လါအ့ဖြ့ၣ် ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ်အပူၤ ဖဲမဟါလါအ့ဖြ့ၣ် ၁၈ သီအနံၤန့ၣ် (KNLA)သုးပၥ်ဖှိၣ်လဲၤထီၣ်ခး၀ဲ ၀့၀ၣ်(ဝင်း၀)ပယီၤသုးကလၢၤတၢ်လီၢ်ဒီး ပယီၤသုးကဘီယူၤဟဲက့ၤတ့ၢ်လီၤ၀ဲမ့ၣ်ပိၢ်(၃)ဘျီအဃိ ကမျၢၢ်သံ(၂)ဂၤအကျါပၣ်ဃုၥ်ဖိသၣ်တဂၤ,ဘၣ်ဒိ(၄)ဂၤအဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံး၀ဲန့ၣ်လီၤ.
ဖဲမဟါဂီၤခီ ၅ နၣ်ရံဃၣ်ဃၣ်အဆၢကတီၢ်န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၂)သုးပၥ်ဖှိၣ် လဲၤခး၀ဲ၀့၀ၣ်(ဝင်း၀)ပယီၤသုးကလၢၤတၢ်လီၢ်အဃိ ဖဲဟါခီ ၃း၃၀ ဆၢကတီၢ် တဘျီ, ဖဲမုၢ်နၤခီ ၁၂း၀၀ နၣ်ရံၣ်န့ၣ် တဘျီ ကဘီယူၤ ဟဲတ့ၢ် လီၤ၀ဲမ့ၣ်ပိၢ်ခဲလၢည(၂)ဘျီလၢသုကလၢၤအခိၣ်အဃၢၤဘၣ်ဆၣ် ကမျၢၢ်တၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် စံး၀ဲန့ၣ်လီၤ.
ဘၣ်ဆၣ်မၤကဒီးဖဲတနံၤအံၤလါအ့ဖြ့ၣ် ၁၉ သီ ဂီၤခီ ၁၁း၀၀ ဃၣ်ဃၣ်အဆၢကတီၢ်န့ၣ် ခီဖျိသုးကီၣ်ကးအကဘီယူၤ ဟဲတ့ၢ်လီၤ ကဒီးမ့ၣ်ပိၢ်လၢ ယငဲ(ရငဲ)သ၀ီဃုၥ်ဒီးသ၀ီလၢအဂၤတဖၣ်အဃိ ကမျၢၢ်သံ(၂)ဂၤဒီးဘၣ်ဒိ(၄)ဂၤကဲထီၣ်၀ဲဒ်အံၤလီၤ အဂ့ၢ်န့ၣ် ကစၢၢ်ဒိၣ်ကီၢ်ဆၣ် ပှၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤ.
အ၀ဲစံး၀ဲလၢ“စးထီၣ်ဖဲတၢ်ဒုးကဲထီၣ်န့ၣ်ပယီၤသုးသူကဘီယူၤဟဲတ့ၢ်လီၤတၢ်သၢဘျီ.လၢမဟါဟါခီ ၃း၃၀ န့ၣ်တဘျီ,လၢမုၢ်နၤ ၁၂ နၣ်ရံၣ်န့ၣ်တဘျီ.ဒီးဖဲတနံၤအံၤဂီၤခီ ၁၀း၄၀ န့ၣ်တဘျီ ကဲထီၣ်ခဲလၢၥ်သၢဘျီ. မဟါခံဘျီန့ၣ်တ့ၢ်လီၤ၀ဲဖဲသုးကလၢၤအကပၤန့ၣ်. မ့မ့တၢ်တနံၤအံၤခီန့ၣ်တ့ၢ်လီၤ၀ဲလၢဒူသ၀ီပူၤ.တ့ၢ်လီၤ၀ဲဖဲ(ယငဲ)သ၀ီပူၤန့ၣ်ပှၤသံ(၂)ဂၤ,ဘၣ်ဒိ(၃)ဂၤနီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
ကမျၢၢ်လၢအသံ(၂)ဂၤန့ၣ်မ့ၢ်၀ဲ အူမ့အီၤ(၅၆)နံၣ်,အလံၤဖိ(၈)နံၣ်ဒီး မ့မ့ၢ်ပှၤလၢအဘၣ်ဒိ(၃)ဂၤန့ၣ်မ့ၢ်၀ဲမ့စီၣ်လ့(၄၆)နံၣ်, မ့စီၣ်(၄၀)နံၣ်,ဒီၤမၠ့ၣ်(၆၂)နံၣ်ဒီးပှၤလၢအဂၤတဂၤအဂ့ၢ်န့ၣ် ပှၤဘၣ်မူဘၣ်ဒါတဂၤဃီ၀ဲန့ၣ်စံးအါထီၣ်၀ဲန့ၣ်လီၤ.
တကီၢ်ခါခဲအံၤခီဖျိတၢ်ဒုးကဲထီၣ်ဒီးကဘီယူၤစ့ၢ်ကီးလဲၤခးလီၤတၢ်တၢ်သံတၢ်ဘၣ်ဒိဘၣ်ထံးအိၣ်ထီၣ်အဖီခိၣ် ကမျၢၢ်လၢအိၣ်ဘူး တၢ်လီၢ်ဖဲန့ၣ်အခိၣ်အဃၢၤတဖၣ်ပျံၤတၢ်ဖုးတၢ်ဒီးတနီၤန့ၣ်ဃ့ၢ်ထီၣ်ဟးပလဲၥ်သးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဘျံးဒ၀ဲၢ်ကီၢ်ရ့ၣ် တနီသရံၣ်ကီၢ်ဆၣ်အပူၤစ့ၢ်ကီး သုးကီၣ်ကးဘိးဘၣ်ရၤလီၤလၢကပတုၥ်ဆိဃၥ်တၢ်ဒုးလၢအသီ(၂၀) အတီၢ်ပူၤဘၣ်ဆၣ် အ၀ဲသ့ၣ်မၤအါထီၣ်အသုးဂံၢ်ဘါဒီး ဖဲတလါအံၤလါအ့ဖြ့ၣ် ၃,၄,၇,၉ သီအနံၤန့ၣ်စ့ၢ်ကီး ပယီၤသုးခးလီၤ ကျိဖးဒိၣ်,ခးလီၤဒြိတကးဒံးဘၣ်အမဲၥ်ညါလဲၤခးလီၤတၢ်ဒီးကဘီယူၤကဲထီၣ်၀ဲတပယူၥ်ဃီဒံးန့ၣ်လီၤ.
