤသံးတၢ်အိးခိးတြဲၤအဂ့ၢ်, သ့ၣ်ညါဘၣ်ဒ် အဟံၣ်ဖိဃီဖိတဖၣ်စံးဝဲအသိးန့ၣ်လီၤ.
ဒီးတၢ်ဖီၣ်ဝဲအဝဲသ့ၣ်တဖၣ်ဝံၤ အလီၢ်ခံ တၢ်ဆှၢအဝဲသ့ၣ်ဆူပှၤဘၣ်မူဘၣ်ဒါအစုပူၤတဆီတဆီ အတၢ်ဆဲးကျိး ဆဲးကျၢ လီၤမၢ်ကွံၥ်ဝဲဒၣ်အဖီခိၣ်, အဟံၣ်ဖိဃီဖိတဖၣ်သူၣ်ကိၢ်သးဂီၤဝဲဒၣ် အဂ့ၢ်, အမိၢ်ပၥ်ဖျါထီၣ်ဝဲ ဒ်အံၤန့ၣ်လီၤ.
“ပှၤဖီၣ်အဝဲသ့ၣ်ဖဲထံလီၤသံးတြဲၤဝံၤ, ပှၤတဲပၠးပှၤလၢပှၤဆှၢလီၤလီၤက့ၤအဝဲသ့ၣ် ဖဲမဲၢ်လးဂီၤခီတၢ်ဆါတၢ်ပှ့ၤအလီၢ်ဒီး အနံၤဝဲန့ၣ်ပှၤဆှၢန့ၢ်ကဒါက့ၤပှၤအထၢၣ်ဒီးတၢ်ဖိတၢ်လံၤလၢဟါခီန့ၣ်လီၤ.
ဖဲန့ၣ်အလီၢ်ခံ, ပသ့ၣ်ညါဘၣ်လၢပှၤဆှၢလီၤ အသုလၢမဲၢ်တီၢ်ပှၤဘၣ်မူဘၣ်ဒါစုပူၤဝံၤ ပှၤဆှၢထီၣ်ကဒီးအသုလၢ မဲၢ်ဆီးတၢ်ဒုးဃၥ်အလီၢ်(၅)သီအလီၢ်ခံ, ပှၤဆှၢလီၤ ကဒါ လၢမဲၢ်တီၢ် ပှၤတဲလၢပကဘၣ်လဲၤထုးထီၣ်က့ၤအဃိ ယကတီၤပၥ်သးလၢ ကလဲၤထုးထီၣ်န့ၣ်လီၤ. အိၣ်ခိးအိၣ်ခိး ဘၣ်ဆၣ် ပဆဲးကျိးက့ၤတန့ၢ် လၢၤဘၣ်, ပှၤတဲလၢ ပှၤဆှၢဖျိး ကွံၥ်လၢ ထံဝၢ်တပၤလံ အဃိ ပအိၣ်ဒီး တၢ်သူၣ်ကိၢ်သးဂီၤန့ၣ်လီၤ ”အဂ့ၢ်စံးဝဲဒၣ်န့ၣ်လီၤ.
မဲၢ်လးဘၣ်ကီဘၣ်ခဲဒဲကဝီၤ ပှၤဒီပုၢ်ဝဲၢ်ပိၥ်ခွါ(၃)ဂၤအံၤ, ဖဲတၢ်ဖီၣ်အဝဲသ့ၣ် အဆၢကတီၢ် ဘၣ်ဖဲအဝဲသ့ၣ်ကလဲၤမၤတၢ်လၢ မဲၢ်ရမး တၢ်သူၣ်ဘုခ့လီၢ်တတီၤအဂ့ၢ် အဟံၣ်ဖိဃီဖိ တဖၣ် ပၥ်ဖျါဝဲဒၣ်န့ၣ်လီၤ.
ဒီးအဝဲသ့ၣ်တဖၣ်အံၤ ခီဖျိ ကျိၣ်စ့တအိၣ်လၢ ကကွဲးလံၥ်အုၣ်ကီၤသးလၢ ကဟးထီၣ်ဆူတၢ်ချၢ လၢ အဖိးသဲစး ဒီး ဖဲတၢ်သမံသမိးအဆံၣ်အခါ ဖျါထီၣ်လၢ အသူကသံၣ်မူၤဘှီး အဃိ, ကၠီၣ်တဲၣ်ပှၤဘၣ်မူဘၣ်ဒါတဖၣ် ဖီၣ်ဝဲဒၣ် အဝဲသ့ၣ်တဖၣ် အဂ့ၢ်, သ့ၣ်ညါဘၣ်န့ၣ်လီၤ.
တကတီၢ်ဃီ, ခီဖျိတၢ်ကစီၣ်ဟူထီၣ်သါလီၤလၢ တၢ်ကဲထီၣ်သးဒီးပှၤဒဲကဝီၤဖိဒ်အံၤအဃိ လၢကဃုသ့ၣ်ညါ မၤလီၤ တံၢ်လီၤဆဲးက့ၤဝဲတၢ်ဂ့ၢ်တၢ်ကျိၤအဂီၢ် တကီၢ်ခါခဲအံၤ ဒဲကဝီၤပှၤဘၣ်မူဘၣ်ဒါတဖၣ် ဟူးဂဲၤဝဲဒၣ်လံအဂ့ၢ် သ့ၣ်ညါ ဘၣ် န့ၣ် လီၤ.
ဒ်န့ၣ်အသိး, ဒ်သိးတၢ်ကလူၤပိၥ်မၤထွဲဝဲ ကၠီၣ်တဲၣ်ပဒိၣ် အတၢ်နဲၣ်လီၤလၢအဘၣ်ဃးဒီး တၢ်ဟ့ၣ်တၢ်ပျဲ လၢတၢ်ဟးဖံးဟးမၤလၢအဖိးသဲစး ဆူတၢ်ချၢ အဂီၢ်, ပှၤဘၣ်မူဘၣ်ဒါတဖၣ်ရၤလီၤ ဒီးဘိးဘၣ် ပၥ်ဖျါထီၣ် ကဒီးဝဲဒၣ် စ့ၢ်ကီးန့ၣ်လီၤ.
