လါယနူၤအါရံၤ ၂၃သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်,ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်အပူၤတဖိးမံသဲးစးကျဲတၢ်နုၥ်လီၤဟးထီၣ်သ့ၣ်တဖၣ်အံၤ,စးထီၣ်ဖဲအပူၤကွံၥ်လါယနူၤအါရံၤ(၁၉)သီအနံၤအပူၤကၠီၣ်တဲၣ်ပှၤဘၣ်မူဘၣ်ဒါတဖၣ်ကးတံၥ်ကွံၥ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ဃးဒီးကၠီၣ်တဲၣ်ပှၤဘၣ်မူဘၣ်ဒါတကပၤစးထီၣ်ကးတံၥ်ကွံၥ်ဝဲဃိၣ်သၢဖျၢၣ်ဝ့ၢ်တဖိးသဲးစးကျဲတၢ်ဟးထီၣ်က့ၤလီၤတဖၣ်အံၤန့ၣ်,ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)တီနီၢ်မုၢ်နုၥ်သုးဟီၣ်ကဝီၤနီၢ်ဂံၢ်(၂)အဒုးယၤခိၣ်သုးခိၣ်ဒိၣ်စိစီၤအ့ၣ်ဝါစံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တချူးကးတံၥ်ဝဲအခါန့ၣ်အဝဲသ့ၣ်ဟဲကတိၤတၢၣ်ပီၣ်သကိးတၢ်ဒီးပှၤလီၤ.ဒ်တၢ်နဲၣ်လီၤအဝဲသ့ၣ်လၢထးအသိးန့ၣ်,အဝဲသ့ၣ်ရှဲပၠးပှၤတဲဝဲလၢကျဲသ့ၣ်တဖၣ်န့ၣ်တဖိးမံသဲးစးပှၤကညီဟးထီၣ်က့ၤလီၤအါဒီးတၢ်ဖိတၢ်လံၤတဖၣ်နုၥ်လီၤဟးထီၣ်လၢကျဲဟုၣ်တကပၤအါအဖီခိၣ်,တၢ်တဘၣ်လီၢ်ဘၣ်စးဘၣ်အဃိန့ၣ်ကပံးဝဲတစိၢ်တလီၢ်ဖိလီၤ.ဒီးတဲပၥ်ဝဲမ့လိၣ်ဘၣ်တခီအိးထီၣ်န့ၣ်လီၤမီၤ.ယဆိကမိၣ်န့ၣ်ပယီၤကဟ့ၣ်အဝဲသ့ၣ်တၢ်ဆီၣ်သနံးလၢတၢ်ဖီခိၣ်မီၤ.ဘၣ်မနုၤအဃိလဲၣ်န့ၣ်,ဃိၣ်သၢဖျၢၣ်တခီမ့ၢ်ဒၣ်တဖိးမံသဲးစးကျဲဒီးတမ့ၢ်ခံခီခံကပၤတၢ်သးလီၤပလိၥ်အိၣ်ထီၣ်ဝဲဘၣ်အဖီခိၣ်န့ၣ်,လီၤဂၥ်လၢကၠီၣ်တဲၣ်တကပၤဟ့ၣ်တၢ်ပျဲလၢကနုၥ်လီၤဟးထီၣ်အဃိန့ၣ်,ခဲအံၤမၤဝဲဒ်ပံးဃၥ်ဝဲတစိၢ်တလီၢ်အသိး”လီၤအဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါ,တၢ်ကးတံၥ်ဝဲတဖိးမံသဲစးကျဲတဖၣ်ဒီးထးပျံၤတဖၣ်အိၣ်ဝဲဘၣ်ဆၣ်,ဃိၣ်သၢဖျၢၣ်၀့ၢ်အံၤခီဖျိမ့ၢ်ဝဲကီၢ်ဆၢတၢ်လီၢ်တတီၤအဃိခံခီခံကပၤတၢ်နၢ်ပၢၢ်အဖီခိၣ်,ကမျၢၢ်လီၢ်ကဝီၤဖိတဖၣ်အတၢ်ဟးထီၣ်က့ၤလီၤ,တၢ်ဖံးအီၣ်မၤအီၣ်ဒီး,တၢ်ဝံစိၥ်တီဆှၢပနံၥ်တၢ်ကၤတဖၣ်ကဘၣ်လီၢ်ဘၣ်စးအဂီၢ်,သူဝဲတဖိးမံသဲစးကျဲတဖၣ်လၢခံခီယၢ်ပၤတၢ်နၢ်ပၢၢ်ပူၤအဃိ,တကီၢ်ခါခဲအံၤတၢ်ကီတၢ်ခဲတအိၣ်ဝဲနီတမံၤဘၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
ဃိၣ်သၢဖျၢၣ်ဝ့ၢ်ကီၢ်ဆၢတၢ်ဟးထီၣ်က့ၤလီၤကျဲသ့ၣ်တဖၣ်အံၤ,ခီဖျိတမ့ၢ်ဝဲကျဲလၢထံကီၢ်ခံဘ့ၣ်ဘၢၣ်စၢၤအတၢ်သးလီၤပလိၥ်တၢ်အိးထီၣ်ဝဲလၢအဖိးသဲးစးဘၣ်အဃိ,ဒ်အလီၢ်အိၣ်ဝဲအသိးအပူၤကွံၥ်ကၠီၣ်တဲၣ်ပှၤဘၣ်မူဘၣ်ဒါတကပၤကးတံၥ်ဝဲတၢ်ဝံစိၥ်ခီဆှၢပနံၥ်ဒီးတၢ်ဟးထီၣ်က့ၤလီၤခဲအံၤခဲအံၤအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
တကတီၢ်ဃီ,ဃိၣ်သၢဖျၢၣ်ဝ့ၢ်အံၤ,သုးကီၣ်ကးတၢ်ပၢတၢ်ြပးဟးဂီၤကွံၥ်အလီၢ်ခံကတီၢ်ဘၢၣ်စၢၤပၢြပးအဂီၢ်ဝ့ၢ်တၢ်ပၢတၢ်ပြးတကပၤခ့ၣ်အဲၣ်ယူၣ်ဟံဝဲမူဒါဒီး,ဝ့ၢ်တၢ်ဘံၣ်တၢ်ဘၢတကပၤဒံၣ်မိၣ်ကရံၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA) တီနီၢ်မုၢ်နုၥ်သုးဟီၣ်ကဝီၤနီၢ်ဂံၢ်(၂)အဒုးယၤခိၣ်သုးခိၣ်ဒိၣ်စိစီၤအ့ၣ်ဝါတီခိၣ်ရိၢ်မဲဟံဝဲမူဒါန့ၣ်လီၤ.
ဒ်န့ၣ်အသိး,ဃိၣ်သၢဖျၢၣ်ဝ့ၢ်အပူၤအံၤကီၢ်ကၠီၣ်တဲၣ်ကီၢ်ပယီၤကီၢ်ဆၢတဖိးမံသဲးစးကျဲတၢ်နုၥ်လီၤဟးထီၣ်တဖၣ်အိၣ်ဝဲအါတီၤဒီးတကီၢ်ခါခဲအံၤဝ့ၢ်ဟီၣ်ကဝီၤအပူၤတၢ်အိၣ်ခိးတြဲၤတဖၣ်သနါက့အါဒၣ်တၢ်မ့ၢ်ဝဲ(DKBA)တၢ်အိၣ်တြဲၤအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲဒၣ်အသိးန့ၣ်လီၤ.
