လါအ့ဖြ့ၣ် ၁၇ သီ, ၂၀၂၅ နံၣ်, ခ့ၣ်အဲးစံၣ်
ဖဲတနံၤလါအ့ဖြ့ၣ် ၁၇ သီ ကီၢ်ပယီၤနံၣ်ထီၣ်တသီ မုၢ်ထူၣ်အဆၢကတီၢ်န့ၣ် ပယီၤသုးအကဘီယူၤလဲၤတ့ၢ်လီၤ၀ဲ မ့ၣ်ပိၢ်လၢ ခ့ၣ်အဲၣ်ယူၣ်-ကညီဒီ ကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် သ၀ီခံဖျၢၣ်ပူၤအဃိ ကၠိဒီးဟံၣ်ဟးဂီၤ၀ဲ အဂ့ၢ်န့ၣ် ကီၢ်ဆၣ်ပှၤဘၣ် မူဘၣ်ဒါစံး၀ဲန့ၣ်လီၤ.
ဖဲတနံၤအံၤမုၢ်ထူၣ် ၁၂ နံၣ်ရံၣ်ဃၣ်ဃၣ်အဆၢကတီၢ်န့ၣ် သုးကီၣ်ကအကဘီယူၤလဲၤတ့ၢ် လီၤ၀ဲမ့ၣ်ပိၢ်(၄)ဖျၢၣ် လီၤတဲၥ်ပိၢ်ဖးထီၣ်၀ဲ လၢ ကၠဲၣ်သလဲၣ်သ၀ီ ပူၤ(၂)ဖျၢၣ်ဒီး ဃိၣ်သၢဆံသ၀ီအပူၤ(၂)ဖျၢၣ်န့ၣ်လီၤ.
ခီဖျိလၢကျိဖးဒိၣ်အံၤအဃိ ကၠဲၣ်သလဲၣ်သ၀ီပူၤ ကၠိတၢ်သူၣ်ထီၣ်အပဲတြီ,အခိၣ်အကပိၤကပၤဟးဂီၤ၀ဲဒီး မ့မ့ၢ်လၢဃိၣ်သၢဆံ သ၀ီအံၤခီန့ၣ် ကမျၢၢ်အဟံၣ်လီၤပှီၢ်ဟးဂီၤတဖျၢၣ်,သိလ့ၣ်ဟးဂီၤ၀ဲ(၁)ခိၣ်ဘၣ်ဆၣ်ကမျၢၢ်တၢ်သံတၢ်ဘၣ်ဒိ ဘၣ်ထံးတအိၣ်၀ဲဘၣ် အဂ့ၢ်န့ၣ် ကီးတရံးကီၢ်ဆၣ်ခိၣ် ပဒိၣ်စီၤဖၣ်ထယါ စံး၀ဲန့ၣ်လီၤ.
အ၀ဲစံး၀ဲလၢ“တနံၤညါအံၤဖဲမုၢ်ထူၣ်ထီၣ်န့ၣ်ကဘီယူၤဟဲကွံၥ်လီၤ၀ဲလၢ ကၠဲးသလဲးသ၀ီပူၤ,လီၤတဲၥ်လၢကၠိဃၢၤန့ၣ်တဖျၢၣ်. ဒီးလၢဃိၣ်သၢဆံသ၀ီနါက့လီၤတဲၥ်ဘၣ်၀ဲပှၤဟံၣ်တဖျၢၣ်,ဒီးကါတခိၣ်.ဟံၣ်တဖျၢၣ်န့ၣ်လီၤကရဲခဲလၢၥ်လီၤ.ပှၤကညီဒုတၢ်ဘၣ်ဒိဘၣ်ထံးတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲမုၢ်ဃ့ၢ်လီၤအံၤ န့ၣ်လီၤ.
စးထီၣ်ဖဲလါအ့ဖြ့ၣ် ၁၄ သီအနံၤန့ၣ် လၢကြုၢ်တုအခိၣ်အဃၢၤန့ၣ်တၢ်ဒုးကဲထီၣ်တဘျုးတီၤဒီး သုးကီၣ်ကးအံၤခီဖျိခးလီၤကျိဖးဒိၣ်, ကဘီယူၤစ့ၢ်ကီးလဲၤခးလီၤတၢ်တပူယူၥ်ဃီအဃိ ကမျၢၢ်လၢအိၣ်တၢ်ကဲထီၣ်သးအခိၣ်အဃၢၤ တဖၣ်ဃ့ၢ်ထီၣ်၀ဲန့ၣ်လီၤ.
လၢန့ၣ်အမဲၥ်ညါတနံၤအံၤ လၢကီးတရံး-ကြုၢ်တုကျဲဒီတကျိၤခီဖျိပယီၤသုးကဘီယူၤဟဲခးလီၤတၢ်ဟဲအါထီၣ်အဃိ ဒူသ၀ီကမျၢၢ်လၢအိၣ်ဘူး ကျဲမုၢ်ဒီတကျိၤအံၤအကပိၤကပၤတဖၣ်ဃ့ၢ်ထီၣ်၀ဲရုၢ်ရုၢ်အဂ့ၢ်န့ၣ် ပဒိၣ်စီၤဖၣ်ထယါ စံးအါထီၣ်၀ဲန့ၣ်လီၤ.
“သ၀ီလၢအိၣ်ဘူးဒီးကြုၢ်တု-ကီးတရံးကျဲမုၢ်ဃၢၤတဖၣ်န့ၣ်ခဲအံၤစံၣ်ထီၣ်၀ဲရုၢ်ရုၢ်လီၤ.မဟါနါက့ကဘီယူၤဟဲကွံၥ်လီၤ တၢ်. တနံၤအံၤကဘီယူၤဟဲကွံၥ်လီၤတၢ်အါထီၣ်ကဒီးဘျီကမျၢၢ်တဖၣ်စံၣ်ထီၣ်၀ဲလၢယံၤဒီးကျဲမုၢ်န့ၣ်”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးဖဲတနံၤအံၤဂီၤခီအဆၢကတီၢ်စ့ၢ်ကီး ခီဖျိကဘီယူၤလဲၤတ့ၢ်လီၤမ့ၣ်ပိၢ်လီၤတဲၥ်ပိၢ်ဖးထီၣ်၀ဲလၢသယဲၣ်တီသ၀ီပူၤအဃိ သ၀ီဖိသံ၀ဲ(၁)ဂၤဒီးဘၣ်ဒိ(၂)ဂၤကဲထီၣ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်တါလီၤအကတီၢ်တုၤလၢတနံၤအံၤဖဲလါအ့ဖြ့ၣ် ၁၇ သီ နံၣ်ထီၣ်တသီအံၤ ခီဖျိလၢကျိဖးဒိၣ်ဒီးကဘီယူၤအံၤအဃိ ကြုၢ်တု ဒီး ကီးတရံးကီၢ်ဆၣ်ပူၤ ကမျၢၢ်သံ၀ဲ(၈)ဂၤ, ဘၣ်ဒိ(၂၂)ဂၤ ဒီး သီခါဖၠၣ်,ကၠိ,ဟံၣ်တၢ်သူၣ်ထီၣ်လီၤပှီၢ်ဟးဂီၤ၀ဲဒၣ်န့ၣ်လီၤ. ဒီးပှၤလၢအသံဘၣ်ဒိဘၣ်ထံးတဖၣ်အကျါပၣ်ဃုၥ်စ့ၢ်ကီး၀ဲဖိဒံဖိသၣ်,ပှၤမိၢ်ဒၢဒီးသီခါ,တပွဲသ့ၣ်တဖၣ်န့ၣ်လီၤ.
တကီၢ်ခါလီၢ်ခံကတၢၢ်တၢ်အိၣ်သးခဲအံၤ လၢကီးတရံး-ကြုၢ်တုကျဲအဘၢၣ်စၢၤန့ၣ် တၢ်ဒုးဆူၣ်ထီၣ်၀ဲလၢဟီၣ်က၀ီၤ ကညီဒီကလုၥ် တၢ်ထူၣ်ဖျဲး သုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ် လီၤ.
