လါယနူၤအါရံၤ ၂၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် တကွံပူၤကရူၢ်အပူၤ ဖဲမဟါဟါခီအဆၢကတီၢ် ပယီၤသုးခးလီၤကျိဖးဒိၣ်(၄)ဖျၢၣ်အဃိ တကွံပူၤသ၀ီဖိသံ(၁)ဂၤဒီး ဘၣ်ဒိ(၃)ဂၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ် န့ၣ်လီၤ.
ဖဲမဟါလါယနူၤအါရံၤ ၂၁ သီ ဟါခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကးအသုးတြိၤ(၄၄)စုတီၤဖီလၥ် (၆၀၂)သုးရ့ၣ် ခးလီၤ၀ဲ(၁၂၀ မမ)ကျိဖးဒိၣ်(၄)ဖျၢၣ်လီၤတဲၥ်ပိၢ်ဖးထီၣ်၀ဲလၢတကွံပူၤသ၀ီပူၤအဃိ နီၢ်အ့ခၠိၤ(၅၄)နံၣ်အံၤ ကျိဖးဒိၣ်အက့ဘၣ်၀ဲ အဟၢဖၢသံ၀ဲဒီး ဘၣ်ဒိ(၃)ဂၤအမဲၥ်ညါ ဟံၣ်တၢ်သူၣ်ထီၣ်လီၤပှီၢ်ဟးဂီၤ၀ဲဒီးသိလ့ၣ်အယွၤတဲၢ်ဖး၀ဲတခိၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးတၢ်ဂ့ၢ်အံၤန့ၣ်ကမျၢၢ်တဂၤစံး၀ဲလၢ“ဟံၣ်တဖျၢၣ်ဃီအပူၤန့ၣ် အမိတဂၤန့ၣ်အသံ,မ့မ့ၢ်လၢအဖိ န့ၣ်ဘၣ်အခီၣ်. မ့မ့ၢ် ဟံၣ်လၢအဂၤတဖျၢၣ်ခီန့ၣ်ဘၣ်၀ဲဒၣ်တၢ်မုၢ်ပှၢ်တဂၤန့ၣ်အစု.ဖးနးညါယဆိမိၣ်ကဘၣ်ဒီၣ်ကွံၥ်၀ဲလီၤ.ဟံၣ်ခံဖျၢၣ်အံၤအိၣ်ကျဲတခီတ၀ၢ်၀ၢ်လီၤ.ကါခီန့ၣ်အမဲၥ်ထံကလၤတဲၢ်ဖး,မ့မ့ၢ်ကါန့ၣ်တဟးဂီၤဘၣ်.မ့မ့ၢ်လၢအစုဘၣ်ဒီၣ်ကွံၥ်တဂၤန့ၣ်ဒုပှၤဆှၢအီၤဆူကၠဲးထိၣ်တၢ်ဆါဟံၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါ န့ၣ်လီၤ.
လၢန့ၣ်အမဲၥ်ညါတၢ်လီၢ်လၢပယီၤသုးခးလီၤကျိဖးဒိၣ်ခဲအံၤန့ၣ်တၢ်ဒုးကဲထီၣ်တအိၣ်၀ဲဘၣ်အသိး ခီဖျိကျိဖးဒိၣ်အဃိ တကွံပူၤသ၀ီဃုၥ်ဒီးကမျၢၢ်လၢအိၣ်ဘူးဖဲန့ၣ်တဖၣ်ဘၣ်လဲၤထီၣ်က့ၤလီၤ,ဘၣ်အိၣ်လၢတၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီအပူၤအဂ့ၢ်န့ၣ် သ၀ီဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤ.
တကတီၢ်ဃီ ကၠဲးထိၣ်ကီၢ်ဆၣ်ပူၤ ဖဲတလါအံၤအတီၢ်ပူၤစ့ၢ်ကီး ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် ဖီၣ်န့ၣ်၀ဲသုးကီၣ်ကးအပှၤအိၣ်၀ဲအသိး စှၤသီအတီၢ်ပူၤအံၤပယီၤသုးသူအါထီၣ်၀ဲဒြိမ့ၣ်ပိၢ်ဟးတ့ၢ်လီၤ၀ဲလၢ ပှၤကမျၢၢ်အိၣ်ဆိး လီၢ်ကျဲအဂ့ၢ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အ၀ဲစံး၀ဲလၢ“ကၠဲးထိၣ်ခီန့ၣ်ဘူးဒီး၀့ၢ်ကျဲမုၢ်ခိၣ်မီၤနီၤ.တၢ်တလါညါအံၤပပှၤဖီၣ်သမူန့ၢ်ပယီၤသုးခိၣ်ဃုၥ်ဒီးသုးဖိတဘျုးဂၤညါစ့ၢ်. မ့၀ံၤတၢ်လီၢ်လၢအဂၤသ့ၣ်တဖၣ်စ့ၢ်ကီးတၢ်ဒုးဆူၣ်ထီၣ်အဃိန့ၣ်အ၀ဲသ့ၣ်ဟူးဂဲၤအါထီၣ်၀ဲဒီးဒြိကွံၥ်လီၤတၢ်ဟဲအါထီၣ်.အ၀ဲသ့ၣ်န့ၣ်အဲၣ်ဒိးမၤဟးဂီၤကမျၢၢ်လီၤ.ခဲအံၤအကွံၥ်တၢ်န့ၣ်တကွံၥ်လၢပပှၤအအိၣ်ဘၣ်,ကွံၥ်၀ဲလၢပှၤကမျၢၢ်အအိၣ်လဲလဲလီၤ.အ၀ဲသ့ၣ်နါက့တဲဃၥ်၀ဲအိၣ်စ့ၢ်.တဲ၀ဲလၢတၢ်မ့ကဲထီၣ်လၢအဂၤန့ၣ်သါကကွံၥ်လီၤလၢသ၀ီပူၤလီၤ.မ့၀ံၤပှၤမ့လဲၤခးသါလၢကျဲမုၢ်ခိၣ်န့ၣ်တဲ၀ဲလၢသုးက့ဒီတဘ့ၣ်ပူၤန့ၣ်သါကမၤလၢလီၤဘျဲးလီၤ.”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးတကွံပူၤသ၀ီလၢပယီၤသုးခးလီၤကျိဖးဒိၣ်ကဲထီၣ်ခဲအံၤန့ၣ် ဖဲအပူၤကွံၥ်လါယနူၤအါရံၤ ၁၀ သီအနံၤစ့ၢ်ကီး ခီဖျိသုးကီၣ်ကး(၃၁၀) အမျိၥ်သုးခးလီၤကျိဖးဒိၣ်အဃိ ဟံၣ်အူအီၣ်ဟးဂီၤ(၂)ဖျၢၣ်အမဲၥ်ညါမ့ၣ်အူအီၣ်ဃုၥ်၀ဲစ့အကလီၢ်(၆၀)ဘျဲၣ် ကဲထီၣ်တ့ၢ်အသးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီဖဲမဟါလါယနူၤအါရံၤ ၂၁ သီ ဟါခီ ၃ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး လၢဖၣ်အၣ်ကီၢ်ဆၣ်အပူၤ ပယီၤသုး (Jet fighter) ကဘီယူၤလဲၤတ့ၢ်လီၤ၀ဲ (၅၀၀)ပီၣ်မ့ၣ်ပိၢ် ၂ ဖျၢၣ် လီၤတဲၥ်ပိၢ်ဖးထီၣ်၀ဲလၢကျူကၠံဒီးဖှၣ်ဂီၤသ၀ီဘၢၣ်စၢၤ ရီဘၢၣ်ကျီးပူၤအဃိ ရီဘၢၣ်ထူၣ်ဟးဂီၤအိၣ်၀ဲအါမးန့ၣ်လီၤ.
