လါမးရှး ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ လါဖ့ၤဘြူၤအါရံၤတလါအတီၢ်ပူၤန့ၣ် ခီဖျိသုးမီၤစိရိၤအကဘီယူၤလဲၤခးလီၤတၢ်အဃိ ကၠိ,သီခါဖၠၣ်ဒီးခရံၥ်ဖိတၢ်ဘါယွၤသရိၥ်ဟးဂီၤ၀ဲ(၇)ဖျၢၣ် အဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်တၢ်မၤနီၣ်စရီပူၤအသိးန့ၣ်လီၤ.
စးထီၣ်လါဖ့ၤဘြူၤအါရံၤ ၁ သီတုၤ ၂၈ သီ လၢတလါအတီၢ်ပူၤ သုးမီၤစိရိၤအံၤသူ၀ဲကဘီယူၤပညိၣ်လဲၤခးလီၤတၢ်လိၤလိၤ ဆူ ကၠိဒီးတၢ်ဘူၣ်တၢ်ဘါတၢ်သူၣ်ထီၣ်ပၥ်ဖှိၣ်ခဲလၢၥ်အိၣ်၀ဲ(၇)ဘျီအဃိ သီခါဖၠၣ်(၅)ဖျၢၣ်,တၢ်ဘါယွၤသရိၥ် (၁)ဖျၢၣ်ဒီး ကၠိတၢ်သူၣ်ထီၣ် ဟးဂီၤ(၁)ဖျၢၣ် ပၥ်ဖှိၣ်ခဲလၢၥ်(၇)ဖျၢၣ်အဂ့ၢ်န့ၣ် ကီၢ်ရ့ၣ်တၢ်မၤစရီပူၤအသိးသ့ၣ်ညါဘၣ်န့ၣ်လီၤ.
သုးမီစိရိၤအံၤဒ်သိးကူၣ်သ့,တၢ်ဘူၣ်တၢ်ဘါသ့ၣ်တဖၣ်သုတလဲၤထီၣ်လဲၤထီဒီးလဲၤတရံးသးသုတန့ၢ်လၢၤတဂ့ၤအဂီၢ်န့ၣ် မၤပျံၤမၤဖုး၀ဲ ပှၤကမျၢၢ်သ့ၣ်တဖၣ်လၢအအိၣ်ဒီးတၢ်ပညိၣ်လိၤလိၤအဂ့ၢ်န့ၣ် လီၢ်က၀ီၤကူၣ်သ့ပှၤဘၣ်မူဘၣ်ဒါတဂၤ ပဲၥ်ထံနီၤဖး စံး၀ဲ ဒ်အံၤ န့ၣ်လီၤ.
စံး၀ဲလၢ“သုးကီၣ်ကးအတၢ်ထံၣ်ဒုလိၤလိၤလီၤ.တၢတထံၣ်န့ၣ်အ၀ဲသ့ၣ်အဲၣ်ဒိးမၤပျံၤမၤဖုး၀ဲ ဒၣ်ပှၤကမျၢၢ်,ကၠိဖိမိၢ်ပၢ်လီၤ. ခံထံၣ်တထံၣ်ခီန့ၣ်ပဟံၣ်မ့ဟးဂီၤ,ပကၠိ,တၢ်ဘါယွၤ,သီခါဖၠၣ်တဖၣ်မ့ဟးဂီၤန့ၣ်ဒ်သိးပလဲၤက့ၤပဂံၢ်ပဘါတအိၣ်လၢၤဘၣ်န့ၣ် မးပျံၤပှၤလီၤ.အ၀ဲသ့ၣ်န့ၣ်အဲၣ်ဒိးမၤဟးဂီၤတၢ်ခဲလၢၥ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ် လီၤ.
တကးဒံးဘၣ်တလါအတီၢ်ပူၤ ကဘီယူၤလဲၤခးလီၤတၢ်(၇)ဘျီအမဲၥ်ညါ ပယီၤသုးခးလီၤကျိဖးဒိၣ်(၁၈)ဘျီ, တ့ၢ်လီၤ၀ဲဒြိမ့ၣ်ပိၢ် (၂၃)ဖျၢၣ်ဆူဒူသ၀ီပူၤအဃိ ကမျၢၢ်သံ(၁)ဂၤ,ဘၣ်ဒိ(၁၇)ဂၤ,ဟံၣ်ဟးဂီၤ(၂၃)ဖျၢၣ်, ဘၣ်ဒီးကျိဖးဒိၣ် အက့အခီ(၁၈)ဖျၢၣ်, ထိးသံ(၅)ဒု, ကျီၢ်သံ(၂)ဒု,ဘၣ်ဒိ(၃)ဒု,စဲးထဲၢ်တၢ်(၁)ခိၣ်,ဆဲးကၢး(၁)ခိၣ်ဟးဂီၤ၀ဲဒၣ်န့ၣ်လီၤ.
လၢန့ၣ်အမဲၥ်ညါတလါအတီၢ်ပူၤပယီၤသုးဒီးဟီၣ်က၀ီၤကညီဒီကလုၥ်တၢ်ထူၣ်ဖျဲး သုးမုၢ်ဒိၣ် (KNLA) သုးရ့ၣ်(၁), (သုးရ့ၣ်(၂), သုးရ့ၣ်(၃) သုးပၥ်ဖှိၣ်အဘၢၣ်စၢၤ တၢ်ဒုးစဲးပြဲး,တၢ်ခိးထုးပယီၤသုး,တၢ်လဲၤခး၀ဲဒီးစနဲးဖၢး, တၢ်လဲၤတ့ၢ်လီၤဒြိမ့ၣ်ပိၢ်ဒီး တၢ်လဲၤကွံၥ် ပယီၤသုးဒီး(ရီးကဲး)ကျိဖးဒိၣ်ပၥ်ဖှိၣ်ခဲလၢၥ်(၁၇)ဘျီအဃိ ပယီၤသုးတကပၤသံ(၁၇)ဂၤဒီး ဘၣ်ဒိ(၂၈)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ် အပူၤပၥ်ဖျါ၀ဲန့ၣ်လီၤ.
တကတီၢ်ဃီတၢ်ဒုးဘျီ၀ဲအံၤအပူၤပယီၤသုးတကပၤသံဘၣ်ဒိဘၣ်ထံးအါမးဘၣ်ဆၣ် မ့မ့ၢ်လၢဟီၣ်က၀ီၤတၢ်ပၢၢ်ဆၢသုးပၥ်ဖှိၣ် ကရူၢ်တကပၤခီန့ၣ်သံတအိၣ်,ဘၣ်ဒိ၀ဲ(၇)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဒူသထူၣ်ကီၢ်ရ့ၣ်ပူၤ ဖဲအပူၤကွံၥ်ယနူၤအါရံၤတလါအတီၢ်ပူၤန့ၣ်စ့ၢ်ကီး ခီဖျိကျိဖးဒိၣ်ဒီးကဘီယူၤအံၤအဃိ ကၠိ(၁)ဖျၢၣ်, ဟံၣ်တၢ်သူၣ်ထီၣ်(၁၆)ဖျၢၣ် ဟးဂီၤ၀ဲဒၣ်အသိး ဆဲးကၢး,သိလ့ၣ်,ဆၣ်ဖိကီၢ်ဖိ,ရီဘၢၣ်ထူၣ်ဃုၥ်ဒီး ကမျၢၢ်အစ့ အူအီၣ်ဟးဂီၤ၀ဲဒၣ် စုၥ်စုၥ် ကဲထီၣ်တ့ၢ်အသးဒံးန့ၣ်လီၤ.
