လါယူၤ ၂၉ သီ, ၂၀၂၆ နံၣ်, ခ့ၣ်အဲးစံၣ်
လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဖိးဖြးကီၢ်ဆၣ်လၢအိၣ်တခီတဝၢ်ဝၢ်ဒီးခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ရၤမတံ ကီၢ်ဆၣ် တီနီၢ်မုၢ်ထီၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တၢ်ပၢဟီၣ်ကဝီၤပူၤအံၤ ဖဲတနံၤအံၤလါယူၤ ၂၉ သီ အံၤန့ၣ် ထံဂုၤကီၢ်ဂၤကၠါဖၠၣ်ပှၤမၤတၢ်ဖိ(၁၃)ဂၤ ဟဲက့ၤဃ့ၢ် ဖျိးထီၣ်ဝဲလၢကီၢ်ကၠီၣ်တဲၣ်တကပၤအဂ့ၢ်န့ၣ် Thai PBS တၢ်ကစီၣ်သန့ ထုးထီၣ်ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ထံဂုၤကီၢ်ဂၤကၠါဖၠၣ်ပှၤမၤတၢ်ဖိ(၁၃)ဂၤလၢအဃ့ၢ်ဖျိးထီၣ်အံၤတဖၣ်မ့ၢ်ဝဲ ထံဂုၤကီၢ်ဂၤ(၇)ဘ့ၣ်အထံဖိကီၢ်ဖိဒီး လၢန့ၣ်အမဲၥ်ညါ ပှၤသ့ၣ်တဖၣ်အံၤဘၣ်တၢ်ကိးလံၣ်အဝဲသ့ၣ်လၢတၢ်ဖံးတၢ်မၤအပူၤတကးဒံးဘၣ်တၢ်မၤဒၢၣ်မၤဆါမၤပယွဲ တ့ၢ်ဃၥ်အဝဲသ့ၣ် အိၣ် ဝဲဒၣ်န့ၣ်လီၤ.
ဒ်န့ၣ်အသိးလၢထံဂုၤကီၢ်ဂၤကၠါဖၠၣ်အတၢ်ဟဲစံၣ်ဖျိးထီၣ်ဘျီဝဲအံၤတဖၣ်အကျါပၣ်ဃုၥ်ဝဲဒၣ်ဒီးပိၥ်မုၣ်စှၤကိၥ်ဂၤအဂ့ၢ်န့ၣ် တၢ်ကစီၣ်တၢ်ဂီၤအတၢ်ပၥ်ဖျါပူၤအသိး သ့ၣ်ညါဘၣ်န့ၣ်လီၤ.
တကီၢ်ခါခဲအံၤထံဂုၤကီၢ်ဂၤကၠါဖၠၣ်ပှၤမၤတၢ်ဖိသ့ၣ်တဖၣ်အံၤကၠီၣ်တဲၣ်ပှၤဘၣ်မူဘၣ်ဒါပၢၤဃၥ်ဝဲဒီး ပှၤသ့ၣ်တဖၣ်အံၤဘၣ်တၢ်ကူၣ် လဲၤမၤကၤ,ဘၣ်တၢ်ဆါအီၣ်အီၤအဂ့ၢ်န့ၣ် ကၠီၣ်တဲၣ်လီၢ်ကဝီၤဂံၢ်ခီၣ်ထံးတၢ်ကရၢကရိလၢအဟူးဂဲၤဘၣ်ဃးတၢ်ဂ့ၢ်အံၤသ့ၣ်တဖၣ် ပၥ်ဂၢၢ် ပၥ်ကျၢၤစံးဝဲအဂ့ၢ်န့ၣ် တၢ်ကစီၣ်ပူၤ ပၥ်ဖျါဝဲန့ၣ်လီၤ.
လၢတၢ်န့ၣ်အဃိပှၤသ့ၣ်တဖၣ်အံၤဒ်ထံဂုၤကီၢ်ဂၤတၢ်သိတၢ်သီအိၣ်ဝဲအသိး မီၣ်သီဝဲၤဒၢးဘၣ်ထွဲဒီးတၢ်ကရၢကရိဘၣ်ထွဲတဖၣ် ကပၥ်ဖှိၣ်ထီၣ်သးဃိထံသမံသမိးဝဲအဂ့ၢ်န့ၣ် ဂံၢ်ခီၣ်ထံးတၢ်ကရၢကရိတဖၣ် ဃ့ထီၣ်ဝဲန့ၣ်လီၤ.
ထံဂုၤကီၢ်ဂၤကၠါဖၠၣ်ပှၤမၤတၢ်ဖိလၢအဃ့ၢ်ဖျိးထီၣ်ခဲအံၤတဖၣ် ခီဖျိအိၣ်ဃ့ၢ်ထီၣ်ဝဲလၢ(DKBA)တၢ်ပၢဟီၣ်ကဝီၤပူၤအဃိ ဒ်သိးကသ့ၣ်ညါ ဘၣ်တၢ်အိၣ်သးလီၤတံၢ်လီၤဆဲးအဂီၢ် ပခ့ၣ်အဲးစံၣ်-ကညီတၢ်ကစီၣ်ဆဲးကျိးဝဲ ကရူၢ်အံၤပှၤဘၣ်မူဘၣ်ဒါဘၣ်ဆၣ် ဆဲးကျိးတန့ၢ်ဝဲ ဘၣ်န့ၣ်လီၤ.
ဘၣ်ဆၣ်တချုးတၢ်ကဲထီၣ်သးအံၤဒံးဘၣ် ဘၣ်ဃးကၠါဖၠၣ်တၢ်ဖံးတၢ်မၤတၢ်ဂ့ၢ်အံၤ အပူၤကွံၥ်လါယူၤ ၂၂ သီအနံၤ လၢဂီၤလ့ၤဒီး ကၠီးခဲး(DKBA) ဟီၣ်ကဝီၤအပူၤ ထံဂုၤကီၢ်ဂၤကၠါဖၠၣ်ပှၤမၤတၢ်ဖိအဂၤ(၅၀၀၀)ဘျဲၣ်အိၣ်ကတၥ်ထီၣ်ဒံးအသးဒီး ဒ်န့ၣ်အသိး ပှၤသ့ၣ်တဖၣ်အံၤလိၣ်ဘၣ်ဝဲလၢတၢ်ကလဲၤမၤထူၣ် ဖျဲးထီၣ်အဝဲသ့ၣ်အဂ့ၢ်န့ၣ် CSNHTV ဂံၢ်ခီၣ်ထံးတၢ်ကရၢကရိ ထုးထီၣ်ပၥ်ဖျါ တ့ၢ်ဒံးဝဲန့ၣ်လီၤ.
