လါအ့ဖြ့ၣ် ၂၃သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်,ကံၢ်မဲဝ့ၢ်(CanelRoad)ကျဲတၢ်သမံသမိးတၢ်အိၣ်ခိးတြဲၤအပူၤကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါတဖၣ်ဖီၣ်ချူးဝဲကျိချံပှၥ်သၣ်စုကဝဲၤတၢ်ပီးတၢ်လီတဖၣ်အဖီခိၣ်,ဘၣ်ဃးဒီးတၢ်ဖီၣ်န့ၢ်ဝဲစုကဝဲၤကျိချံပှၥ်သၣ်ဒီးတၢ်ပီးတၢ်လီတဖၣ်အတၢ်ဂ့ၢ်အံၤတဘၣ်ဃး(KNU)ဘၣ်အဂ့ၢ်,ကညီဒီကလုၥ်ဂၢၤသးကရၢ(KNDO)ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
မဟါလါအ့ဖြ့ၣ်(၂၂)သီမုၢ်ဃ့ၢ်လီၤအဆၢကတီၢ်,ကၠီၣ်တဲၣ်ပၢၤကီၢ်ပှၤဘၣ်မူဘၣ်ဒါတဖၣ်ဖီၣ်ချူးဝဲကျိချံပှၥ်သၣ်လၢ(တိယိၣ်တၣ်)သိလ့ၣ်အသူတခိၣ်,လၢကၠီၣ်တဲၣ်ထံဖိကီၢ်ဖိ(၂)ဂၤဒိးဝဲဒီးကျိချံပှၥ်သၣ်လၢတၢ်ဖီၣ်ချူးဝဲသ့ၣ်တဖၣ်အံၤတၢ်ကဆှၢဝဲဆူကညီဒီကလုၥ်စၢဖှိၣ်ကရၢ(KNU)အစုပူၤအဂ့ၢ်,(ThaiPBS)ကၠီၣ်တဲၣ်တၢ်ကစီၣ်သန့ပၥ်ဖျါဝဲဒၣ်န့ၣ်လီၤ.
လၢတၢ်န့ၣ်အဃိ,ဘၣ်ဃးဒီးတၢ်ဖီၣ်ချူးဝဲစုကဝဲၤသ့ၣ်တဖၣ်အံၤအဖီခိၣ်,(KNDO)သုးရိၢ်မဲခိၣ်ကျၢၢ်(သုးခိၣ်ကျၢၢ်ဖိစီၤရှံလ့ၣ်)စံးဝဲဒၣ်ဒ်အံၤန့ၣ်လီၤ.
“ခ့ၣ်အဲၣ်ယူၣ်ဒုတၢ်ဒုးတၢ်ယၤအဖီခိၣ်,ကဘၣ်ကွၢ်ဆၢၣ်မဲၥ်ဒီးဒုၣ်ဒါအဖီခိၣ်စုကဝဲၤကျိချံပှၥ်သၣ်တၢ်လိၣ်ဘၣ်အဖီခိၣ်ပှၤကဟဲမၤစၢၤဒီးဟဲဆါလၢဖိးမံသဲစးတအိၣ်ဘၣ်.နါက့ပှၤမ့ဃုကျဲဟဲစိၥ်ဆါန့ၢ်ပှၤဒုပပှ့ၤလီၤ.မ့မ့ၢ်လၢပကဘၣ်လဲၤနုၥ်လီၤပှ့ၤလၢပှၤထံပှၤကီၢ်ပူၤတခီန့ၣ်တအိၣ်ဘၣ်.ပလဲၤတဖျိက့ၤတဖျိဘၣ်.အဃိန့ၣ်ပှၤလၢတၢ်ဖီၣ်ချူးတဖၣ်အံၤတခီန့ၣ်ကမ့ၢ်ဒၣ်ကဆှၢဝဲတၢ်သ့ၣ်တဖၣ်အံၤဆူထံဆၢကီၢ်ဆၢလီၤ.ဘၣ်သ့ၣ်သ့ၣ်လၢခ့ၣ်အဲၣ်ယူၣ်အိၣ်သ့ဒီးကရံၣ်နံၣ်အိၣ်စ့ၢ်ကီးသ့ဝဲလီၤ.မ့ၢ်ဟဲစိၥ်ဆါန့ၢ်ပှၤဒုပပှ့ၤအီၤန့ၣ်အိၣ်ဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
တကတီၢ်ဃီ,ကၠီၣ်တဲၣ်ထံဖိကီၢ်ဖိလၢတၢ်ဖီၣ်ချူးဝဲ(၂)ဂၤအံၤဒ်ပၢၤကီၢ်တၢ်သမံသမိးအသိးစံးဝဲလၢဒိးန့ၢ်ဘၣ်ဝဲတၢ်ဝံစိၥ်တီဆှၢအလဲလၢစ့ယိၤ(၈)ကထိဘးတုၤ(၉)ကထိဘးအဘၢၣ်စၢၤအိၣ်ဝဲအဂ့ၢ်,သ့ၣ်ညါဘၣ်ဒ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး,တၢ်ဆှၢဝဲစုကဝဲၤအံၤမ့ၢ်ဝဲ(၃)ဘျီတဘျီဒီးကျိချံပှၥ်သၣ်ဒီးစုကဝဲၤလၢကၠီၣ်တဲၣ်ပၢၤကီၢ်ဖီၣ်န့ၢ်ဝဲဖဲကံၢ်မဲသ့ၣ်တဖၣ်အံၤမ့ၢ်ဝဲ,(၅.၅၆မမ)(M16)ရဲၣ်ဖၢၣ်,ကျိဆၣ်ဒၢအခိၣ်(၁၀)ဃုၥ်ဒီး(M79)လီၣ်ခၠၣ်(၁၄)ခိၣ်အဂ့ၢ်,သ့ၣ်ညါဘၣ်ဒ်ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါဝဲဒၣ်အသိးန့ၣ်လီၤ.
