ကီၢ်ပယီၤပူၤဟီၣ်ခိၣ်ဟူးအံၤအဃိ ကမျၢၢ်ထံဖိကီၢ်ဖိသံ(၃၅၀၀)ဘျဲၣ်ဒီးဘၣ်ဒိ(၄၆၀၀)ဘျဲၣ်

လါအ့ဖြ့ၣ် ၉ သီ, ၂၀၂၅ နံၣ်, ခ့ၣ်အဲးစံၣ်

ကီၢ်ပယီၤအပူၤအပူၤ ခီဖျိလၢဟီၣ်ခိၣ်ဟူးအံၤအဃိ ကမျၢၢ်ထံဖိကီၢ်ဖိသံ၀ဲ (၃၅၀၀)ဘျဲၣ်ဒီး ဘၣ်ဒိ၀ဲခဲလၢၥ်(၄၆၀၀)ဘျဲၣ်အဂ့ၢ်န့ၣ် ဒီကလုၥ်ဃူဖိးပဒိၣ်(NUG)ထုးထီၣ်ပၥ်ဖျါ၀ဲဖဲလါအ့ဖြ့ၣ် ၇ သီအနံၤန့ၣ်လီၤ.

ဖဲအပူၤကွံၥ်လါမးရှး ၂၈ သီ မုၢ်ဃ့ၢ်လီၤ ၁း၂၀ ဘျဲၣ်အဆၢကတီၢ်န့ၣ် ဟီၣ်ခိၣ်ဟူးကဲထီၣ်၀ဲဒိၣ်ဒိၣ်မုၢ်မုၢ်လၢကီၢ်ပယီၤ ဒီး ကီၢ်ကၠီၣ်တဲၣ် တၢ်လီၢ်အါတီၤအပူၤန့ၣ်လီၤ. ဘၣ်ဆၣ်ခီဖျိလၢဟီၣ်ခိၣ်ဟူးအံၤအဃိ စကဲ,မါတလ့, န့ၣ်ပၠံၣ်ဒီၣ်,ပကိ, ယိၤဒိၣ်ကလံၤ ထံး ဟီၣ်က၀ီၤပူၤတၢ်လီၢ်တဖၣ်သဂၢၢ်ဘၣ်၀ဲတၢ်သံတၢ်ပှၢ်တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအါမးအဂ့ၢ်န့ၣ် လံၥ်တၢ်ပၥ်ဖျါအပူၤ စံး၀ဲန့ၣ်လီၤ

ဒ်(NUG)လံၥ်တၢ်ပၥ်ဖျါပူၤပၥ်ဖျါ၀ဲအသိးန့ၣ် စးထီၣ်လၢဟီၣ်ခိၣ်ဟူးကဲထီၣ်တုၤလၢလါအ့ဖြ့ၣ် ၇ သီအနံၤန့ၣ် ခီဖျိဟီၣ်ခိၣ်ဟူး အံၤအဃိ ကမျၢၢ်ထံဖိကီၢ်ဖိသံ၀ဲ(၃,၅၅၀)ဂၤ, ဘၣ်ဒိဘၣ်ထံးပၥ်ဖှိၣ်ခဲလၢၥ်(၄,၆၈၉)ဂၤအမဲၥ်ညါ ဟံၣ်(၃၂,၃၆၈)ဖျၢၣ်, တၢ်ဘူၣ် တၢ်ဘါ တၢ်သူၣ်ထီၣ်လၢအပၣ်ဃုၥ်၀ဲသီခါဖၠၣ်တၢ်သူၣ်ထီၣ်,ပလံၤ,ဃိၣ်အံၤတဖၣ်ဟးဂီၤ၀ဲခဲလၢၥ် (၅,၃၂၄)ဖျၢၣ်ဒီး ကၠိလီၤပှီၢ် ဟးဂီၤ၀ဲ(၅၅၄)ဖျၢၣ် န့ၣ်လီၤ.

တကးဒံးဘၣ်လၢန့ၣ်အမဲၥ်ညါဂံၢ်ခီၣ်ထံးတၢ်သူၣ်ထီၣ်လီၤပှီၢ်ဟးဂီၤ၀ဲ(၄,၆၀၃)ခါ တၢ်သ့ၣ်တဖၣ်န့ၣ်မ့ၢ်၀ဲ ရူ,တၢ်ဆါဟံၣ်, စ့တၢး တၢ်သူၣ်ထီၣ်ဒီးကျဲ,တိၤသ့ၣ်တဖၣ်အသိး တုၤလၢခဲအံၤကမျၢၢ်လၢအလီၤမၢ်တၢ်တထံၣ်ဒံး၀ဲဘၣ်အိၣ်တ့ၢ်ဒံး(၂၂၀)ဂၤဒီး ကမျၢၢ်လၢ ဘၣ်ကွၢ်ဆၢၣ်မဲၥ်ဟီၣ်ခိၣ်ဟူးတၢ်ကီတၢ်ခဲအံၤပၥ်ဖှိၣ်ခဲလၢၥ် အိၣ်၀ဲ (၃,၂၉၂,၉၉၄)ဂၤဒီး အဂ့ၢ်န့ၣ် စံး၀ဲန့ၣ်လီၤ.

လၢဟီၣ်ခိၣ်အံၤအတီၢ်ပူၤတၢ်သံတၢ်ဘၣ်ဒိဘၣ်ထံးတၢ်ဟူးဂူၥ်ဟးဂီၤအိၣ်၀ဲတၢ်လီၢ်အါတီၤဘၣ်ဆၣ် တၢ်လီၢ်တနီၤန့ၣ်တုၤလၢခဲအံၤ (ကယ်ဆယ်ရေး)ကရူၢ်ကရၢလဲၤနုၥ်လီၤမၤဆှဲလဲတၢ်လီၢ်တအိၣ်ဒံးဘၣ်စ့ၢ်ကီးအိၣ်၀ဲဒၣ်အဂ့ၢ်န့ၣ် တၢ်ကစီၣ်သန့တနီၤ ပၥ်ဖျါထီၣ်၀ဲ အိၣ်န့ၣ်လီၤ.

ဒ်န့ၣ်အသိးလၢဟီၣ်ခိၣ်ဟူးပှၤဘၣ်ကီဘၣ်ခဲဖိအဂီၢ်သုးကီၣ်ကးတကပၤ ကဆီလီၤပၥ်လီၤလီၢ်အိၣ်ကဒုလီၢ်လီၤလီၤဆီဆီစ့ၢ်ကီး တအိၣ်၀ဲဘၣ်အသိး တၢ်ဆီၣ်ထွဲမၤစၢၤလၢထံဂုၤကီၢ်ဂၤဆှၢလီၤ၀ဲလၢသုးကီၣ်ကးအစုပူၤအိၣ်၀ဲဒၣ်အါအါဂီၢ်ဂီၢ်ဘၣ်ဆၣ် တတုၤဃီၤ ၀ဲဆူကမျၢၢ်အစုပူၤတအိၣ်ဘၣ်အဂ့ၢ်န့ၣ် ကရူၢ်လၢအအိၣ်ခိးကွၢ်ဟုၣ်ကွၢ်ဆူၣ်သုးကီၣ်ကးဒီး ပှၤတူၢ်ဘၣ်တၢ်ဖိတဖၣ် စံးဘၣ် တၢ်ကစီၣ်သန့အသိးသၣ်ညါဘၣ်န့ၣ်လီၤ.

တကီၢ်ခါခဲအံၤတၢ်သူၣ်ထီၣ်လၢအလီၤပှီၢ်တဖၣ်(ကယ်ဆယ်ရေး)ကရူၢ်ကရၢမၤဆှဲလဲက့ၤ၀ဲတနီၤလံအသိး တၢ်မၤဆှဲလဲတ၀ံၤ တတဲၥ်ဒံးဘၣ်စ့ၢ်ကီးအိၣ်ဒံး၀ဲန့ၣ်လီၤ.ဘၣ်ဆၣ်တုၤလၢခဲအံၤကမျၢၢ်လၢအဟံၣ်အဃီဟးဂီၤတဖၣ်ထံၣ်ဘၣ်တၢ်ကီတၢ်ခဲ ဘၣ်အိၣ်ဘၣ်မံဒံး၀ဲလၢကျဲကပၤအိၣ်ဒံး၀ဲန့ၣ်လီၤ.

ဒ်န့ၣ်အသိးဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အံၤခီဖျိအ၀ဲသ့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤလၢလၢပှဲၤပှဲၤဘၣ်အိၣ်၀ဲအဖီခိၣ် ခါဆူညါလၢကအီၣ်ကအီ,ကအိၣ်ကဆိး,ဆူၣ်ချ့တၢ်အံးထွဲကွၢ်ထွဲဒီး တၢ်ကက့ၤသူၣ်ထီၣ်ဆီလီၤက့ၤသးအဂီၢ် တုၤလၢခဲအံၤ လိၣ်ဘၣ်ဒံး၀ဲတၢ်ဆီၣ်ထွဲမၤစၢၤအဖၢမုၢ်န့ၣ်လီၤ.