လါဖ့ၤဘြူၤအါရံၤ ၁သီ, ၂၀၂၅နံၣ်, ခ့ၣ်အဲးစံၣ်,
ဖဲအပူၤကွံၥ် လါယနူၤအါရံၤ ၂၈ သီအနံၤ လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၅)မုၢ်တြီၢ်ကီၢ်ရ့ၣ်, ဒွဲၣ်လိကီၢ်ဆၣ်,ပှၢ်ဒ့ၣ်မုၣ်သဝီအပူၤ,သုးကီၣ်ကးကဘီယူၤဟဲခးလီၤဝဲတၢ်အဃိ,ကမျၢၢ်သံ(၄)ဂၤ,ဘၣ်ဒိဘၣ်ထံး(၆)ဂၤဒီးဘၣ်ဟးဂီၤဝဲဟံၣ်(၆)ဖျၢၣ်အဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ဃးဒီးသုးကီၣ်ကးကဘီယူၤအတၢ်ခးလီၤဝဲတၢ်လၢပှၢ်ဒ့မုၣ်သဝီအံၤန့ၣ်,သုးက့(၅)ပှၤကတိၤတၢ်ပၢ,သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဝဲဒၣ်ဒ်အံၤန့ၣ်လီၤ.
“ပယီၤသုးကဘီယူၤဟဲခးလီၤတၢ်ပှၢ်ဒ့ၣ်မုၣ်သဝီန့ၣ်မ့ၢ်လီၤ.ခးလီၤဝဲဖဲလါယနူၤအါရံၤ(၂၈)သီအနံၤ,ဘၣ်သံဝဲကမျၢၢ်(၄)ဂၤ,ဘၣ်ဒိဘၣ်ထံးဝဲ(၆)ဂၤအမဲၥ်ညါ,ဟံၣ်(၆)ဖျၢၣ်ဘၣ်ဟးဂီၤကွံၥ်ဝဲဒၣ်န့ၣ်လီၤ.မ့မ့ၢ်တၢ်ဘၣ်ဒိဘၣ်ထံးလၢအဂၤတခီလီၤလီၤဆီဆီတအိၣ်ဝဲဘၣ်”အဂ့ၢ်န့ၣ် အဝဲစံးဝဲန့ၣ်လီၤ.
ဒွဲၣ်လိကီၢ်ဆၣ်ဒီတဘ့ၣ်အပူၤအံၤ,သုးကီၣ်ကးအသုးကလၢၤဒီးတၢ်လီၢ်တၢ်ကျဲတဖၣ်အိၣ်ဒံးဝဲတစှၤန့ၢ်(၅)တီၤန့ၣ်လီၤ. ဖဲ အပူၤကွံၥ်(၂၀၂၄) လါဒံၣ်စဲဘၢၣ်အပူၤ (KNLA)တၢ်ပၢၢ်ဆၢသုးပၥ်ဖှိၣ်ကရူၢ်စးထီၣ်ကဝီၤ ခးဝဲသုးကီၣ်ကးအသုးကလၢၤတၢ်လီၢ်တၢ်ကျဲတဖၣ်အံၤအဃိ,ဒ်သိးအသုးကလၢၤတဖၣ်အံၤသုတလီၤကွံၥ်တဂ့ၤအဂီၢ်,သုးကီၣ်ကးအံၤသူကဘီယူၤခးလီၤဝဲတၢ်လၢအသုးကလၢၤခိၣ်ဃၢၤတၢ်လီၢ်တၢ်ကျဲတဖၣ်အပူၤအိၣ်ဝဲတလီၢ်လီၢ်ဒ်အံၤလီၤအဂ့ၢ်န့ၣ် သုးက့ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ခီဖျိသုးကီၣ်ကးတဖၣ်အံၤသူဝဲကဘီယူၤခးလီၤအဃိ,ကမျၢၢ်လီၢ်ကဝီၤဖိလၢအိၣ်ဘူးတဖၣ်ဘၣ်ဃ့ၢ်ထီၣ်အိၣ်ကဒုဝဲအသးဆူဒူးသထူၣ်ကီၢ်ရ့ၣ်/သုးက့(၁)ဟီၣ်ကဝီၤအပူၤတနီၤအိၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
တကတီၢ်ဃီ,သုးက့(၅),မုၢ်တြီၢ်ကီၢ်ရ့ၣ်ဒီတဘ့ၣ်အပူၤအံၤ,တကီၢ်ခါခဲအံၤပယီၤသုးတဖၣ်အတၢ်လီၢ်တၢ်ကျဲတဖၣ်အိၣ်ဒံးဝဲအဖျၢၣ်(၃၀)ဃၣ်ဃၣ်ဒီးပယီၤသုးတၢ်လီၢ်လၢအိၣ်တ့ၢ်ဒံးဝဲသ့ၣ်တဖၣ်အံၤခးလီၤဝဲတၢ်ဆူထံဖိကီၢ်ဖိကမျၢၢ်အသိးအကျါအိၣ်ဝဲဒၣ်အဂ့ၢ်သုးက့ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒ်န့ၣ်အသိး,ပယီၤသုးလၢအအိၣ်ဒံးဝဲသ့ၣ်တဖၣ်အံၤခးလီၤတၢ်တုၤဝဲဆူသုးက့(၅)ကမျၢၢ်အိၣ်ဆိးဖံးမၤအီၣ်အီတၢ်လီၢ်ကျဲတကးဘၣ်,ခးလီၤစ့ၢ်ကီးဝဲတၢ်တုၤလၢဒူသထူၣ်ကီၢ်ရ့ၣ်ပူၤကမျၢၣ်ထံဖိကီၢ်ဖိအိၣ်ဆိးတၢ်လီၢ်တၢ်ကျဲအံၤအိၣ်အဂ့ၢ်န့ၣ်သ့ၣ်ညါဘၣ်ဒ်သုးက့ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ.
