လါအ့ဖြ့ၣ် ၁၆ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ်အပူၤ တနံၤအံၤခီဖျိပယီၤသုးကဘီယူၤလဲၤတ့ၢ်လီၤကဒီးမ့ၣ်ပိၢ်အဃိ ကမၤရဲၣ်သ၀ီဖိ ပှၤမိၢ်ဒၢသံ၀ဲ(၁)ဂၤဒီး ဘၣ်ဒိ(၄)ဂၤအဂ့ၢ်န့ၣ် မိၣ်တၢ်ထူၣ်ဖျဲးသုးမုၢ်ဒိၣ်(Mon Liberation Army))ထုးထီၣ်ပၥ်ဖျါ၀ဲ ဖဲတစိၢ်ဖိဒံးအခါန့ၣ်လီၤ.
ဖဲတနံၤလါအ့ဖြ့ၣ် ၁၆ သီ တါက့ၤထီၣ်ကဘၣ်ဖဲမုၢ်ဃ့ၢ်လီၤ ၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးကဘီယူၤ(Y-12) လဲၤတ့ၢ်လီၤ၀ဲမ့ၣ်ပိၢ်လၢကမရဲၣ်သ၀ီပူၤအဃိ မၣ်န့အူ(၃၇)နံၣ်လၢအိၣ်ဒီးအဟုးအသးအံၤသံ၀ဲတဘျီဃီလၢ တၢ်ကဲထီၣ်သးအလီၢ်န့ၣ်လီၤ.
လၢန့ၣ်အမဲၥ်ညါကျိဖးဒိၣ်အံၤအဃိ ကမျၢၢ်ဘၣ်ဒိ(၄)ဂၤအကျါပၣ်ဃုၥ်၀ဲဖိသၣ်(၂)ဂၤလၢအမ့ၢ် သဲပိလ့(၇)နံၣ်ဒီး သဲမၠၣ်နိ(၉)နံၣ် သ့ၣ်တဖၣ်အံၤအဂ့ၢ်န့ၣ် မိၣ်တၢ်ထူၣ်ဖျဲးသုးမုၢ်ဒိၣ် (Mon Liberation Army)လံၥ်တၢ်ပၥ်ဖျါပူၤ အသိးသ့ၣ်ညါဘၣ်န့ၣ်လီၤ.
သုးကီၣ်ကးအံၤစှၤသီအတီၢ်ပူၤအံၤခီဖျိအ၀ဲသ့ၣ်ခးလီၤကျိဖးဒိၣ်တကးဒံးဘၣ်အမဲၥ်ညါသူ၀ဲဒၣ်ကဘီယူၤဟးတ့ၢ်လီၤမ့ၣ်ပိၢ် ကဲထီၣ်ကိးမုၢ်နံၤဃၣ်ဃၣ်အဃိ လီၢ်က၀ီၤကမျၢၢ်ထံဖိကီၢ်ဖိတဖၣ်ကအိၣ်လၢတၢ်ပလီၢ်ပဒီပူၤအဂ့ၢ်န့ၣ် (Mon Liberation Army) ဟ့ၣ်ပလီၢ်၀ဲဒၣ်န့ၣ်လီၤ.
ဒ်န့ၣ်အသိးဖဲမဟါလါအ့ဖြ့ၣ် ၁၅ သီ မုၢ်ထူၣ်အဆၢကတီၢ်န့ၣ်စ့ၢ်ကီး တၢ်ဒုးကဲထီၣ်တအိၣ်လၢကါနံၤသ၀ီ သီခါဖၠၣ်ကရၢၢ်အပူၤ သုးကီၣ်ကးအကဘီယူၤလဲၤတ့ၢ်လီၤမ့ၣ်ပိၢ်လၢအဃိ ကမျၢၢ်သံ(၆)ဂၤအကျါပၣ်ဃုၥ်ဖိသၣ်(၃)ဂၤအသိး ပှၤဘၣ်ဒိ(၁၆)ဂၤအကျါ စ့ၢ်ကီးပၣ်ဃုၥ်၀ဲသီခါဒီးတပွဲခဲလၢၥ်(၁၁)ပါအဂ့ၢ်န့ၣ် (KPSN)ထုးထီၣ်ပၥ်ဖျါ၀ဲဖဲတနံၤအံၤန့ၣ်လီၤ.
ကြုၢ်တုကီၢ်ဆၣ်အပူၤ စးထီၣ်ဖဲလါအ့ဖြ့ၣ် ၁၄ သီအနံၤန့ၣ် တၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်လၢဟီၣ်က၀ီၤတၢ်ပၢၢ်ဆၢသုးပၥ်ဖှိၣ်ကရူၢ်ဒီး ပယီၤသုးအဘၢၣ်စၢၤန့ၣ်လီၤ.ခီဖျိတၢ်ဒုးကဲထီၣ်အံၤအဃိပယီၤသုးကလၢၤလၢအိၣ်ဘူးဖဲန့ၣ်တဖၣ်က့ၤခးလီၤကဒါကျိဖးဒိၣ်, ကဘီယူၤစ့ၢ်ကီးလဲၤခးလီၤတၢ်အဃိကမျၢၢ်ဃ့ၢ်ထီၣ်ဒီးတၢ်သံဘၣ်ဒိဘၣ်ထံးဘၣ်ဟဲကဲထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်တၢ်လီၢ်လၢသုးကီၣ်ကးအကဘီယူၤလဲၤတ့ၢ်လီၤတၢ်ဖဲမဟါဒီးတနံၤအံၤသ့ၣ်တဖၣ်န့ၣ် တမ့ၢ်လၢတၢ်ဒုးတၢ်ယၤ ကဲထီၣ် အိၣ်၀ဲဘၣ်ဒီးဒ်န့ၣ်အသိးအတၢ်ဟဲခးလီၤတၢ်အံၤအတၢ်ပညိၣ်အိၣ်လိၤလိၤလၢကမျၢၢ်ထံဖိကီၢ်ဖိဒီးတၢ်ဘူၣ်တၢ်ဘါတၢ်သူၣ်ထီၣ်သ့ၣ်တဖၣ်လီၤအဂ့ၢ်န့ၣ် ကမျၢၢ်တနီၤပဲၥ်ထံနီၤဖးစံး၀ဲအိၣ်န့ၣ်လီၤ.
