ပယီၤသုးတြီ၀ဲ ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် တၢ်တြီဆၢခိ၀ံၣ်တၢ်သမံသမိးအလီၢ်

လါစဲးပထ့ဘၢၣ် ၂၁ သီႇ ၂၀၂၀ နံၣ်ႇ ခ့ၣ်အဲးစံၣ်

ကညီကီၢ်စဲၣ်ႇ ဖၣ်အၣ်ကီၢ်ဆၣ်အပူၤႇ ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် တၢ်ပၢဟီၣ်က၀ီၤ ခလဲၤဟဲၤသ၀ီကျဲ တၢ်အိးထီၣ်၀ဲခိ၀ံၣ်=၁၉ တၢ်သမံသမိးတၢ်အိၣ်ဆူၣ်အိၣ်ချ့လီၢ်အဖီခိၣ် ပယီၤသုးလၢအဟဲဆီ လီၤသးဖဲလီၢ်က၀ီၤအပူၤတဖၣ် ဖဲလါစဲးပထ့ဘၢၣ် ၁၈ သီ ဒီး ၁၉ သီအနံၤန့ၣ် ဟဲတြီမၤတံာ်တာ်၀ဲတၢ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံး၀ဲန့ၣ်လီၤႉ

“ဟဲတဲ၀ဲဒၣ်လၢ ပ၀ဲတၢ်တြီဆၢခိ၀ံၣ်တၢ်သမံသမိးတၢ်အိၣ်ဆူၣ်အိၣ်ချ့အလီၢ်အံၤ တၢ်ဟ့ၣ်အခွဲးမ့ၢ်တအိၣ််ဘၣ်န့ၣ် အိးထီၣ်တန့ၢ်ဘၣ်န့ၣ် ဟဲတြီမၤတံာ်တာ်၀ဲလီၤႉ မၢပထုးကွံာ်၀ဲဒၣ်တၢ်သမံသမိးအလီၢ်လီၤႉ ပ၀ဲဒၣ်သ့ၣ်တဖၣ်စ့ၢ်ကီး ပက့ၤရှဲပၠးကဒါအ၀ဲသ့ၣ်ဒီး ဖဲန့ၣ်တၢ်တဲအါအိၣ်ထီၣ်၀ဲလီၤ” အဂ့ၢ်န့ၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ် ဖဲလါစဲးပထ့ဘၢၣ် ၁၉ သီအနံၤန့ၣ်လီၤႉ

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢႇ ဒူသထူၣ်ကီၢ်ရ့ၣ် အကပိၤကပၤန့ၣ် တၢ်ထံၣ်န့ၢ်၀ဲဒၣ်ၦၤဘၣ်ခိ၀ံၣ် တၢ်ဆါအိၣ်၀ဲအဃိ လၢတၢ်ပၢဟီၣ်က၀ီၤအပူၤ လီၢ်က၀ီၤဖိတဖၣ်ဘၣ်ယိၣ်၀ဲဒၣ်လၢ ခိ၀ံၣ်တၢ်ဆါဃၢ်အံၤ ကရၤလီၤသးအဃိ ဃ့ထီၣ်၀ဲဒၣ်လၢတၢ်ကအိးထီၣ်၀ဲဒၣ် တၢ်သမံသမိးတၢ်အိၣ်ဆူၣ်အိၣ်ချ့လီၢ်အဃိ ဒူသထူၣ်ကီၢ်ရ့ၣ်ၦၤဘၣ်မူဘၣ်ဒါတဖၣ် က့ၤအိးထီၣ်ကဒါက့ၤတၢ်သမံသမိးတၢ်အိၣ်ဆူၣ်အိၣ်ချ့အလီၢ် ဖဲလါစဲးပထ့ဘၢၣ် ၁၈ သီအနံၤန့ၣ်လီၤႉ

တၢ်အိၣ်ဆူၣ်အိၣ်ချ့ၦၤမၤတၢ်ဖိသ့ၣ်တဖၣ်အံၤ တၢ်အိးထီၣ်၀ဲဒၣ်တၢ်တြီဆၢခိ၀ံၣ်တၢ်သမံ သမိးတၢ်အိၣ်ဆူၣ်အိၣ်ချ့လီၢ်အဖီခိၣ် ပဒိၣ်သုး ပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ် –စကခ ၄ႇ ခီၣ်ချ့သုးရ့ၣ်–ခမရ ၄၀၉ စုဒုၣ်တီၤအဖီလာ် ညီၤသ၀ီ(ညောင်ရွာ)သုးကလၢၤ ၦၤဘၣ်မူဘၣ်ဒါတဂၤဒီးသုးဖိတဖၣ် ဖဲလါစဲးပထ့ဘၢၣ် ၁၈ သီႇ မုၢ်ထူၣ် ၁၂ နၣ်ရံၣ်အဆၢကတီၢ်န့ၣ် ဟဲတြီမၤတံာ်တာ်၀ဲဒီး ဒိ၀ဲဒၣ်(တၢ်သမံသမိးလီၢ်)တၢ်ဂီၤန့ၣ်လီၤႉ

ဒ်န့ၣ်အသိး ဖဲလါစဲးပထ့ဘၢၣ် ၁၉ သီအနံၤစ့ၢ်ကီး ပယီၤသုးအံၤ ဟဲလီၤ၀ဲဒၣ်လၢညီၤသ၀ီသုးကလၢၤ ဖဲဂီၤခီ ၁၀ နၣ်ရံၣ် ၃၀ မံးနံးဒီး ဟဲတဲ၀ဲလၢတၢ်သမံသမိးတၢ်အိၣ်ဆူၣ်အိၣ်ချ့အလီၢ်အံၤ တၢ်တဘၣ်အိး ထီၣ်၀ဲဒၣ်လၢကျဲမုၢ်ကပၤဘၣ်ဒီး တြီမၤတံာ်တာ်၀ဲ၀ံၤ ဖဲ ၁၁ နၣ်ရံၣ်တခီအဆၢကတီၢ် က့ၤထီၣ်ကဒါလၢ အသုးကလၢၤအလီၢ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် စံး၀ဲန့ၣ်လီၤႉ

“ပယီၤသုးတပၤစံး၀ဲစ့ၢ်ကီး မၤ၀ဲဒၣ်လၢကမျၢၢ်အဂီၢ်လီၤႉ ပ၀ဲဒၣ်စ့ၢ်ကီး မၤတၢ်လၢကမျၢၢ်အဂီၢ်လီၤႉ တၢ်အိၣ်ဆူၣ်အိၣ်ချ့န့ၣ် မ့ၢ်၀ဲဒၣ်ဒုၣ်ဒါႇ တံၤသကိးတအိၣ်ဘၣ်ႉ ပမၤ၀ဲဒၣ်တၢ်သမံသမိးတၢ်အိၣ်ဆူၣ်အိၣ်ချ့အလီၢ်အံၤ လၢကဒုးတၢ်အဂီၢ်တမ့ၢ်ဘၣ်ႉ ကျိတပၣ်ဘၣ်ႉ ပယီၤသုးတဖၣ်မ့ၢ်ဟးထီၣ်ဟးလီၤန့ၣ် ပတမၤတံာ်တာ်အ၀ဲသ့ၣ်နီတမံၤဘၣ်” အဂ့ၢ်န့ၣ် ပဒိၣ်စီၤစိမၠ့ၣ် ဆဲးစံး၀ဲန့ၣ်လီၤႉ

ခ့ၣ်အဲၣ်ယူၣ်ႇ ဒူသထူၣ်ကီၢ်ရ့ၣ် အိးထီၣ်၀ဲဒၣ်တၢ်တြီဆၢခိ၀ံၣ်တၢ်သမံသမိးတၢ်အိၣ်ဆူၣ်အိၣ်ချ့အလီၢ်အံၤ ၦၤလၢအဟးထီၣ်က့ၤလီၤလၢလီၢ်က၀ီၤပူၤတဖၣ် မၢ၀ဲကးဘၢနါဒ့ကိာ်ပူၤႇ သ့ဃၢၤစု တၢ်သ့ၣ်တဖၣ်အံၤ တၢ်အိၣ််ဆူၣ်အိၣ်ချ့ၦၤမၤတၢ်ဖိတဖၣ် မၤ၀ဲဒၣ်တၢ်ဟ့ၣ်သ့ၣ်ညါနၢ်ပၢၢ်တဖၣ်န့ၣ်လီၤႉ

ထံကီၢ်ဒီဘ့ၣ်တၢ်ပတုာ်တၢ်ခးလံာ်ဃံးဃာ် NCA˜ အဆၢဒိၣ် ၃ အပူၤ ကမျၢၢ်တဖၣ်အတၢ်အိၣ်ဆူၣ်အိၣ်ချ့အံၤ တၢ်တဘၣ်တြီမၤတံာ်တာ်ပၣ်၀ဲအဃိ တၢ်တြီမၤတံာ်တာ်၀ဲခဲအံၤန့ၣ်တကြၢး၀ဲဘၣ်အဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါတဖၣ်စံး၀ဲလီၤႉ

ခ့ၣ်အဲၣ်ယူၣ်ႇ ဒူသထူၣ်ကီၢ်ရ့ၣ်ႇ ဖၣ်အၣ်ကီၢ်ဆၣ်ႇ ခလဲၤဟဲၤသ၀ီပူၤ ခိ၀ံၣ်တၢ်ဆါစးထီၣ်ကဲထီၣ်သး၀ံၤအလီၢ်ခံ ဖဲလါအ့ဖြ့ၣ်အတီၢ်ပူၤ တၢ်ပာ်လီၤတ့ၢ်၀ဲဒၣ်တၢ်သမံသမိးတၢ်အိၣ်ဆူၣ်အိၣ်ချ့အလီၢ်ဒီး ဖဲခိ၀ံၣ်တၢ်ဆါဃၢ် တၢ်ရၤလီၤသးလီၤစှၤ၀ဲအဆၢကတီၢ် တၢ်က့ၤကးတံၢ်၀ဲတၢ်သမံသမိးတၢ်အိၣ်ဆူၣ်အိၣ်ချ့အလီၢ်န့ၣ်လီၤႉ ဆၢကတီၢ်ခဲအံၤခီဖျိလၢတၢ်ဆါဃၢ်ရၤလီၤသးဟဲအါထီၣ်၀ဲအဃိ တၢ်က့ၤအိးထီၣ်ကဒါတၢ်သမံသမိးလီၢ် အသီတဘျီလီၤအဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါတဖၣ် စံး၀ဲလီၤႉ

ဖဲအပူၤကွံာ် လါအ့ဖြ့ၣ်စ့ၢ်ကီး ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် မီၤစကိၤတၢ်လီၢ် ထီၤမူဒူသ၀ီကရူၢ် စ့မသွဲၤသ၀ီပူၤ တၢ်အိးထီၣ်ဃာ်၀ဲ covid-19 တၢ်သမံသမိးတၢ်အိၣ်ဆူၣ်အိၣ်ချ့အလီၢ်တခါ ခီဖျိလၢပယီၤသုးဟဲဟ့ၣ်တၢ်ဆီၣ်သနံးအဃိ ဘၣ်တၢ်က့ၤထုးကွံာ်၀ဲတၢ်သမံသမိးလီၢ်အိၣ်၀ဲလီၤအဂ့ၢ်န့ၣ် ခ့ၣ်အဲၣ်ယူၣ်အကပၤ စံး၀ဲန့ၣ်လီၤႉ