လါယနူၤအါရံၤ ၃၁သီ, ၂၀၂၅နံၣ်, ခ့ၣ်အဲးစံၣ်,
တၢ်ပၢၢ်ဆၢကမၤနၢၤတၢ်အဂီၢ် ကညီဖိကိးဂၤဒဲးကဟ့ၣ်လီၤသးဒီးမၤသကိးဃူဃူဖိးဖိးလၢတၢ်မ့ၢ်တၢ်တီပူၤအဂ့ၢ်န့ၣ် (KNLA)သုးရိၣ်မဲခိၣ်ကျၢၢ်,စံးလီၤ၀ဲလၢ(၇၆)ဝီတဝီ ကညီတၢ်ပၢၢ်ဆၢမုၢ်နံၤမူးတၢ်ရဲၣ်တၢ်ကျဲၤလၢတၢ်မၤ၀ဲ ဖဲခ့ၣ်အဲၣ်ယူၣ် ကညီဒီကလုၥ်စၢဖှိၣ်ကရၢ သုးက့(၇)ဟီၣ်ကဝီၤ (သုးဝဲၤလီၢ်ခိၣ်သ့ၣ်-သဝခ)တၢ်လီၢ်အံၤန့ၣ်လီၤ.
ကညီတၢ်ပၢၢ်ဆၢအတၢ်မၤအံၤယံၥ်ဝဲ(၇၆)နံၣ်လံဘၣ်ဆၣ် တတုၤဒံးဝဲဆူဖီတၢၣ်ဘၣ်ခီဖျိတၢ်ဂံၢ်စၢ်ဘါစၢ်အိၣ်ဝဲလၢ တၢ်ပၥ်ဖှိၣ်မၤသကိးတၢ်အဃိ ဒ်သိးတၢ်ပၢၢ်ဆၢအံၤကတုၤဆူတၢ်မၤနၢၤဖီတၢၣ်အဂီၢ် ကညီဖိကိးဂၤကပၥ်ဖှိၣ်မၤသကိး တၢ်လၢတၢ်ဃူတၢ်ဖိး,တၢ်ဟ့ၣ်လီၤသးအဂ့ၢ်န့ၣ် (KNLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိစီၤကၠီၣ်နံၣ် စံးလီၤ၀ဲလၢ တၢ်ရဲၣ်တၢ်ကျဲၤပူၤဒ်အံၤန့ၣ်လီၤ.
“တၢ်ပၢၢ်ဆၢမုၢ်နံၤပှဲၤထီၣ်(၇၆)ဝီတဝီလံ,ပတတုၤဆူတၢ်မၤနၢၤဖီတၢၣ်ဒံးဘၣ်န့ၣ်,မ့ၢ်ဒၣ်ခီဖျိပတၢ်ဂံၢ်စၢ်ဘါစၢ်အိၣ်လၢပတၢ်ဃူတၢ်ဖိးတအိၣ်ဘၣ်အဃိန့ၣ်လီၤ.ဒီးတၢ်အံၤမ့ၢ်ဒၣ်ပဝဲကိးဂၤဒဲးပတၢ်လီၤတိၢ်လီၤကၢ်လီၤန့ၣ်ပတဲသ့လီၤ.တၢ်လၢဃူတၢ်ဖိးန့ၣ်ပတဲအီၤညီ,တၢ်နီၢ်ကီၢ်ပမၤအီၤကီဒိၣ်မးလီၤ.ပှၤတကလုၥ်လၢတအိၣ်ဒီးတၢ်ဃူတၢ်ဖိးဘၣ်န့ၣ်တၢ်အိၣ်မူတၢ်လဲၤထီၣ်လဲၤထီအိၣ်တသ့ဘၣ်ဒီးတုၤဆူဖီတၢၣ်တချ့ဘၣ်အဃိန့ၣ်.ဒ်သိးပကတုၤဆူတၢ်မၤနၢၣ်ဖီတၢၣ်ဒီးပကစၢ်ကဒိးန့ၢ်ပၢလီၤသးအဂီၢ်န့ၣ်မူဒါအိၣ်လၢပစုပူၤလီၤ.လၢတၢ်န့ၣ်အဃိ,ပမ့စံးလီၤသးလၢပမ့ၢ်ပှၤကညီန့ၣ်,တၢ်ပၢၢ်ဆၢတၢ်မၤအပူၤပဝဲကိးဂၤဒဲးပကဟဲဟ့ၣ်လီၤသးမၤဃူဃူဖိးဖိးလၢတၢ်သးတဖျၢၣ်ဃီ,လၢတၢ်မ့ၢ်တၢ်တီအပူၤ”အဂ့ၢ်စံးဝဲဒၣ်န့ၣ်လီၤ.
လၢန့ၣ်အမဲၥ်ညါဒ်သိးကအိၣ်က့ၤလၢတၢ်စံၣ်ညီၣ်ပၢလီၤသးအဂီၢ် ကညီဖိကိးဖုကိးဂၤကဘၣ်ထီဒါဝဲသုးမီၤစိရိၤလၢမၤအၢ မၤနးပှၤကညီဖိသ့ၣ်တဖၣ်အံၤဒီး သုးမီၤစိရိၤသနူအံၤကလီၤပှီၢ်ကွံၥ်အဂီၢ် ကဘၣ်ပၥ်ဖှိၣ်မၤသကိးတၢ်ဒီး ကလုၥ်ဒူၣ်ဖိလၢ အထီဒါပယီၤသုးသ့ၣ်တဖၣ်အဂ့ၢ်န့ၣ် ဆီၣ်တခူစ့ၢ်ကီးဝဲဒၣ်န့ၣ်လီၤ.
လၢတၢ်မၤ၀ဲ(၇၆)ဝီတဝီ ကညီတၢ်ပၢၢ်ဆၢမုၢ်နံၤတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် ခ့ၣ်အဲၣ်ယူၣ်-ကညီဒီကလုၥ် စၢဖှိၣ် ကရၢ ကရၢခိၣ် ပဒိၣ်စီၤကွဲၤထူဝ့, ခ့ၣ်အဲၣ်ယူၣ် ထီဘိကမံးတံၥ် ပဒိၣ်စီၤသမ့ၤထိ, (KNLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤကၠီၣ်နံၣ်,ကညီတၢ်ကရၢကရိခိၣ်နၢ်ပှၤဘၣ်မူဘၣ်ဒါဒီးကမျၢၢ်လီၢ်ကဝီၤဖိသ့ၣ်တဖၣ်ဟဲထီၣ်၀ဲ (၂၀၀)ဘျဲၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒီးလၢတၢ်ရဲၣ်တၢ်ကျဲၤအပူၤ တၢ်ဟ့ၣ်ထီၣ်တၢ်ယူးယီၣ်ဆူကညီဒီကလုၥ်နီၢ်တယၢ်, ခိၣ်နၢ်,သိၣ်ဒူ,ထံဖိကီၢ်ဖိကမျၢၢ်လၢ အဟ့ၣ်လီၤတ့ၢ်သးလၢတၢ်ပၢၢ်ဆၢပူၤတဖၣ်ဒီး,တၢ်ဖးဖျါထီၣ်ဝဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)လံၥ်ဟ့ၣ်ယုၢ်ဒီးကညီပိၥ်မုၣ်ကရၢ(KWO)လံၥ်ဟ့ၣ်ယုၢ်တဖၣ်အမဲၥ်ညါ,တၢ်ရဲၣ်တၢ်ကျဲၤအပူၤအိၣ်ဃုၥ်စ့ၢ်ကီး၀ဲတၢ်သူၣ်ဝံၣ်သးဆၢတဖၣ်န့ၣ်လီၤ.
ဒ်န့ၣ်အသိးတနံၤအံၤလၢအလီၤဘၣ်၀ဲကညီတၢ်ပၢၢ်ဆၢမုၢ်နံၤဆၢက့ၤပှဲၤထီၣ်(၇၆)ဝီတဝီအံၤ ခ့ၣ်အဲၣ်ယူၣ်(သုးက့ ၇) အမဲၥ်ညါ (သုးက့)ဟီၣ်က၀ီၤတၢ်လီၢ်လၢအဂၤစ့ၢ်ကီးတၢ်ပၥ်ဖှိၣ်မၤလၤကပီၤ၀ဲအိၣ်ဘၣ်ဆၣ် တကီၢ်ခါခဲအံၤ ခီဖျိထံကီၢ်တၢ်အိၣ်သးတဂ့ၤ,တၢ်အိၣ်သးအကလုၥ်ကလုၥ်အဃိ ဘၣ်တၢ်ရဲၣ်ကျဲၤမၤ၀ဲထဲတဆံးတက့ၢ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
