လါမ့ၤ ၁၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ခီဖျိပယီၤသုးခးလီၤကျိဖးဒိၣ်,ကဘီယူၤလဲၤတ့ၢ်လီၤမ့ၣ်ပိၢ် တလီၢ်လီၢ်အဃိ ၀ီၢ်က့ကရူၢ်ပူၤကမျၢၢ်အဂၤ(၂၀၀၀)ဘျဲၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါ၀ဲဖဲလါမ့ၤ ၁၆ သီ တနံၤ အံၤန့ၣ်လီၤ.
ဒ်ခ့ၣ်အဲၣ်ယူၣ်(ဒူသထူၣ်ကီၢ်ရ့ၣ်)လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် ၀ီၢ်က့ကရူၢ်ပူၤတၢ်ဒုးကဲထီၣ်တအိၣ်ပယီၤသုးအံၤခးလီၤ၀ဲ ကျိဖးဒိၣ်တကးဒံးဘၣ်ကဘီယူၤစ့ၢ်ကီးလဲၤတ့ၢ်လီၤမ့ၣ်ပိၢ်တပယူၥ်အဃိ သ၀ီလၢအမ့ၢ်၀ီၢ်က့,ဘီကထၣ်,ထံပူၤပျီ,ကလီမၠီၤ, ရှါဆူၣ် ဒီးအညၤဆူၣ်သ၀ီ ဟံၣ်ခိၣ်(၆၅၄)ဖျၢၣ်, ပိၥ်မုၣ်(၁၄၃၈)ဂၤ,ပိၥ်ခွါ(၁၂၈၃)ဂၤ ပှၤနီၣ်ဂံၢ်ပၥ်ဖှိၣ်ခဲလၢၥ်(၂၇၂၁)ဂၤ ဘၣ်ဃ့ၢ်ထီၣ် ၀ဲဒၣ် န့ၣ်လီၤ.
လၢတၢ်န့ၣ်အဃိလၢလီၢ်က၀ီၤကမျၢၢ်သ့ၣ်တဖၣ်အံၤအဂီၢ်လိၣ်ဘၣ်၀ဲအိၣ်ဆိးလီၢ်ကျဲ,တၢ်အီၣ်တၢ်အီတၢ်ဆီၣ်ထွဲမၤစၢၤဒီး ကသံၣ်ကသီတၢ်အံးထွဲကွၢ်ထွဲသ့ၣ်တဖၣ်အဂ့ၢ်န့ၣ် ကီၢ်ရ့ၣ်တၢ်ထုးထီၣ်ပၥ်ဖျါအပူၤ ပၥ်ဖျါ၀ဲန့ၣ်လီၤ.
ကၠဲးထိၣ်ကီၢ်ဆၣ်လၢအိၣ်ဘူး၀ဲဒီးချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီးထံးကီၢ်ဆၣ်အံၤ တချုးတၢ်လဲၤထီၣ်ခးခီၣ်ချ့သုးရ့ၣ်(ခမရ-၅၉၈) ဒံးဘၣ်ဒီး တၢ်ထီၣ်န့ၢ်၀ံၤပၢၢ်တုၤလၢပယီၤသုးက့ၤထီၣ်ဆ့ၣ်နီၤအိၣ်တစုန့ၣ် ယီၤသုးကလၢၤအိၣ်ကီၢ်ဆၣ်၀ဲန့ၣ်ပူၤတဖၣ် ခးလီၤကျိဖးဒိၣ် လီၤတဲၥ်ပိၢ်ဖးထီၣ်၀ဲလၢ ခရၢၢ်ကရူၢ်ဒီး၀ီၢ်က့ကရူၢ်ဒူသ၀ီပူၤအိၣ်တလီၢ်လီၢ်အဃိ ကမျၢၢ်တဖၣ်ပျံၤတၢ်ဘၣ်ဃ့ၢ်ထီၣ် ၀ဲဒ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲလါမ့ၤ ၁၄ သီ ဂီၤခီ ၈း၂၀ မံးနံးအဆၢကတီၢ်တုၤလၢမုၢ်ထူၣ် ၁၁း၃၅ မံးနံးအဆၢကတီၢ်တစုန့ၣ် တၢ်ဒုးကဲထီၣ်တအိၣ် ပယီၤသုး(၃၁၀)အမျိၥ်သုးကလၢၤခးလီၤ၀ဲကျိဖးဒိၣ်(၇)ဖျၢၣ်အသိး စ့ၤသ၀ီ(ဆင်ရွာ)ပယီၤသုးလၢအိၣ်(သုးက့ ၃) ဆီထံးကီၢ်ဆၣ် အပူၤအံၤတဖၣ်ခးလီၤစ့ၢ်ကီး၀ဲ(၁၂၂ မမ)ကျိဖးဒိၣ် ၄ ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် စံး၀ဲန့ၣ်လီၤ.
တၢ်ကဲထီၣ်သး၀ံၤတကတီၢ်ဃီဖဲမုၢ်ထူၣ် ၁၁း၅၂ မံးနံးအဆၢကတီၢ်န့ၣ် ပယီၤသုးအ(Jetfighter)ကဘီယူၤ လဲၤတ့ၢ်လီၤ၀ဲ မ့ၣ်ပိၢ်လၢ(သုးက့ ၃) ဟီၣ်က၀ီၤပူၤ(၂)ဖျၢၣ်ဒီး ဖဲမုၢ်ထူၣ် ၁၂း၀၃ မံးနံးအဆၢကတီၢ်န့ၣ် ဟဲက့ၤတ့ၢ်လီၤ၀ဲမ့ၣ်ပိၢ်(၁)ဖျၢၣ်လၢ ကၠဲးထိၣ် ကီၢ်ဆၣ် ကၠီၣ်ဖၠၤကရူၢ် ပူၤန့ၣ်လီၤ.
ခီဖျိလၢကျိဖးဒိၣ်ဒီးကဘီယူၤအံၤအဃိ စးထီၣ်ဖဲအပူၤကွံၥ်လါအ့ဖြ့ၣ် ၂၄ သီ တုၤလၢတလါအံၤလါမ့ၤ ၁၄ သီအနံၤ ကမျၢၢ်ဘၣ်ဒိ ဘၣ်ထံးအမဲၥ်ညါဟံၣ်အူအီၣ်ဘၣ်ဒိဘၣ်ထံး,ရီဘၢၣ်ထူၣ်ဒီးတၢ်ထူၣ်တၢ်ဘိလၢအဂၤတဖၣ်ဘၣ်ဒိဘၣ်ထံးဟးဂီၤ၀ဲဒၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.
