လါဖ့ၤဘြူၤအါရံၤ ၆သီ, ၂၀၂၅နံၣ်, ခ့ၣ်အဲးစံၣ်.
ကညီကီၢ်စဲၣ်,ထံဆၢကီၢ်ဆၢဟီၣ်ကဝီၤတၢ်လဲၤထီၣ်လဲၤထီအဂီၢ်, ထံဂုၤကီၢ်ဂၤတၢ်ဘျၢလီၤကျိၣ်စ့တၢ်ဖံးတၢ်မၤတၢ်တိၤကျဲၤဖဲကီၢ်ဆၢဟီၣ်ကဝီၤ,လၢကီၢ်စၢဖှိၣ်တၢ်ဘျၢလီၤကျိၣ်စ့ ခီၣ်မ့ရှၢၣ်ဟ့ၣ်ဝဲတၢ်ပျဲဒ်အမ့ၢ် ဟံၣ်လီၢ်,ဟီးတဲးဒီးတၢ်ဟးကသုၣ်ကသီအလီၢ်သ့ၣ်တဖၣ်န့ၣ် BGF တပၣ်ဃုၥ် လၢပှၤဘျၢလီၤကျိၣ်စ့,န့ၢ်ဘၣ်တၢ်ဘျုးသ့ၣ်တဖၣ်အကျါဘၣ်ဒီးမ့မ့ၢ်တခီ BGFဒိးလဲလီၤဝဲထဲဟီၣ်ခိၣ်လီၤအဂ့ၢ် ကညီကီၢ်စဲၣ်,သုးခိးကီၢ်ဆၢ(BGF)ထုးထီၣ်ပၥ်ဖျါဝဲဖဲတနံၤအံၤလါဖ့ၤဘြူၤအါရံၤ(၆)သီအနံၤအံၤန့ၣ်လီၤ.
ဒ်(BGF)အလံၥ်ပၥ်ဖျါအသိးန့ၣ် ဟံၣ်လီၢ်တၢ်တိၤကျဲၤလၢ(BGF)ဒိးလဲလီၤဝဲဆူပှၤဘျၢလီၤကျိၣ်စ့အအိၣ်သ့ၣ်တဖၣ်န့ၣ် အဝဲသ့ၣ်ဒိးလဲက့ၤဝဲဆူတၢ်မၤကစၢ်လၢအဂၤတဆီဒီးတၢ်မၤကစၢ်သ့ၣ်တဖၣ်အကျါတနီၤန့ၣ်မၤဝဲဒၣ်တၢ်လံၣ်တၢ်လီ,တၢ်မၤကၤပှၤကူပှၤကညီအဃိသုးခိးကီၢ်ဆၢ(ကညီကီၢ်စဲၣ်)ကဖီၣ်လိၥ်စုမၤသကိးတၢ်ဒီးထံကီၢ်ပဒိၣ်,ထံဂုၤကီၢ်ဂၤတၢ်ကရၢကရိသ့ၣ်တဖၣ်လၢတၢ်ကဒုးလီၤမၢ်ကွံၥ်တၢ်သ့ၣ်တဖၣ်အံၤအဂီၢ်အဂ့ၢ် ပၥ်ဖျါဝဲဒၣ်လၢ BGF အလံၥ်ပၥ်ဖျါအပူၤန့ၣ်လီၤ.
လၢန့ၣ်အမဲၥ်ညါ BGFအံၤလ့ၤတက့ၤတတူၢ်လိၥ်ဝဲ တၢ်မၤကၤပှၤကညီ, တၢ်မၤကဘျံးကဘျၣ်,တၢ်မၤဆါမၤပယွဲ,တၢ်ဒိးမၢဖိသၣ်,တၢ်လံၣ်တၢ်လီဒီးတၢ်မူၤတၢ်ဘှီးသ့ၣ်တဖၣ်အဃိဃုထံသမံသမိးဟံးထီၣ်ဝဲဒၣ်ဂ့ၢ်ဝီအိၣ်ဝဲအဖၢမုၢ်ဒီး ပှၤလၢမၤကဘျံးကဘျၣ်တၢ်တဖၣ် ဟ့ၣ်လီၤက့ၤဝဲဆူပှၤလၢအဘၣ်ထွဲဘၣ်ဃးသ့ၣ်တဖၣ်အအိၣ် အိၣ်ဝဲအသိး တုၤဖဲ၂၀၂၃နံၣ်တီၢ်ပူၤ BGF ပၥ်ဖှိၣ်သးဒီးထံကီၢ်ပဒိၣ်,ထံဂုၤကီၢ်ဂၤတၢ်ကရၢကရိဝံၤ မၤစၢၤပှၤကညီလၢအဘၣ်တၢ်မၤကၤအီၤန့ၢ်ဝဲ(၂၀၀၀)ဘျဲၣ်အဖီခိၣ် ခါဆူညါစ့ၢ်ကီးကဖီၣ်လိၥ်စုဒီးထံကီၢ်ပဒိၣ်ဒီးထံဂုၤကီၢ်ဂၤတၢ်ကရၢကရိလၢ ကဒုးထီဒါဝဲဒၣ် တဖိးသဲစးတၢ်မၤကမၣ်ကွီၣ်မ့ၢ်သ့ၣ်တဖၣ်အံၤအဂ့ၢ် BGF အလံၥ်ပၥ်ဖျါအပူၤပၥ်ဖျါဝဲဒၣ်စ့ၢ်ကီးန့ၣ်လီၤ.
တကတီၢ်ဃီ အဝဲသ့ၣ်မ့ၢ်တၢ်ကရၢကရိတဖုလၢမၤတၢ်လၢလၢကညီကီၢ်စဲၣ်တၢ်လဲၤထီၣ်လဲၤထီဒီးထံဆၢကီၢ်ဆၢတၢ်လဲၤထီၣ်လဲၤထီအဂီၢ်အသိးလီၢ်ကဝီၤပူၤ ကျဲ,ထံ,မ့ၣ်အူ,တၢ်ကူၣ်ဘၣ်ကူၣ်သ့,တၢ်အိၣ်ဆူၣ်အိၣ်ချ့,မုၢ်ကျိၤဝဲၤကွၥ်ဒီးထံဖိကီၢ်ဖိကျၢၢ်တၢ်ဘၣ်ဘျုးအဂီၢ်န့ၣ်အဝဲသ့ၣ်ရဲၣ်ကျဲၤမၤန့ၢ်ဝဲအိၣ်ထီဘိလီၤအဂ့ၢ် BGFအလံၥ်ပၥ်ဖျါအပူၤစံးဝဲဒၣ်န့ၣ်လီၤ.
ဒ်န့ၣ်အသိးလီၤ ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ် DKBAစ့ၢ်ကီး လၢတၢ်ကဒုးထီဒါတၢ်မၤကၤပှၤကူပှၤကညီဒီးတၢ်မၤဆါမၤပယွဲအဂီၢ် ကဖီၣ်လိၥ်စုဒီးထံဂုၤကီၢ်ဂၤအိၣ်ဝဲအသိးလၢထံဖိကီၢ်ဖိတၢ်ဖံးတၢ်မၤခွဲးယၥ်အဂီၢ်တကပၤစ့ၢ်ကီးအဝဲသ့ၣ်ကမၤဖျါထီၣ်ဝဲတၢ်မၤအမိၢ်လံၤမိၢ်ပှၢ်သ့ၣ်တဖၣ်အဂ့ၢ်ထုးထီၣ်ပၥ်ဖျါဝဲဖဲ အပူၤကွံၥ်လါ ဖ့ၤဘြူၤအါရံၤ(၅)သီအနံၤအိၣ်ဝဲဒၣ်စ့ၢ်ကီးန့ၣ်လီၤ.
