လါယနူၤအါရံၤ ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤတဖၣ်အပူၤ လၢလါဒံၣ်စ့ဘၢၣ်တလါအတီၢ်ပူၤန့ၣ် တၢ်ဒုးကဲထီၣ်၀ဲခဲလၢၥ်(၂၇)ဘျီ ဒီး ပယီၤသုးတကပၤသံ၀ဲ(၃၀)ဂၤ,ဘၣ်ဒိ(၂၈)ဂၤ အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ် စရီအပူၤန့ၣ်လီၤ.
ဒူသထူၣ်ကီၢ်ရ့ၣ်ပူၤ စးထီၣ်ဖဲလါဒံၣ်စ့ဘၢၣ် ၁ သီ တုၤ ၃၁ သီ လၢတလါအတီၢ်ပူၤန့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ် ဒိၣ်(KNLA) သုးရ့ၣ်(၁),သုးရ့ၣ်(၂),သုးရ့ၣ်(၃)သုးပၥ်ဖှိၣ်ဒီး ပယီၤသုးအဘၢၣ်စၢၤ တၢ်ဒုးစဲးပြဲးကဲထီၣ် (၆)ဘျီ, တၢ်လဲၤတ့ၢ်လီၤ ပယီၤသုးဒီးဒြိမ့ၣ်ပိၢ်(၁၅)ဘျီ, တၢ်ခိးထုးမ့ၣ်ပိၢ်(၁)ဘျီ, တၢ်ဘၣ်သဂၢၢ်ခးလိၥ်သးကဲထီၣ်(၁)ဘျီ, တၢ်လဲၤကွံၥ်ပယီၤသုး ဒီးမ့ၣ်ပိၢ်(၄) ဘျီအဃိ ပယီၤသုးတကပၤသံဘၣ်ဒိဘၣ်ထံးအါကဲထီၣ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢခံခီခံကပၤတၢ်ဒုးကဲထီၣ်အတီၢ်ပူၤန့ၣ် မ့မ့ၢ်လၢဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၃)သုးပၥ်ဖှိၣ် တကပၤန့ၣ် ဘၣ်ဒိ၀ဲဒၣ်(၁)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါတလါအတီၢ်ပူၤ ပယီၤသုးခးလီၤကျိဖးဒိၣ်(၁၄)ဘျီ, ကဘီယူၤဟဲခးလီၤတၢ်(၃)ဘျီဆူဒူသ၀ီလီၢ်က၀ီၤ ကမျၢၢ်အိၣ်ဆိးလီၢ်ကျဲတၢ်ဖံးအီၣ်မၤအီၣ်လီၢ်ပၥ်ဖှိၣ်ခဲလၢၥ်အိၣ်တစှၤန့ၢ်(၅၂)ဖျၢၣ်ဘၣ်အဃိ ကမျၢၢ်သံ(၃)ဂၤ ဒီး ဘၣ်ဒိ၀ဲ(၅)ဂၤ အမဲၥ်ညါဟံၣ်တၢ်သူၣ်ထီၣ်ဟးဂီၤ(၃)ဖျၢၣ်,ကျီးပူၤတၢ်ထူၣ်တၢ်ဘိစ့ၢ်ကီးဟးဂီၤ၀ဲဒၣ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဒူသထူၣ်ကီၢ်ရ့ၣ်ပူၤ အပူၤကွံၥ်လါနိၣ်၀့ဘၢၣ်တလါအတီၢ်ပူၤစ့ၢ်ကီး ခံခီခံကပၤတၢ်ဒုးကဲထီၣ်၀ဲ(၇)ဘျီ, ပယီၤသုးတကပၤသံ(၁၁)ဂၤ, ဘၣ်ဒိ(၁၀)ဂၤဒီး ခီဖျိပယီၤသုးခးလီၤကျိဖးဒိၣ်အဃိကမျၢၢ်သံ(၁)ဂၤ, ဘၣ်ဒိ(၅)ဂၤ ကဲထီၣ်သးဒံးအဂ့ၢ်န့ၣ် သ့ၣ်ညါဘၣ်လၢတလါတဘျီကီၢ်ရ့ၣ်တၢ်မၤနီၣ်အပူၤန့ၣ်လီၤ.
