လါအ့ဖြ့ၣ် ၁၉ သီ, ၂၀၂၅ နံၣ်, ခ့ၣ်အဲးစံၣ်
ဖဲတနံၤအံၤလါအ့ဖြ့ၣ် ၁၉ သီ မုၢ်ထူၣ်အဆၢကတီၢ်န့ၣ် သုးမီၤစိရိၤအကဘီယူၤလဲၤတ့ၢ်လီၤကဒီး၀ဲမ့ၣ်ပိၢ်လၢဒူသထူၣ်ကီၢ်ရ့ၣ် (သုးက့ ၁) ဘံလ့ကီၢ်ဆၣ် ဃီဖိပျဲၢ်သ၀ီပူၤအဃိ ကမျၢၢ်ပိၥ်မုၣ်သံ၀ဲ(၂)ဂၤဒီးတပွဲဘၣ်ဒိနးနးကျံၤကျံၤ(၂)ပါအိၣ်လၢ တၢ်ဘၣ်ယိၣ်ပူၤ အဂ့ၢ်န့ၣ် သုးက့(၁)သုးက့ခိၣ် စံး၀ဲန့ၣ်လီၤ.
ဖဲတနံၤအံၤမုၢ်ထူၣ်ကဘၣ်ဖဲမုၢ်ဘူးကထူၣ် ၁၁း၃၀ ဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်တအိၣ်ဘၣ်လၢသီခါအီၣ်စိအခါ သုးမီၤစိရိၤအကဘီယူၤလဲၤတ့ၢ် လီၤ၀ဲမ့ၣ်ပိၢ်လၢဃီဖိပျဲၢ်သ၀ီပူၤ သီခါဖၠၣ်ကရၢၢ်ပူၤအဃိ သ၀ီဖိပိၥ်မုၣ်(၂)ဂၤအကျါတဂၤန့ၣ် အမိၢ်ပှၢ်ဖျိးကွံၥ်၀ဲအကုၥ်တဖၣ်အကုၥ်သံ၀ဲ တဘျီဃီဖဲတၢ်ကဲထီၣ်သးန့ၣ်အသိး တပွဲဖိဒီးတပွဲဖးဒိၣ်ဘၣ်ဒိနးနး(၂)ပါအဂ့ၢ်န့ၣ် သ၀ီဖိတဖၣ် စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤန့ၣ်သ၀ီဖိလၢအလဲၤထံၣ်တၢ်ကဲထီၣ်သးဒီးအမဲၥ်တဂၤစံး၀ဲလၢ“အဟဲခးလီၤတၢ်တနံၤအံၤဘၣ်လၢပှၤမၤတပွဲ၀ံၤပှၤကရိ,လီၤက့ၤတၢ်ဘီမီၤနီၤ.ဘၣ်လၢသီခါတဖၣ်အီၣ်စိ(အီၣ်မုၢ်ထူၣ်တၢ်အီၣ်).ခးလီၤ၀ဲလီၤတဲၥ်တီတီသီခါအီၣ်စိကပၤလီၤအဃိ ကဲထီၣ်၀ဲဒ်အံၤန့ၣ်လီၤ.ပှၤမုၢ်ပှၢ်သံ(၂)ဂၤ,အဘၣ်ဒိလၢအလီၤကရဲန့ၣ်(၁)ဂၤ.မ့၀ံၤပှၤဘၣ်ဒိနးန့ၣ်တပွဲဖိတပါဒီးတပွဲဖးဒိၣ်တပါ.ပှၤကမျၢၢ်ပိၥ်ခွါန့ၣ်ဘၣ်ဒိ(၂)ဂၤ,မ့မ့ၢ်တပွဲဒီးအူစ့လၢအဂၤတဖၣ်န့ၣ်ဘၣ်ဒိ ဘၣ်ဆၣ်ဘၣ်ဒိတနးအါအါဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ.
တကီၢ်ခါခဲအံၤတပွဲဖိလၢအဘၣ်ဒိနးနးကျံၤကျံၤသ့ၣ်တဖၣ်အံၤတၢ်ဆှၢအီၤဆူတၢ်ဆါဟံၣ်တၢ်ဘၣ်ယိၣ်၀ဲဒီး လၢန့ၣ်အမဲၥ်ညါ ကဘီယူၤဟဲခးလီၤတၢ်ဘျီ၀ဲအံၤ ကျိဖးဒိၣ်အက့အခီဘၣ်၀ဲဒၣ်တပွဲ,သီခါဃုၥ်ဒီးသ၀ီဖိပိၥ်ခွါ တစှၤန့ၢ်(၁၀)ဂၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဖၣ်စံး၀ဲန့ၣ်လီၤ.
ဃီဖိပျဲၢ်သ၀ီပူၤတချုုးကဘီယူၤဟဲခးလီၤတၢ်ဒံးဘၣ်အခါန့ၣ်ဟီၣ်က၀ီၤပူၤ၀ဲန့ၣ်ပှၤဒိးန့ၢ်ဃၥ်တၢ်ကစီၣ်လၢကဘီယူၤကဟဲခးလီၤတၢ်အိၣ်အဃိ ကမျၢၢ်တဖၣ်အါဒၣ်တက့ၢ်န့ၣ်ဃ့ၢ်ထီၣ်ဟးပလဲၥ်စိဃၥ်အသးဆူတၢ်ချၢဒီး တကီၢ်ခါခဲအံၤခီဖျိတၢ်ကဲထီၣ်သးအံၤအဃိ ကမျၢၢ်လၢအိၣ်ဘူးဖဲတၢ်ခိၣ်တၢ်ဃၢၤန့ၣ်တဖၣ်အိၣ်လၢတၢ်ပျံၤတၢ်ဖုးပူၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါဒီးကမျၢၢ်တဖၣ် စံး၀ဲအသိးသ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်လါဖ့ၤဘြူၤအါရံၤ ၉ သီ အနံၤစ့ၢ်ကီး ထံခၠံၣ်ဘီသ၀ီလၢအိၣ်ဘူးလိၥ်သးဒီးဃီဖိပျဲၢ်သ၀ီအံၤစ့ၢ်ကီး ပယီၤသုးကဘီယူၤလဲၤတ့ၢ်လီၤမ့ၣ်ပိၢ်အဃိ သီခါဖၠၣ်တၢ်သူၣ်ထီၣ်လီၤပှီၢ်ဟးဂီၤလီၤကရဲ(၂)ဖျၢၣ်ကဲထီၣ်တ့ၢ်အသးဒံးန့ၣ်လီၤ.
တကးဒံးဘၣ်ဃီဖိပျဲၢ်သ၀ီလၢသုးမီၤစိရိၤအကဘီယူၤလဲၤတ့ၢ်လီၤမ့ၣ်ပိၢ်ခဲအံၤန့ၣ် ဖဲအပူၤကွံၥ်(၂၀၂၄)လါမးရှး ၂၃ သီအနံၤ န့ၣ်စ့ၢ်ကီး အဆိကတၢၢ်တဘျီသုးမီၤစိရိၤအကဘီယူၤလဲၤတ့ၢ်လီၤ၀ဲပီၣ်(၅၀၀)မ့ၣ်ပိၢ်လၢကၠိကရၢၢ်ပူၤအဃိ ဖဲန့ၣ်ကၠိတၢ်သူၣ်ထီၣ် လီၤပှီၢ်ဟးဂီၤ၀ဲ(၃)ဖျၢၣ်ကဲထီၣ်တ့ၢ်အသးဒံးန့ၣ်လီၤ.
