လါဖ့ၤဘြူၤအါရံၤ ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်ြတီၢ်ကီၢ်ရ့ၣ်(သုးက့ ၅)ဟီၣ်က၀ီၤ ကမၤမိၢ်၀့ၢ်ပူၤ တၢ်ကစီၣ်ဟူထီၣ်လၢတၢ်ကထီၣ် သုးကလၢၤဒီး ပယီၤသုးတကပၤစ့ၢ်ကီးမၤအါထီၣ်သုးဂံၢ်ဘါအဃိ ကမျၢၢ်တဖၣ်ဃ့ၢ်ထီၣ်သုးလီၢ်သုးကျဲဟးပလဲၥ်သးအိၣ်ထီၣ်၀ဲ အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
စှၤသီအတီၢ်ပူၤအံၤလၢကမၤမိၢ်သုးကလၢၤတကပၤန့ၣ်ပယီၤသုးမၤအါထီၣ်အဂံၢ်အဘါဒီး ကတၢၢ်တံၥ်သ၀ီတကပၤစ့ၢ်ကီး တၢ်ပၢၢ်ဆၢသုးကရူၢ်ထုးဖှိၣ်သးအဖီခိၣ် ကမျၢၢ်တဖၣ်ပျံၤတၢ်ဘၣ်ယိၣ်၀ဲလၢတၢ်ဒုးကကဲထီၣ်အဃိတနီၤန့ၣ်လဲၤဃ့ၢ်ထီၣ်၀ဲဒၣ်ဆူ ဖၣ်အၣ်ကီၢ်ရ့ၣ် လူၢ်ပျဲၢ်ကီၢ်ဆၣ် မၠဲၣ်ကၠံငူၣ်(ခီၣ်တီၣ်)တကပၤအဂ့ၢ်န့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
အ၀ဲစံး၀လၢ“ကမၤမိၢ်တၢ်သးန့ၣ်လၢပှၤကထီၣ်အီၤဒုတနၢ်ဟူဘၣ်.ဘၣ်ဆၣ်ပှၤသုးလီၤသးလၢကတၢၢ်တံၥ်လံအဃိကမျၢၢ်လၢအိၣ်ကမၤမိၢ်တဖၣ်န့ၣ်ဘၣ်ယိၣ်၀ဲလၢပှၤကထီၣ်ကမၤမိၢ်သုးကလၢၤအဃိထံဖိကီၢ်ဖိကမျၢၢ်တဖၣ်ဟးထီၣ်ကွံၥ်လၢကမၤမိၢ်န့ၣ်အိၣ်၀ဲဒၣ်တနီၤ.ဒီးသုးကီၣ်ကးအသုးတဖၣ်နါက့ဟဲဆီလီၤအါထီၣ်အသး,ဟဲမၤပှဲၤထီၣ်အဂံၢ်အဘါလၢကမၤမိၢ်န့ၣ်အိၣ်၀ဲဒၣ်. ဒီးဖဲစှၤသီ အတီၢ်ပူၤအံၤဟဲဆီလီၤအါထီၣ်ကဒီး၀ဲအဃိပှၤသ၀ီဖိန့ၣ်ဘၣ်ယိၣ်၀ဲလၢတၢ်ဒုးတၢ်ယၤကကဲထီၣ်ကကီကခဲလၢအဂီၢ်အဃိဃ့ၢ်ထီၣ်ကွံၥ်၀ဲဒၣ်အိၣ်တနီၤ.ခဲအံၤအါတက့ၢ်န့ၣ်ပှၤတအိၣ်လၢၤဘၣ်.ပှၤအိၣ်လၢကမၤမိၢ်၀့ၢ်ပူၤတဖၣ်န့ၣ်အါလၢအလဲၤစံၣ်လၢ(ခီၣ်တီၣ်)တကပၤမီၤနီၤ”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးပယီၤသုးအံၤဘၣ်ယိၣ်စ့ၢ်ကီး၀ဲလၢတၢ်ပၢၢ်ဆၢသုးကရူၢ်ကလဲၤထီၣ်ခးအ၀ဲသ့ၣ်အဃိ စှၤသီအတီၢ်ပူၤအံၤ အ၀ဲသ့ၣ်က့ၤခး လီၤကဒါကျိဖးဒိၣ်ဆူဒူသ၀ီပူၤအမဲၥ်ညါကဘီယူၤစ့ၢ်ကီးဟဲခးလီၤစၢၤတၢ်အိၣ်၀ဲတလီၢ်လီၢ်အဂ့ၢ်န့ၣ် ပှၤကတိၤတၢ်ပၢ စီၤကျၢၤဒိၣ် စံးအါထီၣ်၀ဲန့ၣ်လီၤ.
“သုးကီၣ်ကးကရူၢ်အံၤခီန့ၣ်ဘၣ်ယိၣ်၀ဲလၢပှၤကလဲၤထီၣ်အတၢ်လီၢ်တၢ်ကျဲဒ်န့ၣ်အဖီခိၣ်အ၀ဲသ့ၣ်ခးလီၤကျိဖးဒိၣ်လၢဒူပူၤသ၀ီပူၤ.ဆိမိၣ်၀ဲလၢတၢ်ပၢၢ်ဆၢသုးကရူၢ်အိၣ်ဖဲန့ၣ်ဧါသၢၣ်.တကးဒံးဘၣ်ကဘီယူၤနါက့ဟဲခးလီၤတၢ်ဖဲသ၀ီအခိၣ်အဃၢၤန့ၣ်န့ၢ်တဘျုးသီလံ.အဃိသ၀ီဖိန့ၣ်ပျံၤတၢ်စံၣ်ထီၣ်အိၣ်တနီၤစ့ၢ်.မ့မ့ၢ်လၢအခးလီၤတၢ်အံၤလၢန့ၣ်ဒုစးထီၣ်ဖဲလါဖ့ၤဘြူၤအါရံၤထီၣ်ပှၤသုးလီၤသးဖဲ န့ၣ်၀ံၤဘျီန့ၣ်ပယီၤသုးခးလီၤတၢ်အိၣ်ကိးမုၢ်နံၤဃၣ်ဃၣ်လီၤ”အဂ့ၢ်န့ၣ် စံး၀ဲန့ၣ်လီၤ.
ဖဲအပူၤကွံၥ်လါယနူၤအါရံၤ ၂၃ သီအနံၤန့ၣ် ကတၢၢ်တံၥ်သုးကလၢၤလၢအိၣ်ဘူး၀ဲကမၤမိၢ်အံၤ တၢ်ပၢၢ်ဆၢသုးပၥ်ဖှိၣ်ကရူၢ် ထီၣ်မၤန့ၢ်ကွံၥ်၀ဲဒီး ဒ်န့ၣ်အသိးပယီၤသုးလၢအိၣ်သုးကလၢၤပူၤအံၤတဖၣ်ဟးထီၣ်လဲၤထုးဖှိၣ်က့ၤအသးလၢသုးခိးကီၢ်ဆၢ(BGF) နီၣ်ဂံၢ်(၁၀၁၃)သုးရ့ၣ်၀ဲၤလီၢ်၀့မ ခီၣ်ဒုးအသးအိၣ်ဆီလီၤသးဖဲန့ၣ်တုၤလၢခဲအံၤအဂ့ၢ်န့ၣ် သုးက့ပှၤဘၣ်မူဘၣ်ဒါ စံး၀ဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးစးထီၣ်ဖဲတၢ်လဲၤထီၣ်ခးကတၢၢ်တံၥ်သုးကလၢၤအံၤအခါန့ၣ်ခီဖျိပယီၤသုးခးလီၤကျိဖးဒိၣ်,ကဘီယူၤစ့ၢ်ကီးဟဲခးလီၤတၢ်အဃိ တၢ်သံတၢ်ဘၣ်ဒိဘၣ်ထံး,ဟံၣ်ဟးဂီၤ၀ဲဒၣ်အါမးအမဲၥ်ညါ စးထီၣ်ဖဲလါဒံၣ်စ့ဘၢၣ်ထီၣ်အသီ(၁၀)ဘျဲၣ်န့ၣ် ကမျၢၢ်လၢအိၣ် ဘူးဖဲတၢ်ခိၣ်တၢ်ဃၢၤ၀ဲန့ၣ်ပှၤနီၣ်ဂံၢ်(၃၀၀၀)ဃၣ်ဃၣ် လဲၤဃ့ၢ်ထီၣ်အိၣ်ကဒုသးဆူ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤပူၤ တုၤလၢခဲအံၤတက့ၤဘၣ်ဒံးလၢ အဟံၣ်အဃီထံၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
