လါအ့ဖြ့ၣ် ၂၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဖွ့ဖူကၢ်ကရူၢ်အပူၤ ခံသီတပယူၥ်ဃီပယီၤသုးကဘီယူၤ လဲၤတ့ၢ်လီၤ မ့ၣ်ပိၢ်(၃)ဖျၢၣ်အဃိ ရီဘၢၣ်ထူၣ်ဟးဂီၤ၀ဲအါမးအသိးကမျၢၢ်စ့ၢ်ကီးဘၣ်အိၣ်လၢတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် သ့ၣ်ညါဘၣ်လၢ လီၢ်က၀ီၤပှၤဘၣ်မူဘၣ်ဒါအအိၣ်န့ၣ်လီၤ.
ဖွ့ဖူကၢ်ကရူၢ်အပူၤ ဖဲလါအ့ဖြ့ၣ် ၂၇ သီ မုၢ်နၤခီ ၁၀ အဆၢကတီၢ်န့ၣ် လၢဖွ့ဖူကၢ်ကရူၢ်ပူၤ ပယီၤသုးကဘီယူၤလဲၤတ့ၢ်လီၤမ့ၣ်ပိၢ် တဖျၢၣ်လီၤ တဲၥ်ပိၢ်ဖးထီၣ်၀ဲလၢစွ့ၣ်ကဲယိ(ရွှေခဲရိုး)သ၀ီဃၢၤ အူ၀့ထိအရီဘၢၣ်ကျီးပူၤအဃိ ရီဘၢၣ်ထူၣ်ကၢ်လီၤဟးဂီၤ၀ဲအထူၣ် (၁၀၀) ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ကဲထီၣ်သး၀ံၤဖဲမုၢ်ဆ့ၣ်ထီၣ်မဟါလါအ့ဖြ့ၣ် ၂၈ သီဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးကဘီယူၤ လဲၤတ့ၢ်လီၤကဒီး၀ဲပီၣ်(၃၀၀)မ့ၣ်ပိၢ် ၂ ဖျၢၣ် လီၤတဲၥ်ပိၢ်ဖးထီၣ်၀ဲလၢထံပူၤ၀ါသ၀ီဃၢၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါလၢ တအဲၣ်ဒိးပၥ်ဖျါအမံၤတဂၤစံး၀ဲဒ်အံၤန့ၣ်လီၤ.
“ဖဲ ၂၇ သီအခါန့ၣ် မုၢ်နၤခီ ၁၀ နၣ်ရံၣ်န့ၣ် ဟဲတ့ၢ်လီၤ၀ဲပီၣ်(၃၀၀)မ့ၣ်ပိၢ်တဖျၢၣ်.၀ံၤဒီးဖဲမဟါဂီၤခီ ၁၀ နၣ်ရံၣ်န့ၣ်ခးလီၤကဒီး၀ဲ ပီၣ်(၃၀၀)ခံဖျၢၣ်. ကွံၥ်လီၤ၀ဲတဘျီဃီလီၤ.အလီၤတဲၥ်ပိၢ်ဖးထီၣ်လၢထံပူၤ၀ါသ၀ီကပၤန့ၣ်, ကဘီယူၤဟဲခးလီၤတၢ်ခံသီ ဆဲးတဲးလီၤ .”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးတနံၤဃီဖဲ ၂၇ သီအနံၤတချုးပယီၤသုးကဘီယူၤလဲၤတ့ၢ်လီၤမ့ၣ်ပိၢ်ဒံးဘၣ်အခါဖဲဟါခီ ၄း၃၀ အဆၢကတီၢ်န့ၣ် တၢ်ဒုးကဲထီၣ်တအိၣ် သုးကီၣ်ကး(၃၁၀)အမျိၥ်သုးခးလီၤ၀ဲကျိဖးဒိၣ်(၄)ဖျၢၣ် လီၤတဲၥ်ပိၢ်ဖးထီၣ်၀ဲလၢခရၢၢ်ကရူၢ် ဒူသ၀ီပူၤဒီး တၢ်ဖံးအီမၤအီၣ်လီၢ်ကျီးပူၤ အဂ့ၢ်န့ၣ် လီၢ်က၀ီၤဘၣ်မူဘၣ်ဒါစံး၀ဲန့ၣ်လီၤ.
ပယီၤသုးအံၤတၢ်ဒုးကဲထီၣ်တအိၣ်ဘၣ်ဆၣ်ခီဖျိခးလီၤကျိဖးဒိၣ်ဒီးကဘီယူၤလဲၤခးလီၤတၢ်အဃိ ဒူသ၀ီကမျၢၢ်လၢအိၣ်ဘူးဖဲ တၢ်ကဲထီၣ်သးအခိၣ်အဃၢၤအံၤတဖၣ်ပျံၤတၢ်ဖုးတၢ်တကးဒံးဘၣ်စှၤသီအတီၢ်ပူၤအံၤလီၢ်က၀ီၤဖဲန့ၣ်အပူၤ ပယီၤသုးခးလီၤ ကျိဖးဒိၣ်ကဲထီၣ်တလီၢ်လီၢ်အဃိကမျၢၢ်တဖၣ်ဘၣ်လဲၤက့ၤဖံးမၤလၢတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢတၢ်ကဆဲးတိစၢၤမၤစၢၤဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် လၢအသီ(၂၀)အတီၢ်ပူၤ တၢ်ပတုၥ်တၢ်ခး တစိၢ်တလီၢ် လၢသုးကီၣ်ကးထုးထီၣ်ဘိးဘၣ်ရၤလီၤ၀ဲဖဲလါအ့ဖြ့ၣ် ၂ သီအနံၤအံၤ ခီဖျိမုၢ်နံၤမုၢ်သီလၢၤအဃိ မၤအါထီၣ်ကဒီး၀ဲ တၢ်ပတုၥ်တၢ်ခး တုၤလၢခဲမုၢ်ဆ့ၣ်လါလၢၥ် ၃၀ သီန့ၣ်လီၤ.
ဘၣ်ဆၣ်စးထီၣ်လၢသုးကီၣ်ကးထုးထီၣ်ဘိးဘၣ်ရၤလီၤလၢကပတုၥ်တၢ်ခးဒီတကတီၢ်အပူၤန့ၣ် လၢပျီပူၤမ့ၢ်ဂ့ၤ,ကလံၤကျါမ့ၢ်ဂ့ၤ မၤ၀ဲဒုးယၤတၢ်ဟူးတၢ်ဂဲၤတပယူၥ်ဃီတုၤလၢခဲအံၤန့ၣ်လီၤ.
ဒ်ခ့ၣ်အဲၣ်ယူၣ်ထုးထီၣ်ပၥ်ဖျါ၀ဲဖဲလါအ့ဖြ့ၣ် ၂၆ သီနံၤအသိးန့ၣ် စးထီၣ်လါအ့ဖြ့ၣ် ၂ သီတုၤ ၂၂ သီ သုးကီၣ်ကးအတၢ်ပတုၥ်တၢ်ခး လၢအသီ(၂၀)အတီၢ်ပူၤအံၤ ပယီၤသုးခးလီၤကျိဖးဒိၣ်,ကဘီယူၤလဲၤခးလီၤတၢ်ပၥ်ဖှိၣ်ခဲလၢၥ်အိၣ်၀ဲ(၁၀၆)ဘျီညါဒီး ဖဲန့ၣ် ကမျၢၢ်သံ(၂၀)ဂၤ, ဘၣ်ဒိ(၅၅)ဂၤ ဒီးဟံၣ်ဃီ,သီခါဖၠၣ်,တၢ်ဘါယွၤသရိၥ်ဟးဂီၤတစှၤန့ၢ်(၃၀)ဖျၢၣ်ညါန့ၣ်လီၤ.
