လါဖ့ၤဘြူၤအါရံၤ ၁၅ သီ, ၂၀၂၅ နံၣ်, ခ့ၣ်အဲးစံၣ်
တၢ်မၤကၤပှၤကညီဒီး(ကၠါဖၠၣ်)တၢ်လံၣ်အီၣ်လီအီၣ်တၢ်ဖံးတၢ်မၤလၢအိၣ်ကညီကီၢ်စဲၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ စွ့ၣ်ကိၣ်ကိၤ ဟီၣ်က၀ီၤပူၤတဖၣ် ဒ်သိးတၢ်ဆှၢက့ၤအ၀ဲသ့ၣ်တၢ်ရဲၣ်တၢ်ကျဲၤကလဲၤသးချ့ချ့အဂီၢ်န့ၣ် ကဟံစုနဲၣ်ကျဲမၤစၢၤ၀ဲဒ်အလီၢ်အိၣ်၀ဲအသိး အဂ့ၢ်န့ၣ် သုးခိးကီၢ်ဆၢ(BGF) သုးခိၣ်ဒိၣ်စိစီၤခၠ့ၣ်သူၤ ဃ့ထီၣ်ကီၢ်ကၠီၣ်တဲၣ် ကိတိၥ်ခိၣ်ကျၢၢ်-၂ ဒီးတၢ်ဒီတဒၢကိတိၥ် ဖဲလါဖ့ၤဘြူၤ အါရံၤ ၁၃ သီအနံၤန့ၣ်လီၤ.
ဒ်(BGF)လံၥ်တၢ်ဃ့ထီၣ်ပူၤပၥ်ဖျါ၀ဲအသိးန့ၣ် ပှၤလၢအမၤကၤပှၤကူပှၤကညီဒီးပှၤလၢအမၤ(ကၠါဖၠၣ်)တၢ်မၤကဘျံးကဘျၣ် တၢ်ဖံးတၢ်မၤလၢ အအိၣ်ဆီလီၤသးဖဲ စွ့ၣ်ကိၣ်ကိၤ ဟီၣ်က၀ီၤပူၤလၢအတဖိးသဲစးဘၣ်သ့ၣ်တဖၣ်အံၤ (BGF)တကပၤ ဃိထံသမံ သမိး၀ဲဒၣ်အိၣ် ဒီး ပှၤသ့ၣ်တဖၣ်အံၤဘၣ်တၢ်ဆှၢထီၣ်အးလီၤက့ၤအ၀ဲသ့ၣ်ဆူ ကီၢ်ကၠီၣ်တဲၣ် မီၢ်သီဘၣ်ထွဲ၀ဲၤဒၢးတဖၣ်အအိၣ် အဂ့ၢ်န့ၣ် စံး၀ဲန့ၣ်လီၤ.
တကတီၢ်ဃီဘၣ်ဃးတၢ်ဆှၢအးလီၤကွံၥ်ပှၤသ့ၣ်တဖၣ်အံၤတၢ်ရဲၣ်တၢ်ကျဲၤအပူၤန့ၣ် ကီၢ်ပယီၤပဒိၣ်ဒီးကၠီၣ်တဲၣ်ပဒိၣ်သ့ၣ်တဖၣ် ပၥ်ဖှိၣ်မၤသကိးတၢ်၀ံၤ ဆှၢ၀ဲဆူ မၠၣ်၀တံၣ်၀့ၢ် တၢ်ရ့လိၥ်မုၥ်လိၥ်နီၣ်ဂံၢ်(၂)တိၤတဆီအဂ့ၢ်န့ၣ် လံၥ်တၢ်ဃ့ထီၣ်အပူၤပၥ်ဖျါ၀ဲန့ၣ်လီၤ.
လၢတၢ်န့ၣ်အဃိဘၣ်ဃးတၢ်မၤလီၤမၢ်ကွံၥ်(ကၠါဖၠၣ်)တၢ်လံၣ်တၢ်လီတၢ်ဖံးတၢ်မၤ,ပှၤလၢအမၤကၤပှၤကညီဒီးလံၣ်အီၣ်လီအီၣ်ပှၤကညီတဖၣ်အံၤ ကီၢ်ကၠီၣ်တဲၣ်ပဒိၣ်ဒီးကီၢ်ပယီၤပဒိၣ်ကပၥ်ဖှိၣ်ထီၣ်သးဆှၢကွံၥ်၀ဲလၢအဆိအချ့ဒီး လၢတၢ်ဆှၢက့ၤပှၤသ့ၣ်တဖၣ် အံၤ တၢ်ရဲၣ်တၢ်ကျဲၤကလဲၤသး ဘျ့ဘျ့ဆှီဆှီလၢအဆိအချ့အဂီၢ်န့ၣ် ဒ်အလီၢ်အိၣ်အသိးကၠီၣ်တဲၣ်ခိၣ်နၢ်ဒိၣ်ထီကဟံစုနဲၣ် ကျဲမၤစၢၤ၀ဲ အဂ့ၢ်န့ၣ် သုးခိးကီၢ်ဆၢ(BGF)ဃ့ထီၣ်၀ဲန့ၣ်လီၤ.
တကးဒံးဘၣ်လၢတၢ်ကမၤလီၤမၢ်ကွံၥ်(ကၠါဖၠၣ်)တၢ်ဖံးတၢ်မၤအံၤအဂီၢ် ဖဲအပူၤကွံၥ်လါဖ့ၤဘြူၤအါရံၤ ၆ သီအနံၤန့ၣ် ပှၤထံဂုၤကီၢ်ဂၤဖိလၢအိၣ်စွ့ၣ်ကိၣ်ကိၤဟီၣ်က၀ီၤ ၆၁ ဂၤလၢ အဘၣ်တၢ်မၤကၤအီၤတဖၣ် (BGF)ဆှၢအးလီၤကွံၥ်ဆူ ကၠီၣ်တဲၣ်ပှၤဘၣ်မူဘၣ်ဒါအအိၣ်လၢမၠၣ်၀တံၣ်နီၣ်ဂံၢ်(၂)တိၤအံၤတဆီဒံးအဂ့ၢ်န့ၣ် သ့ၣ်ညါဘၣ်န့ၣ်လီၤ.
မၠၣ်၀တံၣ်ဟီၣ်က၀ီၤအပူၤ တၢ်မၤကၤပှၤကညီဒီး(ကၠါဖၠး)တၢ်ဖံးတၢ်မၤလၢအိၣ်ဆီလီၤသးဖဲသုးခိးကီၢ်ဆၢ(BGF)ဒီး တၢ်ဘၣ်ဘျုး ကညီသုးမုၢ်ဒိၣ်(DKBA)အဟီၣ်က၀ီၤပူၤတဖၣ် ဖဲတၢ်ကစီၣ်ဖျါထီၣ်ရၤလီၤသးဒိၣ်ဒိၣ်မုၢ်မုၢ်၀ံၤလီၢ်ခံန့ၣ် ကီၢ်ကၠီၣ်တဲၣ်တကပၤ ဒီၣ်တဲၥ်ကွံၥ်၀ဲ တၢ်ဟ့ၣ်မ့ၣ်အူ,ရ့ၣ်နီၣ်သိ ဒီးတကးဒံးဘၣ်လၢန့ၣ်အမဲၥ်ညါခီဖျိတၢ်ဟ့ၣ်၀ဲတၢ်ဆီၣ်သနံးအဃိ ဖဲလါဖ့ၤဘြူၤအါရံၤ ၁၂ သီအနံၤန့ၣ် ပှၤထံဂုၤကီၢ်ဂၤဖိလၢအဘၣ်တၢ်ဆါအီၣ်အီၤလၢအိၣ်ကၠီးခဲးဟီၣ်က၀ီၤပူၤအံၤတဖၣ် အဆိကတၢၢ်တဘျီ(DKBA)ဆှၢ အးလီၤက့ၤ အ၀ဲသ့ၣ် ဆူကၠီၣ်တဲၣ်အစုပူၤ(၂၆၁)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးစွ့ၣ်ကိၣ်ကိၤဟီၣ်က၀ီၤအပူၤ လၢတၢ်ကမၤလီၤမၢ်ကွံၥ်(ကၠါဖၠၣ်)တၢ်ဖံးတၢ်မၤသ့ၣ်တဖၣ်အံၤအဂီၢ် ဖဲလါဖ့ၤဘြူၤအါရံၤ ၁၂ သီအနံၤန့ၣ်စ့ၢ်ကီး (BGF) ဒုးအိၣ်ထီၣ်၀ဲကရူၢ်လီၤဆီတဖုလၢကဃိထံသမံသမိးပှၤလၢတၢ်မၤကၤအီၤတဖၣ်ဒီး ပှၤလၢအမၤကမၣ်တၢ်သ့ၣ်တဖၣ် ဒံးန့ၣ်လီၤ.
