လါဒံၣ်စဲဘၢၣ် ၁၀ သီ, ၂၀၂၄ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢချၢၣ်လွံၢ်ထူၣ်ကီၢ်ရ့ၣ်,သုးက့(၃)ဟီၣ်ကဝီၤအပူၤမ့ၢ်လၢပယီၤသုးအသုးကျိၤဟဲထီၣ်ဝဲ အဃိလၢဒူသဝီ(၄)ဖျၢၣ်အပူၤကမျၢၢ်ပှၤလီၢ်ကဝီၤဖိအဂၤ(၂)ကထိဘျဲၣ်ဘၣ်ဃ့ၢ်ပူၤဖျဲးအသးလၢတၢ်လီၢ်အဂၤအဂ့ၢ်ခ့ၣ်အဲၣ်ယူၣ်-လီၢ်ခၢၣ်သးထုးထီၣ်ပၥ်ဖျါဝဲဖဲမဟါအနံၤလါဒံၣ်စဲဘၢၣ်(၉)သီအနံၤန့ၣ်လီၤ.
စးထီၣ်ဖဲအပူၤကွံၥ်လါဒံၣ်စဲဘၢၣ်(၇)သီအနံၤန့ၣ်ပယီၤသုးကီၣ်ကးအသုးကျိၤလၢဟဲထီၣ်နုၥ်လီၤဝဲလၢကမျၢၢ်ဒူသဝီပူၤသ့ၣ်တဖၣ်တၢ်ခးလိၥ်အသးကဲထီၣ်ဝဲဒၣ်ဒီးကညီဒီကလုၥ်တၢ်ထူးဖျဲးသုးမုၢ်ဒိၣ်သုးရ့ၣ်(၇)အစုဒုၣ်တီၤဖီလၥ်တၢ်သ့ၣ်တဖၣ်ဖဲ(ယ့ဖၠူၣ်ကၢ)သဝီပူၤအဂ့ၢ်န့ၣ်သ့ၣ်ညါဘၣ်န့ၣ်လီၤ.
ပယီၤသုးကျိၤလၢအဟဲထီၣ်သ့ၣ်တဖၣ်တကီၢ်ခါခဲအံၤန့ၣ်ဟူးဂဲၤအိၣ်ထီၣ်လီၤဒံးဝဲဖဲ(ဆ့ၤနကီၣ်,စနွ့တီၤ)တၢ်လီၢ်သ့ၣ်တဖၣ်ပူၤအသိးတနီၤအိၣ်ဒံးဝဲဖဲ(တိၤသ့ၣ်ဖူ, ဘီကထၣ်)တကပၤအိၣ်ဝဲဒၣ်န့ၣ်လီၤ. ဒ်န့ၣ်အသိးလီၢ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်တၢ်ပၢၢ် ဆၢသုးပၥ်ဖှိၣ်သ့ၣ်တဖၣ်မ့ၢ်လဲၤထီၣ်ခးဝဲပယီၤသုးအံၤန့ၣ်အဝဲသ့ၣ်က့ၤဂုၥ်လီၤက့ၤအသးဖဲ(သၢၤဆ့ၣ်)သုးကလၢၤအပူၤအိၣ်ဝဲအဂ့ၢ်န့ၣ်ဆီထံးကီၢ်ဆၣ်အပှၤဘၣ်မူဘၣ်ဒါစံးဝဲဒ်အံၤန့ၣ်လီၤ.
“အခဲအံၤန့ၣ်ပယီၤသုးဟူးဂဲၤအိၣ်ဒံးဝဲမးမးလီၤ. အဝဲသ့ၣ်အိၣ်ဝဲဖဲ(ဆ့ၤနကီၣ်)(စနွ့တီၤ)တကပၤန့ၣ်ထီၣ်ထီၣ်လီၤလီၤအိၣ်ဝဲလီၤ. ဒီးဒ်န့ၣ်အသိးအဝဲသ့ၣ်အိၣ်ဝ့ၢ်အိၣ်ဝီၤဒံးဝဲဖဲ(သၢၤဆ့ၣ်, တိၤသ့ၣ်ဖူ, ဒီး ဘီကထူၣ်)အိၣ်ဝဲလီၤ. ဒီးတၢ်မ့ၢ်လဲၤခးအဝဲသ့ၣ်န့ၣ်အဝဲသ့ၣ် က့ၤဂုၥ်လီၤအသးတစဲးဖဲ(သါဆ့ၣ်)သုးကလၢၤအပူၤလီၤ. ” အဂ့ၢ်န့ၣ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါမ့ၢ်လၢပယီၤသုးကီၣ်ကးအသုးကျိၤဟဲထီၣ်ဝဲဒီးနုၥ်လီၤဝဲလၢကမျၢၢ်ဒူသဝီပူၤအဃိဒူသဝီလၢအိၣ်ဘူးတၢ်ခိၣ်တၢ်ဃၢၤဖဲန့ၣ်သ့ၣ်တဖၣ်ဒူသဝီဒ်အမ့ၢ်(ခၠိအ့သဝီ, ဂွ့ကိသဝီ, ကီၢ်မဲသူသဝီ ဒီး ယ့ဖၠူၣ်ကၢသဝီ) သ့ၣ်တဖၣ် ကမျၢၢ်ပှၤနီၣ်ဂံၢ်ခဲလၢၥ်(၂,၅၆၀)ဂၤ သ့ၣ်တဖၣ်ဘၣ်ဃ့ၢ်အိၣ်ကဒုအသးလၢတၢ်ပူၤဖျဲးလီၢ်အဂ့ၢ်န့ၣ်ခ့ၣ်အဲၣ်ယူၣ်တၢ်ပၥ်ဖျါအပူၤပၥ်ဖျါဝဲဒၣ်န့ၣ်လီၤ.
တကးဒံးဘၣ်ပယီၤသုးကီၣ်ကးအံၤအသုးကျိၤဟဲထီၣ်နုၥ်လီၤဝဲလၢကမျၢၢ်ဒူသဝီအပူၤဒီးတၢ်ခးလိၥ်သးကဲထီၣ်ဝဲဒၣ်ဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်အဘၢၣ်စၢၤအသိးတကဒံးဘၣ်ပယီၤသုးကီၣ်ကးအံၤခးလီၤဝဲကျိဖးဒိၣ်ဒီးသူဝဲဒြိဟဲတ့ၢ်လီၤဝဲဒၣ်မ့ၣ်ပိၢ်လၢကမျၢၢ်ဒူသဝီအပူၤအဃိဘၣ်ဒိဘၣ်ထံးဝဲ(အိၣ်အီ)သဝီပှၤသဝီဖိ(စီၤန့ၢ်တၢ်လိၣ်)သးနံၣ်(၃၇)တဂၤအဂ့ၢ်န့ၣ်သ့ၣ်ညါဘၣ်စ့ၢ်ကီးန့ၣ်လီၤ.
ဒ်န့ၣ်အသိးစးထီၣ်လၢသုးကီၣ်ကးဟံးန့ၢ်ဆူၣ်ကွံၥ်ဝဲထံကီၢ်တၢ်စိတၢ်ကမီၤဝံၤအလီၢ်ခံကညီကီၢ်စဲၣ်ဟီၣ်ကဝီၤအပူၤပှၤလီၢ်အိၣ်ကမှံဖိအနီၣ်ဂံၣ်အိၣ်တုၤလၢ(၁)ကကွဲၢ်ဘျဲၣ်လံအသိးလၢအကျါချၢၣ်လွံၢ်ထူၣ်ကီၢ်ရ့ၣ်န့ၣ်ပှၤလီၢ်အိၣ်ကမှံဖိအနီၣ်ဂံၢ်အိၣ်ဝဲ(၄၃၀,၁၆၁)ဂၤဒီးမ့ၢ်ဝဲကီၢ်ရ့ၣ်တဘ့ၣ်လၢပှၤလီၢ်အိၣ်ကမှံဖိအနီၣ်ဂံၢ်အိၣ်ဝဲအါကတၢၢ်အဂ့ၢ်န့ၣ်ကညီတၢ်ဆီၣ်ထွဲတၢ်မုၥ်တၢ်ခုၣ်ပှၥ်ဘျးစဲထုးထီၣ်ပၥ်ဖျါဝဲဖဲလါနိၣ်ဝ့ဘၢၣ်(၂၈)သီအနံၤန့ၣ်လီၤ.
