လါအ့ဖြ့ၣ် ၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်အပူၤ ဖဲမဟါအနံၤန့ၣ် တချုးဒံးလၢသုးကီၣ်ကး ဘိးဘၣ်ရၤလီၤလၢကပတုၥ်ဆိဃၥ်တၢ်ဒုးဒံးဘၣ်စှၤနၣ်ရံၣ်အတီၢ်ပူၤ အကဘီယူၤလဲၤခးလီၤတၢ်အဃိ ဖိသၣ်သံ၀ဲ(၂)ဂၤဒီး ဘၣ်ဒိ(၃)ဂၤ အဂ့ၢ်န့ၣ် သုးက့ပှၤဘၣ်မူဘၣ်ဒါစံး၀ဲန့ၣ်လီၤ.
ဖဲမဟါလါအ့ဖြ့ၣ် ၂ သီဟါခီ ၈ နၣ်ရံၣ်ဘျဲၣ်အဆၢကတီၢ်န့ၣ် လၢဟီၣ်ခိၣ်ဟူးတၢ်သံတၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤ အတီၢ်ပူၤအံၤ သုးကီၣ်ကးအခိၣ်မ့အီၣ်လဲၣ်ဘိးဘၣ်ရၤလီၤ၀ဲလၢလါထီၣ် ၂ သီတုၤ ၂၂ သီ လၢအသီ(၂၀)အတီၢ်ပူၤ ကပတုၥ်ဆိဃၥ် ၀ဲတၢ်ဒုးတၢ်ယၤအဂ့ၢ်န့ၣ် သုးကီၣ်ကးအ(MRTV)တၢ်ကစီၣ်ပၥ်ဖျါ၀ဲန့ၣ်လီၤ.
ဘၣ်ဆၣ်တချုးလၢသုးကီၣ်ကးဘိးဘၣ်ရၤလီၤလၢပကတုၥ်ဆိဃၥ်တၢ်ဒုးတၢ်ယၤဒံးဘၣ်တနံၤဃီစှၤနၣ်ရံၣ်အတီၢ်ပူၤ ဖဲဟါခီ ၄ နၣ်ရံၣ် အဆၢကတီၢ်န့ၣ် ပယီၤသုးမီၤစိရိၤအကဘီယူၤအံၤတၢ်ဒုးကဲထီၣ်တအိၣ်လဲၤတ့ၢ်လီၤ၀ဲမ့ၣ်ပိၢ်(၂)ဖျၢၣ်ဃုၥ်ဒီးကျိဖိတဖၣ်ဆူ (သုးက့ ၅) ကတၢတံၥ်ဒီးကမၤမိၢ်ဘၢၣ်စၢၤ လ့ဖိထၣ်ကရူၢ် န့ၤကၤသ၀ီပူၤန့ၣ်လီၤ.
ခီဖျိကဘီယူၤအံၤအဃိ ဘၣ်သံ၀ဲဖိသၣ်အိၣ်ဖျဲၣ်သီ(၃)လါတဂၤဒီး ဖိသၣ်(၁၂)နံၣ်တဂၤအမဲၥ်ညါ ဘၣ်ဒိ၀ဲ(၃)ဂၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
အ၀ဲစံး၀ဲလၢ“ဖဲတနံၤညါအံၤ ၂ သီ မုၢ်ဃ့ၢ်လီၤ ၄ နၣ်ရံၣ်အခါန့ၣ် ပယီၤသုးကဘီယူၤ(Jet)ဟဲခးလီၤတၢ်ဖဲလ့ဖိထၣ်ကရူၢ် န့ၤကၤသ၀ီ လၢအအိၣ်၀ဲဒၣ်ဖဲကတၢတံၥ်ဒီးကမၤမိၢ်အဘၢၣ်စၢၤန့ၣ်.သ၀ီအံၤဘူးဒိၣ်လၢကမၤမိၢ်တကပၤ. အဟဲခးလီၤတၢ်ဘျီ ၀ဲအံၤဘၣ်သံ၀ဲဒၣ်ဖိသၣ်အိၣ်သၢလါ(၁)ဂၤ,(၁၂)နံၣ်တဂၤဒီးဘၣ်ဒိ၀ဲတၢ်ဖုပှၢ်အိၣ်(၅၀)ဘျဲၣ်တဂၤ,တၢ်မုၢ်ပှၢ်အိၣ်(၅၀)ဘျဲၣ်တဂၤဒီးဖိသၣ်အနံၣ် (၁၀)တဂၤ.”အဂ့ၢ်န့ၣ် စံး၀ဲန့ၣ်လီၤ.
ကဘီယူၤအတၢ်ဟဲခးလီၤတၢ်ဘျီ၀ဲအံၤတၢ်ဒုးတၢ်ယၤကဲထီၣ်တအိၣ်နီမံၤဘၣ်အသိး တချုးအဟဲခးလီၤတၢ်ခဲအံၤဒံးဘၣ်အခါ အပူၤကွံၥ်စှၤသီအခါန့ၣ် ကဘီယူၤဟဲခးလီၤတအိၣ်ဘၣ်ဘၣ်ဆၣ်စးထီၣ်ဖဲတနံၤအံၤ တချုးသုးကီၣ်ကးဘိးဘၣ်ရၤလီၤလၢက ပတုၥ်ဆိဃၥ်တၢ်ဒုးတၢ်ယၤတၢ်ဒ့ၣ်စၢၤအိၣ်ထဲ(၄)နၣ်ရံၣ်အတီၢ်ပူၤအံၤန့ၣ်စးထီၣ်ခးလီၤနါစိၤတၢ်လၢဟီၣ်က၀ီၤပူၤကဲထီၣ်ဒ်အံၤလီၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ် စံးအါထီၣ်၀ဲန့ၣ်လီၤ.
တကတီၢ်ဃီအပူၤကွံၥ်တၢ်ကဲထီၣ်သးဖဲလါမးရှး ၂၈ သီအနံၤ ဟီၣ်ခိၣ်ဟူးကဲထီၣ်၀ဲသတူၢ်ကလၥ်လၢကီၢ်ပယီၤပူၤအဃိ ကမျၢၢ်ထံဖိကီၢ်ဖိသံဘၣ်ဒိ ဘၣ်ထံးလၢအကထိအမဲၥ်ညါတၢ်သူၣ်ထီၣ်လၢအမ့ၢ်ဟံၣ်ဃီ,တၢ်ဘူၣ်တၢ်ဘါတၢ်သူၣ်ထီၣ်,ကၠိ,တိၤ, ကျဲသ့ၣ်တဖၣ်ဟးဂီၤ၀ဲအါအါဂီၢ်ဂီၢ်တုၤလၢခဲအံၤတၢ်ပှၤလၢအလီၤမၢ်တဖၣ်တၢ်ဃု၀ဲအဖၢမုၢ်တၢ်ဖံးတၢ်မၤတ၀ံၤတတဲၥ်ဒံး၀ဲဘၣ်န့ၣ်လီၤ.
ဘၣ်ဆၣ်ဆၢကတီၢ်ဖဲကမျၢၢ်ဘၣ်သံဘၣ်ပှၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤကဲထီၣ်ဒိၣ်ဒိၣ်မုၢ်မုၢ်ဒ်အံၤအတကီၢ်အခါန့ၣ် သုးကီၣ်ကးအံၤမ့မ့ၢ်တခီတၢ်ဖံးတၢ်မၤလၢအမၤညီနုၢ်၀ဲလၢဟးခးလီၤတၢ်ဒီးကဘီယူၤ,မၤ၀ဲတၢ်ထီၣ်ဒုးလၢကျဲအကလုၥ်ကလုၥ်အံၤ တပတုၥ်အသးဘၣ်အမဲၥ်ညါလဲၤခးလီၤ၀ဲတၢ်လၢကီၢ်ခီ,ကီၢ်စဲၣ်တၢ်လီၢ်အါတီၤအပူၤအဃိ ကမျၢၢ်သံဘၣ်ဒိဘၣ်ထံး၀ဲဒၣ် အါမး အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢသုးကီၣ်ကးဟးခးလီၤတၢ်တပယူၥ်ဃီအကတီၢ် ဖဲမဟါအနံၤဘိးဘၣ်ရၤလီၤ၀ဲလၢကတပတုၥ်ဆိဃၥ်၀ဲတၢ်ဒုးတၢ်ယၤ(၂၀)သီ အိၣ်၀ဲဘၣ်ဆၣ် လၢဆၢကတီၢ်အံၤအတီၢ်ပူၤ ကလုၥ်ဒူၣ်ဖီၣ်စုက၀ဲၤကရူၢ်ကရၢဒီးဖီၣ်စုက၀ဲၤကရူၢ်ကရၢလၢအဂၤတဖၣ် တဘၣ်လဲၤထီၣ်ဒုးအ၀ဲသ့ၣ်တၢ်လီၢ်တၢ်ကျဲဘၣ်ဘၣ်ထွဲတဖၣ်ဘၣ်အသိး,မ့တလူၤပိၥ်မၤထွဲဘၣ်န့ၣ်ကက့ၤခီၣ်ဆၢကဒါ၀ဲအဂ့ၢ်န့ၣ် သုးကီၣ်ကးစံးစ့ၢ်ကီး၀ဲန့ၣ်လီၤ
ဘၣ်ဃးထံဖိကီၢ်ဖိကမျၢၢ်သဂၢၢ်ဘၣ်တၢ်ကီတၢ်ခဲတၢ်နးတၢ်ဖှီၣ်အကတီၢ်အံၤတချုးဒံးလၢသုးကီၣ်ကးဘိးဘၣ်ရၤလီၤလၢပကတုၥ် ဆိဃၥ်တၢ်ဒုးတယၤဒံးဘၣ်အခါန့ၣ် (NUG)ဃုၥ်ဒီးတၢ်ပၢၢ်ဆၢကရူၢ်ကရၢလၢအထီဒါသုးကီၣ်ကးအံၤတဖၣ်ဘိးဘၣ်ရၤလီၤ တ့ၢ်၀ဲလၢ ကပတုၥ်ဆိဃၥ်တၢ်ဒုးတၢ်ယၤအိၣ်၀ဲအသိးတၢ်ဆၢကတီၢ်ခဲအံၤသုးကီၣ်သူကဘီယူၤဟးခးလီၤအံၤ တမ့ၢ်တၢ်ဆၢကတီၢ် လၢ အကြၢးအဘၣ်၀ဲဘၣ်အဂ့ၢ်န့ၣ် ကလုၥ်ဖီၣ်စုက၀ဲၤခိၣ်နၢ်ဃုၥ်ဒီးကမျၢၢ်ထံဖိကီၢ်ဖိတနီၤပဲၥ်ထံနီၤဖးစံးအိၣ်န့ၣ်လီၤ.
