လါအ့ဖြ့ၣ် ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်အပူၤ ပယီၤသုးမၤအါထီၣ်သုးဂံၢ်ဘါဒီး ဟဲထီၣ်အဃိ တၢ်ဒုးကဲထီၣ်၀ဲလၢခံခီခံကပၤအဘၢၣ်စၢၤအဂ့ၢ်န့ၣ် သုးက့ပှၤဘၣ်မူဘၣ်ဒါစံး၀ဲန့ၣ်လီၤ.
ပယီၤသုးအံၤလၢကဟဲမၤအါထီၣ်အသုးဂံၢ်ဘါလၢ(သုးက့ ၅) ကတၢတံၥ်သုးကလၢၤအံၤအဂီၢ် စးထီၣ်ဖဲလါအ့ဖြ့ၣ် ၆ သီ ဂီၤခီ အဆၢကတီၢ် ပယီၤသုးကျိၤဟဲထီၣ်အဃိတၢ်ဒုးကဲထီၣ်၀ဲဒီးဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ် အဘၢၣ်စၢၤဒီတနံၤကျၢၤအဂ့ၢ်န့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲန့ၣ်လီၤ.
အ၀ဲစံး၀ဲလၢ“ဖဲလါထီၣ်(၆)သီအနံၤန့ၣ် ပယီၤသုးကျိၤအံၤအိၣ်ဟဲထီၣ်၀ဲလၢ(သုးက့ ၁)ကၠါရၤခံတကပၤန့ၣ်. ဟဲနုၥ်လီၤလၢ(သုးက့ ၅)ဟီၣ်က၀ီၤပူၤဘျီတၢ်ဒုးကဲထီၣ်၀ဲဒီးတၢ်ပၢၢ်ဆၢသုးပၥ်ဖှိၣ်လၢအဟံန့ၢ်တၢ်ဘံၣ်တၢ်ဘၢဖဲန့ၣ်တဖၣ်ဒီတနံၤဃၣ်ဃၣ်လီၤ.တုၤလၢခဲအံၤန့ၣ်အ၀ဲသ့ၣ်တဂုၤလီၤက့ၤအသးဘၣ်တၢ်ဒုးတၢ်ယၤကဲထီၣ်ဒံး၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါအနံၤ န့ၣ်လီၤ.
တၢ်ဒုးကဲထီၣ်ဘျီ၀ဲအံၤန့ၣ် ခံခီခံကပၤတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ် တဒိးန့ၢ်ဘၣ်တၢ်ကစီၣ်ဒံးဘၣ်အသိး ပယီၤသုးကျိၤ လၢအဟဲထီၣ်တဖၣ်အံၤအနီၣ်ဂံၢ်ကအိၣ်လၢ(၇၀),(၈၀)ခိၣ်ဃၢၤဒီးဒ်န့ၣ်အသိးအ၀ဲသ့ၣ်အံၤ ဖဲအပူၤကွံၥ်လါမးရှး ၃ သီအနံၤ ဟဲထီၣ်တ့ၢ်၀ဲတဘျီလံဘၣ်ဆၣ်ခီဖျိဘၣ်သဂၢၢ်၀ဲဒီးတၢ်ပၢၢ်ဆၢကရူၢ်အဃိဂုၤက့ၤအလီၢ်ခံ၀ံၤဟဲထီၣ်ကဒါ၀ဲ ဒ်အံၤလီၤ အဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးအါထီၣ်၀ဲန့ၣ်လီၤ.
သုးကီၣ်ကးအံၤဖဲလါအ့ဖြ့ၣ် ၂ သီအနံၤန့ၣ် လၢတၢ်ကတိစၢၤမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် ဘိးဘၣ်ရၤလီၤ ၀ဲလၢကဆိကတီၢ်ဃၥ်၀ဲတၢ်ဒုးတစိၢ်တလီၢ်လၢအသီ(၂၀)အတီၢ်ပူၤအိၣ်၀ဲဘၣ်ဆၣ် မ့မ့ၢ်တခီသူ၀ဲဒၣ်ဒြိ,ကျိဖးဒိၣ်,ကဘီယူၤ ဟးခးလီၤတၢ်ဆူကလုၥ်ဒူၣ်တၢ်ပၢၢ်ဆၢကရူၢ်ကရၢတၢ်လီၢ်အါတီၤအပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤန့ၣ် (သုးက့ ၅) ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲလၢ“အ၀ဲသ့ၣ်ထုးထီၣ်တၢ်ကလုၢ်ဘိး ဘၣ် ရၤလီၤ၀ဲဒၣ်လၢဖဲတၢ်မၤ၀ဲဒၣ်တၢ်တစၢၤမၤစၢၤအကတီၢ်န့ၣ်ပတုၥ်ဃၥ်ဆိ၀ဲတၢ်ဒုးတၢ်ယၤ.ဘၣ်ဆၣ်အတဲ၀ဲတမံၤအမၤ၀ဲတမံၤလီၤ.တဲ၀ဲလၢပတုၥ်ဃၥ်တၢ်ဒုးဘၣ်ဆၣ်ဆှၢထီၣ်အသုးလၢကဟဲဟူးဂဲၤ၀ဲဒ်သိးသုးကျိၤတကးဘၣ်န့ၣ်ကဟဲမၤပှဲၤထီၣ်က့ၤအပှၤလၢအအိၣ်ဖဲကတၢတံၥ်တဖၣ်န့ၣ်မီၤနီၤ.သုးကီၣ်ကးမၤတၢ်န့ၣ်ပှၤနၥ်အီၣ်အီၤတဘူၣ်နၥ်အီၣ်အီၤတသ့နီဘျီဘၣ်မ့ၢ်လၢအ၀ဲနါက့မၤတၢ်တလီၤနၥ်နီဘျီဘၣ်.အဃိသုးမီၤစိရိၤအံၤအိၣ်ဒၣ်အမုၢ်နံၤမုၢ်သီကဘၣ်လၢၤလီၤ.အမုၢ်နံၤမုၢ်သီမ့တလၢၤဘၣ်န့ၣ်တၢ်ကသူၣ်ထီၣ်တၢ်မုၥ်တၢ်ခုၣ်န့ၣ်တၢ်သူၣ်ထီၣ်အီၤန့ၢ်၀ဲတသ့နီတဘျီဘၣ်ဒီးကမျၢၢ်န့ၣ်ကဘၣ်ကွၢ်ဆၢၣ်မဲၥ်ဒီးတၢ်ကီတၢ်ခဲတပယူၥ်ဃီလီၤ”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးတချုးသုးကီၣ်ကးဘိးဘၣ်ရၤလီၤလၢကပတုၥ်ဆိဃၥ်တၢ်ဒုးစှၤနၣ်ရံၣ်လါအ့ဖြ့ၣ် ၂ သီ ဟါခီ ၄း၀၀ အဆၢကတီၢ်န့ၣ် ခီဖျိအကဘီယူၤလဲၤခးလီၤတၢ်လၢ (သုးက့ ၅) ဒွဲၣ်လိကီၢ်ဆၣ် ကတၢၢ်တံၥ်-ကမၤမိၢ်ဘၢၣ်စၢၤ န့ၤကၤသ၀ီပူၤအဃိ ဖဲန့ၣ်ဖိသၣ် သံ၀ဲ(၂)ဂၤဒီးကမျၢၢ်ဘၣ်ဒိ(၃)ဂၤအကျါ ပၣ်ဃုၥ်၀ဲ ဖိသၣ်တဂၤကဲထီၣ်ဒံး၀ဲန့ၣ်လီၤ.
တကးဒံးဘၣ်လၢခ့ၣ်အဲၣ်ယူၣ်(သုးက့ ၄)ဘျံးဒ၀ဲၢ်ကီၢ်ရ့ၣ်အပူၤစ့ၢ်ကီး သုးကီၣ်ကးဘိးဘၣ်ရၤလီၤကပတုၥ်တၢ်ဒုးတစိၢ်တလီၢ်၀ံၤလီၢ် တုၤလၢမဟါအနံၤန့ၣ် ပယီၤသုးမၤအါအဂံၢ်အဘါ,သူ၀ဲဒြိ,ကျိဖးဒိၣ်,ကဘီယူၤဟးခးလီၤတၢ်အိၣ်၀ဲတလီၢ်လီၢ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
