လါဖ့ၤဘြူၤအါရံၤ ၆ သီ, ၂၀၂၅ နံၣ်, ခ့ၣ်အဲးစံၣ်
ကရ့ၣ်နံၣ်ဟီၣ်က၀ီၤအပူၤ အပူၤကွံၥ်(၂၀၂၄)တနံၣ်အတီၢ်ပူၤ လၢသုးကီၣ်ကးအတၢ်ဖံးတၢ်မၤအကလုၥ်ကလုၥ်အဃိ လီၢ်က၀ီၤကမျၢၢ် ထံဖိကီၢ်ဖိသံ၀ဲဒၣ်အဂၤ(၁၀၀)ဘျဲၣ်လၢတၢ်ဂ့ၢ်တအိၣ် နီမံၤအဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယၥ်ကရူၢ်(KnHRG) ထုးထီၣ်ပၥ်ဖျါ၀ဲဒၣ် ဖဲလါဖ့ၤဘြူၤအါရံၤ ၄ သီအနံၤ န့ၣ်လီၤ.
ဒ်လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် ခီဖျိလၢသုးကီၣ်ကးအသုးကျိၤနုၥ်လီၤလၢဟီၣ်က၀ီၤပူၤ,သူကဘီယူၤဟဲခးလီၤတၢ်,ခးလီၤကျိဖးဒိၣ် ဆူကမျၢၢ်အိၣ်ဆိးလီၢ်ကျဲ,ဖီၣ်မၤသံကမျၢၢ်လၢတၢ်ဂ့ၢ်တအိၣ်,လၢအ၀ဲသ့ၣ်ဟီၣ်လၥ်မ့ၣ်ပိၢ်အံၤအဃိ လီၢ်က၀ီၤကမျၢၢ်ထံဖိကီၢ်ဖိဘၣ်သံ ကဲထီၣ်၀ဲဒ်အံၤလီၤအဂ့ၢ်န့ၣ် ပှၤလၢအမၤစၢၤပှၤဃ့ၢ်မှံဟးဖျိးဒီးတၢ်ပၢၢ်ဆၢသုးကရူၢ်တဖၣ် ပဲၥ်ထံနီၤဖးစံး၀ဲန့ၣ်လီၤ.
လၢ(၂၀၂၄)နံၣ်အတီၢ်ပူၤအံၤ သုးကီၣ်ကးသူ၀ဲဒၣ်ကဘီယူၤတ့ၢ်လီၤ၀ဲမ့ၣ်ပိၢ်(၃၆)ဘျီ, ပယီၤသုးဒိးလီၤမ့ၣ်ပိၢ်,ဖီၣ်ပှၤကမျၢၢ်ကဲထီၣ်(၂၆)ဘျီ, ခးလီၤတပျုၥ်တပျီၥ်ကျိဖးဒိၣ်(၄၆)ဘျီအဂ့ၢ်န့ၣ် ကရ့ၣ်နံၣ်ဂ့ၢ်၀ီခွဲးယၥ်ကရူၢ်လံၥ်တၢ်ပၥ်ဖျါအပူၤ ပၥ်ဖျါ၀ဲ န့ၣ်လီၤ.
ခီဖျိလၢတၢ်ဂ့ၢ်သ့ၣ်တဖၣ်အံၤအဃိ ကရ့ၣ်နံၣ်ကီၢ်စဲၣ် ဟီၣ်က၀ီၤအပူၤ ကမျၢၢ်ပှၤဃ့ၢ်မှံဟးဖျိးအိၣ်၀ဲ(၂၁၀၀၀၀)ဂၤညါဒီး ပှၤသ့ၣ်တဖၣ်အံၤ အကျါအါဒၣ်တက့ၢ်န့ၣ်မ့ၢ်၀ဲပိၥ်မုၣ်ပိၥ်မၢၤ,ပှၤသူၣ်က့သးပှၢ်ဒီးဖိဒံဖိသၣ်သ့ၣ်တဖၣ်အဃိ လၢအ၀ဲသ့ၣ်အဂီၢ်လိၣ်ဘၣ်၀ဲဒၣ်တၢ်ဆီၣ်ထွဲ မၤစၢၤအဂ့ၢ်န့ၣ် ကရ့ၣ်နံၣ်ပှၤလီၢ်အိၣ်ကဒုမူဒါခိၣ်တဂၤ စံး၀ဲဒ်အံၤန့ၣ်လီၤ.
“ခဲအံၤန့ၣ်ပယီၤသုးစ့ၢ်ကီးပံးဃၥ်၀ဲတၢ်စိၥ်ထီၣ်စိၥ်လီၤကသံၣ်ကသီအဃိပဘၣ်စိၥ်ခူသူၣ်လီၤ.အဃိလၢကရ့ၣ်နံၣ်ဟီၣ်က၀ီၤ ပှၤလီၢ်အိၣ်ကဒုအလီၢ်န့ၣ်အခိၣ်သ့ၣ်န့ၣ်လိၣ်ဘၣ်ကသံၣ်ကသီလီၤ.ပှၤလီၢ်အိၣ်ကဒုတၢ်လီၢ်တတီၤန့ၣ်အါဒၣ်တက့ၢ်(၅၀)မျးကယၤန့ၣ် မ့ၢ်၀ဲပှၤသူၣ်က့သးပှၢ်ဒီးပှၤဖိဒံဖိသၣ်သ့ၣ်တဖၣ်လီၤ”အဂ့ၢ်န့ၣ် စံး၀ဲန့ၣ်လီၤ.
လၢတၢ်အိၣ်သးဒ်အံၤအဖီခိၣ် ကီၢ်ပယီၤပူၤထံဖိကီၢ်ဖိကမျၢၢ်တဖၣ်တဒိးန့ၢ်ဘၣ်၀ဲပှၤဟီၣ်ခိၣ်ဖိခွဲးယၥ်ဘၣ်အဃိ ထံဂုၤကီၢ်ဂၤတဖၣ် အလီၢ်အိၣ်လၢကတြီဆၢဟံထီၣ်ဖီၣ်ထီၣ်ဂ့ၢ်၀ီလၢအဆိအချ့ဒီး အလီၢ်အိၣ်လၢတၢ်ကဘၣ်ဒီၣ်တဲၥ်ကွံၥ် တၢ်ဆါန့ၢ်သုးကီၣ်ကးအ ကျိချံပှၥ်သၣ်ဒီးကဘီယူၤသိသ့ၣ်တဖၣ်အဂ့ၢ်န့ၣ် (KnHRG)ဆီၣ်တခူဃ့ထီၣ်၀ဲန့ၣ်လီၤ.
