လါယနူၤအါရံၤ ၂၃သီ, ၂၀၂၅နံၣ်, ခ့ၣ်အဲးစံၣ်
လၢကဃုက့ၤပှၤလဲၤမၤတၢ်လၢ(ကၠါဖၠၣ်)(၁၂)ဂၤအဂီၢ် ကၠီၣ်တဲၣ်ပှၤဘၣ်မူဘၣ်ဒါတဖၣ်မၤဝဲတၢ်ထံၣ်လိၥ်သးဒီး (DKBA-ဒ့ၣ်မိၣ်ကရ့ၣ်စံၣ်တၢ်ဘျုးကညီသုးမုၢ်ဒိၣ်)ဒ်သိးကဃုစၢၤအဝဲသ့ၣ်အဂ့ၢ်သ့ၣ်ညါဘၣ်လၢ(DKBA)ပှၤဘၣ်မူဘၣ်ဒါအအိၣ်န့ၣ်လီၤ.
ပှၤလၢအမၤတၢ်မၤလၢ(ကၠါဖၠၣ်)(၁၂)ဂၤန့ၣ်အိၣ်ဝဲဖဲကၠီးခဲးဟီၣ်ကဝီၤဒီးကၠီၣ်တဲၣ်တကပၤဟဲဟ့ၣ်ဝဲထဲအမံၤဒီးအဝဲသ့ၣ်နီၢ်ကစၢ်တၢ်ဂ့ၢ်တၢ်ကျိၤတလၢပှဲၤဘၣ်အဃိမၢက့ၤမၤလီၤတံၢ်က့ၤဝဲပှၤသ့ၣ်တဖၣ်န့ၣ်အနီၢ်ကစၢ်တဂ့ၢ်တၢ်ကျိၤအဂ့ၢ် DKBA-သုးရိၣ်မဲခိၣ်ကျၢၢ်ခံ သုးခိၣ်ကျၢၢ်စိ စီၤစွ့ၣ်ဝၣ်စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ကၠီၣ်တဲၣ်ပှၤဘၣ်မူဘၣ်ဒါဟဲလၢယအိၣ်ဖဲမၢကၢၥ်တဂၤ, အဝဲမၢပျၢ်လီၤပှၤ(၁၂)ဂၤဒီးယတဲအီၤလၢသုဟဲဟ့ၣ်ပှၤထဲအမံၤ,အဝဲသ့ၣ်အိၣ်အဒၢးဖိအမံၤဒီးသုတသ့ၣ်ညါ.အဃိန့ၣ်ယဟ့ၣ်ကူၣ်အဝဲသ့ၣ်လၢကဟ့ၣ်လီၤယၤ အတၢ်ဂီၤ,အဝ့ၢ်မံၤ,အမၤတၢ်ခီပနံၣ်မံၤ,အမိၢ်ပၢ်မံၤဒီးအဝဲသ့ၣ်အိၣ်ဒၢးဖိ သ့ၣ်တဖၣ်န့ၣ်အနီၣ်ဂံၢ်သ့ၣ်တဖၣ်န့ၣ်လီၤ.ဟဲဟ့ၣ်ပှၤထဲအမံၤဒ်အံၤအဃိမ့ၢ်အိၣ်ဖဲလဲၣ်တတီၤပတသ့ၣ်ညါဘၣ်.ဟ့ၣ်ပှၤတၢ်ဂ့ၢ်တၢ်ကျိၤတဖၣ်န့ၣ်မ့ၢ်န့ၢ် န့ၣ် ပကထံၣ်လိၥ်သးဝံၤပကမၤန့ၢ်အဝဲသ့ၣ် န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ ပှၤ(၁၂)ဂၤအကျါန့ၣ် မ့ၢ်ပှၤထံဖိကီၢ်ဖိဖဲလဲၣ်ဒီးမုၣ်ပှဲၤဂၤခွါပှဲၤဂၤလဲၣ်န့ၣ်ကီၢ်ကၠီၣ်တဲၣ်တကပၤကက့ၤမၤလီၤတံၢ်က့ၤဝဲဒီးကမၤက့ၤဝဲတၢ်ထံၣ်လိၥ်သးလၢအသီတဘျီကဒီးလၢတၢ်ကဃုစၢၤပှၤ(၁၂)ဂၤအဂီၢ်အဂ့ၢ် သုးခိၣ်ကျၢၢ်စိစီၤစွ့ၣ်ဝၣ်တဲအါထီၣ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ရၤမတံဝ့ၢ်ဟီၣ်ကဝီၤတၢ်ကဲထီၣ်သးလၢတၢ်ဆါအီၣ် တရူးခွါဂဲၤဒိ ဝၤရှ့ ဝံၤအလီၢ်ခံတၢ်ကစီၣ်ဟူထီၣ်သါလီၤဝဲသကုၤစးဒးဒီး တကီၢ်ခါခဲအံၤစ့ၢ်ကီးပှၤတရူးဖိလၢအလီၤမၢ်န့ၣ်အိၣ်ဒံးဝဲအဃိအဝဲသ့ၣ်အဟံၣ်ဖိဃီဖိ မၤကိၢ်မၤဂီၤဝဲတရူးပဒိၣ်ဒီးကၠီၣ်တဲၣ်ပၢၤကီၢ်သ့ၣ်တဖၣ်အိၣ်ဝဲဒၣ်အဖၢမုၢ်န့ၣ်လီၤ.
ဒ်န့ၣ်အသိး ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဒီတကျိၤ စးထီၣ်လၢ ထၣ်စီၤယါ,မဲၢ်ရမဲၣ်,မဲၢ်ဆီး,ဖိးဖြၣ်,ကျဲလၢတၢ်သူအီၤလၢ(ကၠါဖၠၣ်)တၢ်ဖံးတၢ်မၤအဂီၢ်သ့ၣ်တဖၣ်န့ၣ် ကၠီၣ်တဲၣ်တကပၤလူၤပံးကွံၥ်ဝဲဒီးပျံၤထးဆှူၣ်ဒီးသိးဝါက့အိၣ်ဝဲအဂ့ၢ် လီၢ်ကဝီၤတၢ်ကစီၣ်တနီၤပၥ်ဖျါဝဲဒၣ်အသိး ကီၢ်ကၠီၣ်တဲၣ် အ့ထၢၣ်နဲၣ်စ့ၢ်ကီးတၢ်ကပံးကွံၥ်ဒၣ်အဂ့ၢ် သ့ၣ်ညါဘၣ်ဒ်လီၢ်ကဝီၤတၢ်ကစီၣ်တနီၤပၥ်ဖျါဝဲဒၣ်အသိးန့ၣ်လီၤ.
