လါမးရှး ၇ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်အပူၤ ခီဖျိပယီၤသုးကဘီယူၤလဲၤခးလီၤတၢ်လၢ ကတၢၢ်တံၥ်-ကမၤမိၢ်သ၀ီဘၢၣ်စၢၤ မဲးပြ့ကရူၢ် လၢၢ်ကွဲသ၀ီသ၀ီပူၤ သီခါဖၠၣ်အဃိ သီခါသံ(၂)ပါဒီးဘၣ်ဒိ၀ဲ(၁)ပါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲလါမးရှး ၅ သီ ဟါခီ(၉)နၣ်ရံၣ်ဘျဲၣ်အဆၢကတီၢ်န့ၣ် တၢ်ဒုးကဲထီၣ်တအိၣ်ပယီၤသုးကဘီယူၤအံၤပညိၣ်ဟဲခးလီၤ၀ဲတၢ်လၢ လၢၢ်ကွဲသ၀ီ သီခါဖၠၣ်ကရၢၢ်ပူၤအဃိ သီခါ(၃)ပါလၢအိၣ်ဖၠၣ်ပူၤအံၤတဖၣ်ဘၣ်သံဘၣ်ဒိဘၣ်ထံးကဲထီၣ်၀ဲဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကဘီယူၤဟဲခးလီၤတၢ်ဘျီ၀ဲအံၤတၢ်သံတၢ်ဘၣ်ဒိဘၣ်ထံးအမဲၥ်ညါသီခါဖၠၣ်တၢ်သူၣ်ထီၣ်ဒီးကမျၢၢ်ဟံၣ်ဟးဂီၤအိၣ်အသိး တကီၢ်ခါခဲအံၤသီခါလၢအဘၣ်ဒိနးတပါန့ၣ်အိၣ်ဒံး၀ဲလၢဖၣ်အၣ်တၢ်ဆါဟံၣ်ဘၣ်ဆၣ်တုၤခဲအံၤတနီၣ်သးဒံးဘၣ်အိၣ်၀ဲလၢတၢ်ဘၣ်ယိၣ်အပူၤအဂ့ၢ်န့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤ န့ၣ်လီၤ.
အ၀ဲစံး၀ဲလၢ“ကဘီယူၤဟဲခးလီၤတၢ်န့ၣ်လၢ(၅)သီဟါခီ ၉ နၣ်ရံၣ်ဘျဲၣ်ဘူးထီၣ်လၢ ၁၀ နၣ်ရံၣ်ဖဲန့ၣ်. အဟဲခးလီၤတၢ်န့ၣ် ဘၣ်၀ဲတီတီဖဲသီခါဖၠၣ်န့ၣ်လီၤ.လၢဖၠၣ်ပူၤန့ၣ်သီခါအိၣ်၀ဲ(၃)ပါ,ခး၀ဲဘၣ်၀ဲ(၃)ပါလၢၤလီၤ.သီခါ(၃)ပါအံၤအယူၤကွံၥ်တဘျီဃီ ဖဲန့ၣ် (၁)ပါ,အ၀ဲခံပါန့ၣ်ဘၣ်ဒိနးဘျီပှၤဆှၢလီၤဆူဖၣ်အၣ်တၢ်ဆါဟံၣ်.လဲၤတုၤလၢဖၣ်အၣ်န့ၣ်ယူၤကွံၥ်ကဒီးတပါ.မ့၀ံၤလၢအအိၣ်တ့ၢ်တပါန့ၣ်တုၤခဲအံၤတနီၣ်အသးဒံးဘၣ်”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံၥ်လါမးရှး ၃ သီ မုၢ်ထူၣ်(၁၁း၃၀)အဆၢကတီၢ်န့ၣ်စ့ၢ်ကီး ပယီၤသုးကဘီယူၤဟဲခးလီၤဒံးတၢ်လၢ ကတၢတံၥ်သ၀ီခိဃၢၤ တီသူကျါသ၀ီပူၤအဃိ သ၀ီဖိဘၣ်ဒိ(၃)ဂၤ,ဟံၣ်ဟးဂီၤ(၁)ဖျၢၣ်ဒီး ထိးသံစ့ၢ်ကီးတဒုကဲထီၣ်တ့ၢ်အသးဒံး အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤ.
စးထီၣ်တနံၣ်အံၤ ၂၀၂၅ လါယနူၤအါရံၤတုၤလၢခဲအံၤလါဖ့ၤဘြူၤအါရံၤအံၤန့ၣ် လီၤဆီဒၣ်တၢ်လၢအ(သုးက့ ၁),(သုးက့ ၃)ဒီး (သုးက့ ၆) ဟီၣ်က၀ီၤအပူၤန့ၣ် သုးကီၣ်ကးအံၤသူ၀ဲကဘီယူၤပညိၣ်ဟးခးလီၤ၀ဲတၢ်လိၤလိၤလၢကၠိတၢ်သူၣ်ထီၣ်,တၢ်ဘူၣ်တၢ်ဘါ တၢ်သူၣ်ထီၣ်ဟဲအါထီၣ်၀ဲဖျိဖျိဖျါဖျါအဂ့ၢ်န့ၣ် သ့ၣ်ညါဘၣ်န့ၣ်လီၤ.
