လါနိၣ်၀့ဘၢၣ် ၂၆ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ် ၀ံရီကရူၢ်အပူၤ အပူၤကွံၥ်ခီဖျိတၢ်ဒုးကဲထီၣ် ဒီးယီၤသုးခးလီၤကျိဖးဒိၣ်အါအါဂီၢ်ဂီၢ်အဃိ ကီးကၠးသၢကၠိလၢတၢ်ပံးဃၥ်အီၤန့ၢ်(၂)နံၣ်ဃၣ်ဃၣ်အံၤ တုၤလၢခဲအံၤ တၢ်က့ၤအိးထီၣ်ကၠိတဘူၣ်ဘၣ်မၤလိက့ၤတၢ်လၢ သီခါဖၠၣ်ဖီလၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးဟံန့ၢ်တၢ်စိတၢ်ကမီၤ၀ံၤဖဲ(၂၀၂၂)လါမ့ၤအခါန့ၣ် လၢကီးကၠးသၢသ၀ီအပူၤ တၢ်ဒုးကဲထီၣ်ဒီးပယီၤသုးနုၥ်လီၤဒွဲၣ်အူအီၣ်ကွံၥ်၀ဲ ပှၤကမျၢၢ်အဟံၣ်အဃီ,ခးလီၤကျိဖးဒိၣ်အါအါဂီၢ်ဂီၢ်အဃိ ပှၤသ၀ီဖိဘၣ်ဃ့ၢ်ထီၣ်၀ဲခဲလၢၥ်ဒီးတုၤလၢခဲအံၤပှၤကၠိဖိထီၣ် ကၠိတဘူၣ်လၢၤ ဘၣ်မၤလိက့ၤတၢ်လၢသီခါဖၠၣ်ဖီလၥ်အဂ့ၢ်န့ၣ် သ၀ီဖိတဂၤ စံး၀ဲန့ၣ်လီၤ.
အ၀ဲစံး၀ဲလၢ“ကၠိတထီၣ်လၢၤဘၣ်န့ၣ်စးထီၣ်လၢ(၂၀၁၉)ခိ၀ံၣ်တၢ်ဆါကဲထီၣ်သးလံၤလံၤန့ၣ်.လၢကက့ၤမၤလိတၢ်အဂီၢ်ဒီး ဖဲ(၂၀၂၂)အံၤဘျီတၢ်ဒုးကဲထီၣ်မီၤနီၤ.လၢအပူၤကွံၥ်န့ၣ်အ၀ဲသ့ၣ်ဖီၣ်လိၥ်သးစုန့ၢ်ခံခီခံကပၤဒံးအခါဒုပှၤမၤလိတၢ်ဘူၣ်၀ဲ.ဘၣ်ဆၣ်ခဲအံၤခီဒုအိးထီၣ်ကၠိတဘူၣ်လၢၤဘၣ်ဘၣ်သိၣ်လိခူသူၣ်လၢသီခါဖၠၣ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တချုးလၢတၢ်သဘံၣ်သဘုၣ်ကဲထီၣ်ဒံးဘၣ်အခါန့ၣ်ကီးကၠးသၢကၠိအံၤမ့ၢ်၀ဲတီၤထီကၠိဒီးဒူသ၀ီလၢအိၣ်ဘူးဖဲန့ၣ်တဖၣ် ဟဲထီၣ်ဖှိၣ်ကၠိဖဲန့ၣ်လီၤအဃိပှၤကၠိဖိနီၣ်ဂံၢ်ကအိၣ်လၢအကထိညါဘၣ်ဆၣ် ဖဲလီၢ်က၀ီၤပူၤတၢ်ဒုးကဲထီၣ်၀ံၤလီၢ်ခံခဲအံၤန့ၣ် ပှၤကၠိဖိနီၣ်ဂံၢ်အိၣ်က့ၤဒၣ်ထဲ (၂၀၀)ဘျဲၣ်လီၤအဂ့ၢ်န့ၣ် သ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤ.
လၢန့ၣ်အမဲၥ်ညါကီးကၠးသၢကၠိအံၤမ့ၢ်၀ဲဒၣ်တီၤထီကၠိတဖျၢၣ်ဒီးစးထီၣ်ဖဲတၢ်ဒုးကဲထီၣ်ပယီၤသုးခးလီၤကျိဖးဒိၣ် ပှၤဘၣ်စံၣ်ဘၣ် ဃ့ၢ်၀ံၤလီၢ်ခံန့ၣ်ပှၤကၠိဖိက့ၤမၤလိက့ၤတၢ်လၢသီခါဖၠၣ်ဖီလၥ်တၢ်ဆၢကတီၢ်ကန့ၢ်ဒံးဒၣ်ထဲတနံၣ်ဘျဲၣ်ဒံးလီၤဒီးဒ်န့ၣ်အသိး ကၠိအံၤ မ့ၢ်တီၤထီကၠိဘၣ်ဆၣ်ခဲအံၤတၢ်မၤလိအတီၤအိၣ်တုၤက့ၤဒၣ်ထဲ(၆)တီၤလီၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤ.
ကီးကၠးသၢသ၀ီအံၤခီဖျိအိၣ်ဘူး၀ဲဒီးပယီၤသုးကလၢၤတကးဒံးဘၣ်တၢ်ဒုးကက့ၤကဲထီၣ်ကဒါဆံးယံၤလဲၣ်တၢ်တသ့ၣ်ညါ၀ဲဘၣ် အဃိတုၤလၢခဲအံၤတၢ်မၤလိန့ၢ်ဖိသၣ်လံၥ်လၢကၠိကရၢၢ်ပူၤတဘူၣ်ဒံးဘၣ်အမဲၥ်ညါဘၣ်ပျံၤလၢကျိဖးဒိၣ်ကလီၤတဲၥ်ကဒီး အဂ့ၢ်န့ၣ် ၀ံရီပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
“တၢ်ဘၣ်ယိၣ်ဒုအိၣ်,တၢ်မ့သီၣ်မ့သဲခီန့ၣ်ပှၤပျၢ်က့ၤပှၤဖိသၣ်လၢဟံၣ်မီၤနီၤ.မ့၀ံၤတၢ်မ့သီၣ်မ့သဲန့ၣ်ပှၤမၤဃၥ်န့ၢ်ပှၤကၠိဖိအဂီၢ် တၢ်ပူၤအိၣ်.ပအဲၣ်ဒိးက့ၤဒုးအိၣ်ပှၤဖိသၣ်လၢပကၠိလီၢ်လံၤမီၤနီၤဘၣ်ဆၣ်တၢ်အိၣ်သးတဂ့ၤဘၣ်အဃိပက့ၤဒုးအိၣ်ဖိသၣ်တသ့ဘၣ် တၢ်ဘၣ်ယိၣ်အိၣ်ဒံးမီၤနီၤ.မ့၀ံၤကၠိခီန့ၣ်တၢ်ပျီဒိၣ်တလၢအဃိဘၣ်ပျံၤလၢကျိဖးဒိၣ်ကလီၤတဲၥ်.”အဂ့ၢ်န့ၣ် စံး၀ဲန့ၣ်လီၤ
ပှၤကၠိဖိသ့ၣ်တဖၣ်အံၤဒ်သိးအ၀ဲသ့ၣ်ကမၤလိမၤဒိးဘၣ်တၢ်ဂ့ၤဂ့ၤအဂီၢ်မိၢ်ပၢ်တဖၣ်လၢကလဲၤဒုးထီၣ်အ၀ဲသ့ၣ်အဒံၣ်အဖိကၠိလၢ ပှၤဒူပှၤသ၀ီလၢအဂၤအဂီၢ်စ့ၢ်ကီးတၢ်ကီတၢ်ခဲအိၣ်လၢကျဲတၢ်လ့ၢ်ထီၣ်လ့ၢ်လိၤတၢ်ဘံၣ်တၢ်ဘၢတကပၤဒီး ဒ်န့ၣ်အသိး ခီဖျိဟီၣ်က၀ီၤပူၤတၢ်အိၣ်သးတဂ့ၤဒံးဘၣ်အဃိသ၀ီဖိလၢအဃ့ၢ်ထီၣ်တဖၣ်တုၤလၢခဲအံၤတက့ၤဘၣ်ဒံးလၢအဟံၣ်အဃီစ့ၢ်ကီး အိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
ကီးကၠးသၢသ၀ီအံၤအပူၤကွံၥ် တၢ်ဒုးကဲထီၣ်ဒီးပယီၤသုးခးလီၤကျိဖးဒိၣ် တကးဒံးဘၣ် ပယီၤသုးကျိၤနုၥ်လီၤအါအါဂီၢ်ဂီၢ် လၢသ၀ီပူၤဒွဲၣ်အူအီၣ်ပှၤကမျၢၢ်အဟံၣ်အဃီခဲလၢၥ်အဖျၢၣ်(၇၀)ဘျဲၣ်အမဲၥ်ညါ ကျိဖးဒိၣ်အံၤအဃိ ကၠိတၢ်သူၣ်ထီၣ်စ့ၢ်ကီး ဟးဂီၤပၣ်ဃုၥ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
