လါယူၤ ၂၉ သီ, ၂၀၂၆ နံၣ်, ခ့ၣ်အဲးစံၣ်
ဝ့စ့ၤ(၀င်းစိန်)သဝီ စွ့ၤညီၤပ့ၤ(ရွှေညောင်ပင်ကွက်သစ်)လၢအိၣ်ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁) သထူၣ်ကီၢ်ဆၣ်ဒီး မီၣ်လမၠဲၣ်ကီၢ်ဆၣ်ဟီၣ်ကဝီၤပူၤအံၤ ပယီၤသုးဒီး(ဗျူစောထီး)သုးပၥ်ဖှိၣ်တဖၣ် နုၥ်လီၤဝဲလၢသဝီပူၤဝံၤဖီၣ်က့ၤကိးဝဲ ကမျၢၢ် ပိၥ်ခွါ(၈)ဂၤဒီး ခဲအံၤပၥ်ဝဲဖဲသထူၣ်ဝ့ၢ်ပၢၤကီၢ်ဝဲၤလီၢ်ဒီး သဝီဖိအါမးဃ့ၢ်ထီၣ်ဟးပလဲၥ်သးအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤ ပှၤဘၣ်မူဘၣ်ဒါ အအိၣ်န့ၣ်လီၤ.
ဖဲအပူၤကွံၥ်လါယူၤ ၂၃ သီ ဂီၤခီ ၁၀း၀၀ ဃၣ်ဃၣ်အဆၢကတီၢ် တၢ်ဒုးကဲထီၣ်တအိၣ် လၢ(ရင်းငြိမ်)သဝီအံၤဒီး (ကျုံပါ)သဝီ အံၤတဆီ သထူၣ်ပၢၤကီၢ်ကရူၢ်ဒီး(ဗျူစောထီး)သ့ၣ်တဖၣ်အံၤပၥ်ဖှိၣ်ထီၣ်သး ဟံၣ်သိလ့ၣ်(၁၃)ခိၣ် သုးနီၣ်ဂံၢ် အဂၤ(၇၀) ဃၣ် ဃၣ် နုၥ်လီၤဃိထံသမံသမိးတၢ်သတူၢ်ကလၥ်လၢ ၀့စ့ၤ(ဝင်းစိန်)သဝီ စွ့ၤညီၤပၤကွဲၣ်သ့ၣ် (ရွှေညောင်ပင် ကွက်သစ်) လၢဟံၣ်ခိၣ်အိၣ်အဖျၢၣ်(၇၀)ဘျဲၣ်လၢကညီကလုၥ်ဒီးပယီၤကလုၥ်အိၣ်ဃါဃုၥ်ဝဲအံၤအပူၤန့ၣ်လီၤ.
ပယီၤသုးပၥ်ဖှိၣ်တဖၣ်အံၤဖဲအဝဲသ့ၣ်နုၥ်လီၤဃိထံသမံသမိးတၢ်လၢသဝီပူၤပှၤဟံၣ်အခါန့ၣ် ဟံဆူၣ်ဃုၥ်ဝဲပှၤထူ,ပှၤကျိၣ်ပှၤစ့, တၢ်ဖိတၢ်လံၤလၢကျးပူၤသ့ၣ်တဖၣ်ဒီးက့ၤစိၥ်ဟံဃုၥ်ဝဲကမျၢၢ်အသိလ့ၣ်ယီၣ်(ဆဲးကၢး) ၄ ခိၣ်တကးဒံးဘၣ် ဖီၣ်က့ၤကိးဃုၥ်ဝဲ သဝီဖိပိၥ်ခွါ(၈)ဂၤန့ၣ်လီၤ.
ပှၤသဝီဖိလၢတၢ်ဖီၣ်က့ၤကိးဝဲသ့ၣ်တဖၣ်န့ၣ်မ့ၢ်ဝဲ စီၤဆၣ်ထူ(၂၅)နံၣ်, ကိၤကၠီၤစ့ၤအီၤ(၂၅)နံၣ်, စီၤဖါလါထူ(၄၀)နံၣ်, စီၤသါစီၤ (၄၁)နံၣ်, စီၤမၠ့ၣ်အ့(၂၆)နံၣ်, စီၤလ့နဲၤ(၄၂)နံၣ်, စီၤလၣ်သ့(၃၈)နံၣ် ဒီး ပှၤလၢအဂၤတဂၤလၢတၢ်တသ့ၣ်ညါဝဲအမံၤအံၤဒံးဘၣ် သ့တဖၣ် န့ၣ်လီၤ. ဒ်န့ၣ်အသိးပယီၤသုးပၥ်ဖှိၣ်သ့ၣ်တဖၣ်အံၤဖဲအဝဲသ့ၣ်ဖီၣ်ကမျၢၢ်ဝံၤတချုးဟးထီၣ်လၢသဝီပူၤအခါန့ၣ် ဒ်သိးကမျၢၢ်ကပျံၤတၢ်အဂီၢ် ခးပိၢ်ထီၣ်ဝဲကျိ(၁၁)ထံၣ် ဒီး မၤပိၢ်ဖးထီၣ်ဝဲစုကွံၥ်မ့ၣ်ပိၢ်(၂)ဖျၢၣ်ဝံၤဟးထီၣ်က့ၤဝဲဒၣ်န့ၣ်လီၤ.
ဘၣ်ဃးပယီၤသုးပၥ်ဖှိၣ်နုၥ်လီၤဖီၣ်က့ၤကိးဝဲကမျၢၢ်တၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးဝဲလၢ“ဒ်သိး(ဝ့စ့ၤ) တၢ်လီၢ်ဖဲန့ၣ် ပှၤအိၣ်ကျဲၣ်ကျီဒီး ပယီၤအိၣ်,ကညီကလုၥ်အိၣ်မ့ဝံၤကီၤလၤကလုၥ်စ့ၢ်ကီး အိၣ်လီၤ.ဖဲမဟါ ယဆဲးကျိးန့ၣ်တဲဝဲ လၢပှၤသဝီဖိတဖၣ်အံၤတၢ်ပၥ်အီၤဖဲသထူၣ်ဝ့ၢ် ပၢၤကီၢ်ဝဲၤလီၢ်န့ၣ်လီၤ.
ခဲအံၤလၢတၢ်ကဲထီၣ်သးအံၤအဃိသဝီဖိတဖၣ်ပျံၤတၢ် ဖုးတၢ်စံၣ်ထီၣ်ဟးအိၣ်လၢတၢ်လီၢ်အဂၤ”အဂ့ၢ်န့ၣ် စံဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
တကီၢ်ခါခဲအံၤ သဝီဖိ(၈)ဂၤလၢပယီၤသုးပၥ်ဖှိၣ်ဖီၣ်ဝဲတၢ်ဆၢကတီၢ်န့ၢ်တနွံဃၣ်ဃၣ်အံၤန့ၣ် မ့ၢ်အတၢ်ဆဲးကျိးဒီး အဟံၣ်ဖိဃီဖိအိၣ်ဧါ/ တအိၣ်ဧါဒီး ပှၤသ့ၣ်တဖၣ်အံၤခီဖျိအိၣ်လၢအပယီၤသုးစုပူၤအဃိ တၢ်ဆဲးမၤအဝဲသ့ၣ်ဒ်လဲၣ် တၢ်ဂ့ၢ်တၢ်ကျိၤ တဖၣ်အံၤတၢ်လူၤဆဲးကျိးမၤလီၤတံၢ်အီၤအဖၢမုၢ်အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်ဝဲန့ၣ်လီၤ.
ဒ်လီၢ်ကဝီၤကမျၢၢ်စံးဝဲအသိးန့ၣ် တချုးတၢ်ကဲထီၣ်သးအံၤဒံးဘၣ်ဖဲအပူၤကွံၥ်လါမ့ၤ ၂၈ သီအနံၤန့ၣ် သုးကရူၢ်စုတီၤဖီလၥ် (ဗျူစောထီး) ဖိခၠ့ၣ် လၢအိၣ်သဘၠူၣ်ခၠီသဝီ(သဗျုချောင်း)သဝီအံၤ တၢ်ပၢၢ်ဆၢသုးကရူၢ်နုၥ်လီၤဖီၣ်ဝဲအဃိ လၢတၢ်က့ၤခီၣ်ဆၢ ကဒါတခါအဖီခိၣ် ဘၣ်တၢ်နုၥ်လီၤဃိထံသမံသမိးဖီၣ်က့ၤကိးကမျၢၢ်ဘၣ်ဟဲအိၣ်ထီၣ်ဝဲဒ်အံၤလီၤအဂ့ၢ်န့ၣ် တၢ်ပဲၥ်ထံနီၤဖးစံး ဝဲန့ၣ်လီၤ.
ဘၣ်ဆၣ်ဘၣ်ဃးတၢ်ဂ့ၢ်လၢအဟဲကဲထီၣ်သးသ့ၣ်တဖၣ်အံၤန့ၣ် တၢ်ဘၣ်ထွဲတအိၣ်ဝဲနီမံၤဘၣ်အသိး တၢ်ကဲထီၣ်သးမုၢ်နံၤမုၢ်သီ စ့ၢ်ကီးတဘူးလိၥ်အသးဘၣ်အဂ့ၢ်န့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအ့နဲၤ စံးဝဲန့ၣ်လီၤ.
“တၢ်ဂ့ၢ်န့ၣ်အတဘၣ်ဃးလိၥ်သးဘၣ်.ဘၣ်ဆၣ်အဝဲသ့ၣ်န့ၣ်ကဟ့ၣ်ထီၣ်တၢ်ဂ့ၢ်တၢ်ကျိၤဒ်န့ၣ်လီၤ.ကတဲဝဲဒၣ်လၢတၢ်ပၢၢ်ဆၢသုးကရူၢ်လၢအနုၥ်လီၤဖီၣ် သဘၠူၣ်ခၠီ သုးကရူၢ်အပှၤ(ပြည်သူ့စစ်) တဖၣ်န့ၣ်အဟဲက့ၤအိၣ်ဖဲအံၤကတဲဝဲဒ်န့ၣ်လီၤ. တဲဝဲဘၣ်ဆၣ် တၢ်ကဲ ထီၣ်သးန့ၣ်မုၢ်နံၤမုၢ်သီတဘူးလိၥ်သးဘၣ်. တဘၣ်ဃးလိၥ်အသးဒီးအဟဲနုၥ်လီၤဖီၣ်ပှၤကမျၢၢ်သဝီတဖျၢၣ်အံၤဘၣ်. တၢ်မၢၤအဝဲသ့ၣ်တဲဝဲလၢခီဖျိပှၤလဲၤဖီၣ်အဝဲသ့ၣ်ပှၤအဃိအဝဲသ့ၣ်ဟဲက့ၤနုၥ်လီၤဖီၣ်ဝဲသဝီတဖျၣ်အံၤဒ်အံၤလီၤဘၣ်ဆၣ်အတလိၤလီၤသးဘၣ်”အဂ့ၢ်န့ၣ် စံးအါထီၣ်ဝဲန့ၣ်လီၤ.
သုးဟံန့ၢ်ထံကီၢ်တၢ်စိတၢ်ကမီၤဝံၤလီၢ်ခံ လၢသထူၣ်ဝ့ၢ်ခိၣ်ဝ့ၢ်ဃၢၤန့ၣ် အပူၤကွံၥ်ပယီၤသုးပၥ်ဖှိၣ်ဖီၣ်ဝဲ ကမျၢၢ်ဃ့အီၣ်ဝဲ စ့အိၣ်အသိး တနီၤန့ၣ်ဖီၣ်ဝဲဝံၤဒုးထီၣ်ဝဲဂံၢ်ခီၣ်ထံးသုးတၢ်မၤလိဆှၢထီၣ်ဝဲ ဆူတၢ်ဒုးပျီပူၤစ့ၢ်ကီးကဲထီၣ်အိၣ်ဝဲ အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤခီဖျိပယီၤသုးပၥ်ဖှိၣ်ဖီၣ်ဝဲကမျၢၢ်ကဲထီၣ်ကဒီးဝဲအဃိ ၀့စ့ၤသဝီဖိတဖၣ်ပျံၤတၢ်အိၣ်လၢသဝီပူၤတဘူၣ်လၢၤဘၣ် ဒီး တနီၤန့ၣ်လဲၤအိၣ်ဝဲလၢသီခါဖၠၣ်အိၣ်အသိးတနီၤန့ၣ်လဲၤစံၣ်လီၤအိၣ်လၢခူပူၤဝ့ၢ်ပူၤအိၣ်ဝဲဒၣ်န့ၣ်လီၤ.
ဘၣ်ဆၣ်ခဲအံၤတၢ်ကဲထီၣ်သးဝံၤလီၢ်ခံ ၀့စ့ၤ သဝီလၢဟံၣ်ခိၣ်အိၣ်(၇၄)ဖျၢၣ်အံၤ ပှၤက့ၤအိၣ်ဒံးအဖျၢၣ်(၁၀)ဘျဲၣ်လံဘၣ်ဆၣ် ခဲအံၤအဝဲသ့ၣ်နၢ်ဟူကဒီးဝဲလၢပယီၤသုး ကနုၥ်လီၤကဒီးဝဲအဃိ ကမျၢၢ်လၢအဃ့ၢ်ထီၣ်တဖၣ်က့ၤဟံၣ် တဘူၣ်အိၣ် ကနၣ်ထံ တၢ်အိၣ်သးအဂ့ၢ်န့ၣ် သ့ၣ်ညါဘၣ်န့ၣ်လီၤ.
(ဝင်းစိန်း)သဝီအံၤအိၣ်ဝဲဒၣ်လၢသထူၣ်ဝ့ၢ်ဃၢၤ မ့ဘၣ်ကွၢ်လၢခ့ၣ်အဲၣ်ယူၣ် အတၢ်သူၣ်ထီၣ်ဆီလီၤအပူၤန့ၣ် အိၣ်ဝဲဒၣ်လၢ ဒူသထူၣ်ကီၢ်ရ့ၣ်(သုးက့ ၁) မီၤစကိၤကီၢ်ဆၣ် တၢ်ပၢဟီၣ်ကဝီၤအပူၤဒီး ဒ်န့ၣ်အသိးဟီၣ်ကဝီၤဒူသဝီတၢ်လီၢ်လၢ အကဲထီၣ်သး ခဲအံၤန့ၣ် သုးကရူၢ်တကပၤ မ့ၢ်ဂ့ၤ, ခ့ၣ်အဲၣ်ယူၣ်တကပၤမ့ၢ်ဂ့ၤ လုၢ်ဘၢဒိၣ်စိဝဲတန့ၢ်ခဲလၢၥ် အိၣ်ဒံးဝဲဒၣ်လၢခံခီခံကပၤ ဟီၣ်ကဝီၤပူၤ အဂ့ၢ်န့ၣ် သ့ၣ်ညါဘၣ် န့ၣ်လီၤ.
