ကီးတရံးတၢ်ဒုးအတီၢ်ပူၤ သ၀ီ ၂၄ ဖျၢၣ် ၦၤကမျၢၢ်ဃ့ၢ်ထီၣ်တကလးဘျဲၣ်

လါဒံၣ်စ့ဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၣ်စဲၣ် ကီးတရံးကီၢ်ဆၣ်အပူၤ စးထီၣ်လါဒံၣ်စ့ဘၢၣ် ၁ သီတုၤလၢလါဒံၣ်စ့ဘၢၣ် ၄ သီအနံၤ တၢ်ဒုးကဲထီၣ်လၢ ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤအတီၢ်ပူၤန့ၣ် သ၀ီကရူၢ်(၄)ကရူၢ် သ၀ီပာ်ဖျိၣ်ခဲလၢာ် (၂၄)ဖျၢၣ် ၦၤကမျၢၢ်(၁၁၇၀၀)ဃၣ်ဃၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ် အတၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤႉ

ၦၤနီၣ်ဂံၢ်စရီလၢတၢ်မၤန့ၢ်အီၤခဲအံၤသ့ၣ်တဖၣ်မ့ၢ်ဒၣ်ထဲ၀့ၢ်ခိၣ်၀့ၢ်ဃၢၤဒူသ၀ီၦၤနီၣ်ဂံၢ်စရီသ့ၣ်တဖၣ်ဒံးလီၤဒီး မ့မ့ၢ်လၢကီးတရံး၀့ၢ်ပူၤဒီးဒူသ၀ီလၢအဂၤ(၅)ဖျၢၣ်ၦၤဃ့ၢ်ထီၣ်အနီၣ်ဂံၢ်စရီခီန့ၣ်တဒိးန့ၢ်ဘၣ်၀ဲဒံးဘၣ်ဒီး ၦၤဃ့ၢ်ထီၣ်အနီၣ်ဂံၢ် အါန့ၢ်အ၀ဲအံၤသ့၀ဲအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲမဟါပဟးမၤနီၣ်ၦၤဃ့ၢ်ထီၣ်အနီၣ်ဂံၢ်စရီန့ၣ်လၢအီးဖးဖးဒိၣ်ႇကီးနွဲၣ်ႇမီမးႇယွၤတါစှ့ၤကရူၢ် သ၀ီဖးဒိၣ်ႇ သ၀ီဖိတကပၤန့ၣ် ၦၤဃ့ၢ်ထီၣ်အနီၣ်ဂံၢ်စရီအိၣ်ခဲလၢာ်(၁၁၇၀၀)ဘျဲၣ်ညါႉမ့မ့ၢ်သ၀ီလၢအဂၤ(၅)ဖျၢၣ်န့ၣ် ပတန့ၢ်အနီၣ်ဂံၢ် စရီဒံးဘၣ်ႉလၢကီးတရံး၀့ၢ်ပူၤနါက့ပတန့ၢ်ဘၣ်စရီဒံးဘၣ်ႉၦၤအိၣ်လၢက၀ီၤဒ့ပူၤတဖၣ်နါက့လၢအသုးလီၢ်သုးကျဲညါန့ၣ် သုးလီၢ်လဲးကူၢ်လံႉၦၤလၢအတစံၣ်ဘၣ်ညါန့ၣ်အ၀ဲသ့ၣ်သ့ၣ်ခူၣ်လီၤဃာ်တၢ်ပူၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢန့ၣ်အမဲာ်ညါၦၤကမျၢၢ်လၢအအိၣ်တ့ၢ်သ့ၣ်တဖၣ်တနီၤန့ၣ်အိၣ်ခိးအဟံၣ်အဃီဒီးမ့မ့ၢ်အ၀ဲသ့ၣ်ဟံၣ်ဖိဃီဖိခီန့ၣ် မၢအတၢ်ဟးပလဲာ်သးန့ၣ်လီၤႉတကီၢ်ခါခဲအံၤတၢ်ဒုးဆဲးကဲထီၣ်ဒံး၀ဲဒီးတၢ်ပၢၢ်ဆၢသုးပာ်ဖှိၣ်သိၣ်မှံၤကရူၢ်တဖၣ် နုာ်လီၤဟံးန့ၢ်အလီၢ်အကျဲလၢ၀့ၢ်ပူၤလံအသိးပယီၤသုးတကပၤစ့ၢ်ကီးအိၣ်၀ဲဒၣ်လၢ၀့ၢ်ပူၤခီၣ်သုးရ့ၣ်(ခလရ–၉၇) သုးကလၢၤကရၢၢ်ပူၤဒီးပၢၤကီၢ်၀ဲၤလီၢ်တကပၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

တကီၢ်ခါခဲအံၤလၢကီးတရံး၀့ၢ်ပူၤဟံၣ်ဖိဃီဖိလၢအအိၣ်ဒီးၦၤသူၣ်က့သးၦၢ်ႇၦၤဖိဒံဖိသၣ်ႇၦၤပိာ်မုၣ်ပိာ်မၢၤဒီး ၦၤမိၢ်ဒၢသ့ၣ် တဖၣ်န့ၣ်လၢအ၀ဲသ့ၣ်ကသုးလီၢ်သုးကျဲအဂီၢ်ၦၤလၢအမၤစၢၤၦၤဃ့ၢ်မှံဟးဖျိးလၢအိၣ်ဖၣ်အၣ်ႇကြုၢ်တုဒီးမၠၣ်၀တံၣ် သ့ၣ်တဖၣ်အံၤတီဆှၢ၀ဲၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ

ဒ်န့ၣ်အသိးၦၤကမျၢၢ်လၢအဃ့ၢ်ထီၣ်သ့ၣ်တဖၣ်အံၤဖဲအ၀ဲသ့ၣ်လဲၤစံၣ်အိၣ်လၢဖၣ်အၣ်၀့ၢ်ပူၤအဆၢကတီၢ် ပယီၤသုးလၢအိၣ် တတါကၠိတၢ်သမံသမိးတြဲၤႇခွံတၢၣ်တၢ်သမံသမိးတြဲၤ ဒီး တန့ခၠါ ဒီၤလါ သုးခိးကီၢ်ဆၢ(BGF) တၢ်သမံသမိးတြဲၤလီၢ်သ့ၣ် တဖၣ်အံၤဖဲအ၀ဲသ့ၣ်သမံသမိးတၢ်အခါမ့ထံၣ်ၦၤလီတဲစိပူၤလၢၦၤတီၣ်ထီၣ်ဃာ်တၢ်ဒုးကဲထီၣ်အဂ့ၢ်အကျိၤတဖၣ်န့ၣ် ဖီၣ်၀ဲတီၢ်၀ဲဃ့အီၣ်၀ဲစ့အိၣ်အဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲန့ၣ်လီၤႉ

အ၀ဲစံး၀ဲလၢ“ယဆိမိၣ်ယကလဲၤလီၤစံၣ်လၢကြုၢ်တူတကပၤမီၤနီၤႉလၢတတါကၠိ သ၀ီတိၤကပၤန့ၣ်ပယီၤသုး သမံသမိးတၢ်ႉအသမံသမိးယလီတဲစိဘျီထံၣ်၀ဲလၢယ(ရှဲ)ဃာ်တၢ်ဒုးတၢ်ကစီၣ်အဃိအ၀ဲသ့ၣ်ထိယဟၢဖၢႇ သံကွၢ်ယၤနကဲ(PDF)ဧါႉမ့၀ံၤအသမံသမိးယတၢ်ဘိၣ်တဲ၀ဲလၢကဖီၣ်တ့ၢ်ယၤဒီးဖဲန့ၣ်ၦၤက၀ီၤဒ့ဖိကမျၢၢ်လၢအဃ့ၢ်တၢ်ဒုး တဖၣ်တဲစၢၤယၤဃ့၀ံသးစူၤစၢၤအဃိအ၀ဲသ့ၣ်ပျၢ်လီၤကွံာ်ယၤ”အဂ့ၢ်န့ၣ် စံး၀ဲန့ၣ်လီၤႉ

ဒ်န့ၣ်အသိးဖဲမဟါလါဒံၣ်စ့ဘၢၣ် ၄ သီ ဂီၤခီအဆၢကတီၢ်စ့ၢ်ကီး တၢ်ဒုးဆဲးကဲထီၣ်၀ဲလၢကီးတရံး၀့ၢ်ပူၤ၀့ၢ်ချၢ တၢ်လီၢ်(၃)တီၤဃၣ်ဃၣ်အပူၤဒီးသုးကီၣ်ကးအ(Mi35)ကဘီယူၤဟဲခးလီၤတၢ်တပယူာ်ဃီအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤ ဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ

ခီဖျိပယီၤသုးခးလီၤကျိဖးဒိၣ်လီၤတဲာ်ပိၢ်ဖးထီၣ်လၢက၀ီၤဒ့ပူၤအဃိၦၤလၢအတဃ့ၢ်ထီၣ်ဘၣ်ဆဲးအိၣ်ဒံးလၢက၀ီၤဒ့ပူၤသ့ၣ်တဖၣ်အံၤ ကတာ်ထီ၀ဲလၢတၢ်ဒုးပူၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ