လါမးရှး ၁၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်ပူၤ မဲးပြ့ခံသုးကလၢၤခိၣ်ဃၢၤကမျၢၢ်လၢ အဃ့ၢ်ထီၣ်တၢ်ဆၢကတီၢ်န့ၢ်(၂)လါဃၣ်ဃၣ်တဖၣ်အံၤ တနီၤန့ၣ်က့ၤအိၣ်က့ၤဆိးက့ၤကဒါဆူအဒူသ၀ီအဂ့ၢ်န့ၣ် လီၢ်က၀ီၤပှၤဘၣ် မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
တချုးတၢ်ထီၣ်န့ၢ်မဲးပြ့ခံသုးကလၢၤဖဲလါယနူၤအါရံၤထီၣ်အခါန့ၣ် ကရူၢ်(၃)ဘ့ၣ်ပူၤဒူသ၀ီကမျၢၢ်လၢအိၣ်ဘူးဖဲ သုးကလၢၤအခိၣ် အဃၢၤ အံၤတဖၣ်ဃ့ၢ်ထီၣ်၀ဲဒီး တုၤလၢခဲအံၤဃ့ၢ်ထီၣ်တၢ်ဆၢကတီၢ်ယံၤထီၣ်လံအဃိ ဖဲလါဖ့ၤဘြူၤအရံၤလၢၥ်ဖဲလါမးရှးထီၣ်အံၤ န့ၣ် ပှၤကမျၢၢ်က့ၤဆူအဟံၣ်အဃီကအိၣ်တ၀ၥ်ဃၣ်ဃၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤစံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် လီၢ်က၀ီၤပှၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤစံး၀ဲလၢ“ခဲအံၤအ၀ဲသ့ၣ်က့ၤအိၣ်လၢအဒူသ၀ီ ပှၤနီၣ်ဂံၢ် ကအိၣ်လၢတ၀ၥ်ဘျဲၣ်ဃၣ်ဃၣ်လံ.တၢ်မၢၤခဲလၢၥ်ဒုတအိၣ်ဒံးဘၣ်.ယသံကွၢ်ဖဲမဟါန့ၣ်တသီခံသီန့ၣ်က့ၤလီၤဟံၣ်တဒူၣ်ခံဒူၣ်. ဖဲမဟါနါက့က့ၤလီၤဒံးခံဒူၣ်ဒံး.ဟံၣ်ခိၣ်မ့အိၣ်အဖျၢၣ်(၁၀၀)န့ၣ်က့ၤအိၣ်၀ဲဒၣ်လၢ အဖျၢၣ်(၆၀),(၇၀)လၢန့ၣ်လံ”အဂ့ၢ်န့ၣ် စံး၀ဲန့ၣ် လီၤ.
လီၢ်က၀ီၤကမျၢၢ်လၢအဃ့ၢ်ထီၣ်တဖၣ်အံၤခီဖျိအ၀ဲသ့ၣ်ပၥ်တ့ၢ်အတၢ်ဖံးတၢ်မၤလၢလီၢ်ခံယံၤထီၣ်လံဒီးလၢကဟဲဆူညါ ကအီၣ်ကအီအဂီၢ်ဘၣ်ဖံးအီၣ်မၤအီၣ်ဒံး၀ဲအဃိ တသ့တဘၣ်ကွၢ်တၢ်အိၣ်သးဒီးက့ၤအိၣ်၀ဲဒၣ်ဘၣ်ဆၣ်က့ၤ၀ဲတမ့ၢ်ခဲလၢၥ် ဒံးဘၣ် အဂ့ၢ်န့ၣ် သ့ၣ်ညါဘၣ်လၢကမျၢၢ်အအိၣ်န့ၣ်လီၤ.
အဃိကမျၢၢ်လၢအက့ၤအဒူသ၀ီအဟံၣ်အဃီတဘူၣ်ဒံးဘၣ်တဖၣ်စ့ၢ်ကီးခါလၢကဟဲလၢကအီၣ်ကအီ,ကအိၣ်ကဆိးအဂီၢ် ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဘၣ်တ့ၢ်ဃၥ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
စးထီၣ်ဖဲတၢ်ပၢၢ်ဆၢသုးပၥ်ဖှိၣ်ကရူၢ်ထီၣ်ခး၀ဲမဲးပြ့ခံသုးကလၢၤဒီတကတီၢ်တုၤလၢအန့ၢ်တစုန့ၣ် ပယီၤသုးအံၤခးလီၤ ကျိဖးဒိၣ်,ကဘီယူၤစ့ၢ်ကီးခးလီၤတၢ်အဃိ မဲးပြ့ခံကရူၢ်,အံစူၢ်ခံကရူၢ်,ပံၣ်တံၣ်ကရူၢ်ဒီးစွ့ၣ်လီအ့ကရူၢ် ပူၤ ကမျၢၢ်ပၥ်ဖှိၣ်အဂၤ (၄၀၀၀)ဃၣ်ဃၣ်ဘၣ်ဃ့ၢ်ထီၣ်၀ဲန့ၣ်လီၤ.
စးထီၣ်ဖဲတၢ်ထီၣ်န့ၢ်သုးကလၢၤ၀ံၤတုၤလၢခဲအံၤန့ၣ် ကီၢ်ဆၣ်ဟီၣ်က၀ီၤ၀ဲန့ၣ်အပူၤ သုးမီၤစိရိၤအံၤသူ၀ဲကဘီယူၤ,ဒြိ ဟးခးလီၤ၀ဲတၢ်အဃိ ကၠိ,တၢ်ဘါယွၤသရိၥ်,ကမျၢၢ်ဟံၣ်တၢ်သူၣ်ထီၣ်ဟးဂီၤ၀ဲဒၣ်အမဲၥ်ညါ ကမျၢၢ်စ့ၢ်ကီးဘၣ်ဒိဘၣ်ထံး၀ဲဒၣ် န့ၣ်လီၤ.
ဒ်န့ၣ်အသိးတကီၢ်ခါခဲအံၤဖဲမဟါလါမးရှး ၁၁ သီအနံၤန့ၣ်စ့ၢ်ကီး ပယီၤသုးကဘီယူၤလဲၤဆှၣ်ဒံးတၢ်လၢထံဆံၣ်ဘီ,ဃီဖိပျဲၢ်ဃုၥ်ဒီး ဒူသ၀ီလၢအိၣ်ဘူးဖဲန့ၣ်သ့ၣ်တဖၣ်ဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
