လါမးရှး ၁၃ သီ, ၂၀၂၅ နံၣ်, ခ့ၣ်အဲးစံၣ်
ဖဲတနံၤအံၤလါမးရှး ၁၃ သီအနံၤ လၢအလီၤဘၣ်၀ဲပအိၣ်ဒီကလုၥ်မုၢ်နံၤဆၢက့ၤ(၇၆)၀ီတ၀ီအံၤန့ၣ် အဆိကတၢၢ်တဘျီ ဘၣ်တၢ်မၤလၤကပီၤမၤ၀ဲမူးတၢ်ရဲၣ်တၢ်ကျဲၤ လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ တၢ်လီၢ်ပူၤဖျဲးအလီၢ်တတီၤလၢ သူၤရံၣ်ယၣ်စၤဒၤ(Suriyasanta Hight School)ပအိၣ်ကၠိအံၤန့ၣ်လီၤ.
ပအိၣ်ဒီကလုၥ်မုၢ်နံၤတၢ်ရဲၣ်တၢ်ကျဲၤမူးအံၤဘၣ်တၢ်စးထီၣ်အီၤ၀ဲဂီၤခီ ၇ နၣ်ရံၣ်အဆၢကတီၢ်ဒီး ဒ်န့ၣ်အသိးလၢတၢ်သ့ၣ်နီၣ် မၤလၤကပီၤမုၢ်နံၤဒိၣ်မုၢ်နံၤထီအံၤအဂီၢ်တၢ်ရဲၣ်တၢ်ကျဲၤအပူၤတၢ်မၤဃုၥ်၀ဲတၢ်ပျၢ်ကၠိမူးတၢ်ရဲၣ်တၢ်ကျဲၤအဂ့ၢ်န့ၣ် ကၠိခိၣ် သရၣ်(ခိၤမီၤယဲ) စံး၀ဲန့ၣ်လီၤ.
(Suriyasanta Hight School)ပအိၣ်ဒီကလုၥ်ကၠိအံၤ ဘၣ်တၢ်ဒုးအိၣ်ထီၣ်အီၤဖဲအပူၤကွံၥ်နံၣ်အခါန့ၣ်ဒီး ကၠိဖိမုၣ်ခွါပၥ်ဖှိၣ်ခဲလၢၥ် အိၣ်၀ဲ(၂၆)ဂၤဒီး ကၠိသရၣ်/မုၣ်အိၣ်၀ဲ(၈)ဂၤအဂ့ၢ်န့ၣ် ကၠိပှၤဘၣ်မူဘၣ်ဒါစံး၀ဲန့ၣ်လီၤ.
ဖဲတၢ်မၤ၀ဲ(Suriyasanta Hight School)တၢ်ပျၢ်ကၠိမူးတၢ်ရဲၣ်တကျဲၤဒီးပအိၣ်ဒီကလုၥ်မုၢ်နံၤတၢ်ရဲၣ်တၢ်ကျဲၤအပူၤန့ၣ် ကၠိပှၤဘၣ်မူဘၣ်ဒါ, ကၠိသရၣ်/မုၣ်, ပှၤကၠိဖိဃုၥ်ဒီးပှၤတမှံၤလၢအဂၤသ့ၣ်တဖၣ်ဟဲထီၣ်၀ဲအဂၤ(၁၀၀)ဃၣ်ဃၣ်န့ၣ်လီၤ.
လၢန့ၣ်အမဲၥ်ညါပအိၣ်ဒီကလုၥ်မုၢ်နံၤမူးတၢ်ရဲၣ်တၢ်ကျဲၤအပူၤန့ၣ် ပအိၣ်ဖဲၣ်ဒရၢၣ်ကီၣ်ကး(PNSC)ဒီး တၢ်ပၢၢ်ဆၢသုးကရူၢ်ခိၣ်နၢ် ဟဲထီၣ်စံးကတိၤဟ့ၣ်ဂံၢ်ဟ့ၣ်ဘါလီၤ၀ဲတၢ်တဂၤစုၥ်စုၥ်န့ၣ်လီၤ.
ပအိၣ်ဒီကလုၥ်မုၢ်နံၤလၢအလီၤဘၣ်၀ဲတနံၤအံၤန့ၣ် လၢကညီကီၢ်စဲၣ် သၤမညၣ်ဟီၣ်က၀ီၤအပူၤစ့ၢ်ကီး တၢ်မၤလၤကပီၤ၀ဲ မုၢ်နံၤအံၤအိၣ်အသိး လၢသထူၣ်၀့ၢ် ဘ့ၤလဲၤ(ဘင်လှိုင်)က၀ီၤဒ့ပူၤစ့ၢ်ကီးတၢ်မၤလၤကပီၤ၀ဲအိၣ်န့ၣ်လီၤ.