လါအ့ဖြ့ၣ် ၃၀ သီ, ၂၀၂၅ နံၣ်, ခ့ၣ်အဲးစံၣ်
သုးကီၣ်ကးအံၤလၢကထီၣ်မၤန့ၢ်ဒိၣ်စိက့ၤ ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆) ကြုၢ်တု-ကီးတရံးကျဲအံၤအဂီၢ် ဖဲတနံၤအံၤ လါအ့ဖြ့ၣ် ၃၀ သီ ဂီၤခီအဆၢကတီၢ်န့ၣ် အသုးကျိၤဟဲထီၣ်အဃိတၢ်ဒုးကဲထီၣ်၀ဲဒီးဟီၣ်က၀ီၤကညီဒီကလုၥ်တၢ်ထူၣ်ဖျဲး သုးမုၢ်ဒိၣ် (KNLA)သုးပၥ်ဖှိၣ် ဒိၣ်ဒိၣ်မုၢ်မုၢ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံး၀ဲန့ၣ်လီၤ.
သုးကီၣ်ကးသုးတြိၤ(၂၂)၀ဲၤလီၢ်ခိၣ်သ့ၣ်လၢအိၣ်ဆီလီၤသးဖဲဖၣ်အၣ်၀့ၢ်ပူၤအံၤ ဖဲမဟါလါအ့ဖြ့ၣ် ၂၉ သီအနံၤန့ၣ် အဒုးယၤခိၣ်နၢ် ပှၤဘၣ်မူဘၣ်ဒါတဖၣ်ဟဲထီၣ်တုၤ၀ဲဖဲကြုၢ်တုသုးရ့ၣ်အံၤ၀ံၤလီၢ်ခံ စးထီၣ်ဖဲတနံၤအံၤဂီၤခီန့ၣ်ခးလီၤ၀ဲဒၣ်ကျိဖးဒိၣ်တပယူၥ် ဃီအဂ့ၢ်န့ၣ် တၢ်ပၢၢ်ဆၢသုးကရူၢ်အပှၤလၢအိၣ်ကြုၢ်တုဟီၣ်က၀ီၤအံၤတဂၤ စံး၀ဲန့ၣ်လီၤ.
အ၀ဲစံး၀ဲလၢ“ခးလီၤကျိဖးဒိၣ်စးထီၣ်လၢဂီၤခီ ၆ နၣ်ရံၣ်န့ၣ်.လီၤတဲၥ်ပိၢ်ဖးထီၣ်လၢတၢ်လီၢ်တဘျုးတီၤ.ကျိဖးဒိၣ်န့ၣ်အိၣ်ဟးထီၣ်၀ဲလၢ ကြုၢ်တုဒုးယၤတၢ်လီၢ်,(ခမရ-၅၄၅/၅၄၆),ကၠဲတတါတၢ်လီၢ်တဖၣ်န့ၣ်.ကျိဖးဒိၣ်လီၤတဲၥ်လၢနွါခၠၤကိသ၀ီ,လ့တဲၤ,ညံၤညၤသၤလ့,ငါတဲၤ, ယ့ၤပူၤကၠံ,ကီၣ်၀ါလဲၢ်,နီၤတမၤသ၀ီတကပၤန့ၣ်လီၤ.မ့မ့ၢ်ပှၤသ၀ီဖိတဖၣ်န့ၣ်ခီဖျိပယီၤသုးကျိၤနုၥ်လီၤအဃိအ၀ဲသ့ၣ်ဟးပလဲၥ်သးလၢၥ်လံ” အဂ့ၢ်န့ၣ် စံး၀ဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါကြုၢ်တု ခီၣ်ချ့သုးရ့ၣ်(ခမရ-၅၄၅/၅၄၆)အပှၤသုးဂံၢ်ဘါကအိၣ်လၢအဂၤ(၂၀၀)ဃၣ်ဃၣ်အံၤစ့ၢ်ကီး အိၣ်ကတဲၤ ကတီၤထီၣ်သးလၢကလဲၤ၀ဲဆူအိတပ့ၤသ၀ီ(အုန်းတပင်)ဒီးနွါခၠၤကိ(နွားခြံကုန်း)သ၀ီတကပၤဒီး ဒ်န့ၣ်အသိးဖဲဂီၤခီ ၇ နၣ်ရံၣ် ဃၣ်ဃၣ်အဆၢကတီၢ်န့ၣ် သုးကီၣ်ကးအဒြိသုးကရူၢ်အံၤပျၢ်လီၤဒြိဟးဆှၣ်၀ဲတၢ်အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ပှၤလၢအဘူးဒီးသုးကီၣ်ကးတဂၤစံး၀ဲလၢ “ဖဲမဟါအနံၤန့ၣ်လၢဖၣ်အၣ်၀့ၢ်အံၤတဆီ ပသ့ၣ်ညါဘၣ်လၢပယီၤသုးဆှၢ ထီၣ်၀ဲကျိချံပှၥ်သၣ်ဒီးသုးခိၣ်သုးနၢ်သ့ၣ်တဖၣ်လီၤ. ဖဲတဂီၤညါအံၤလၢကထီၣ်မၤန့ၢ်က့ၤကီးတရံး-ကြုၢ်တုကျဲအံၤအဂီၢ် ပယီၤသုးကျိၤ ဟဲထီၣ်(၂)ဘိ.လဲၤထီၣ်၀ဲလၢအိတပ့ၤ သ၀ီဒီးနွါခၠၤကိသ၀ီတကပၤန့ၣ်”အဂ့ၢ်န့ၣ် စံး၀ဲန့ၣ်လီၤ.
စးထီၣ်ဖဲအပူၤကွံၥ်လါအ့ဖြ့ၣ် ၁၄ သီအနံၤန့ၣ် လၢကြုၢ်တုဒီးကီးတရံးကျဲန့ၣ် တၢ်ဒုးကဲထီၣ်၀ဲလၢဟီၣ်က၀ီၤကညီဒီကလုၥ်တၢ်ထူၣ် ဖျဲး သုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤန့ၣ်လီၤ.တကးဒံးဘၣ်ပယီၤသုးအတၢ်လီၢ်တၢ်ကျဲလၢအိၣ်ဆီလီၤသးဖဲကျဲမုၢ်၀ဲန့ၣ်အဖီခိၣ်တဖၣ်တၢ်ပၢၢ်ဆၢသုးပၥ်ဖှိၣ်မၤန့ၢ်စ့ၢ်ကီး၀ဲလံန့ၣ်လီၤ.
ဒ်န့ၣ်အသိးတၢ်ဒုးကဲထီၣ်လၢခံနွံဘျဲၣ်အတီၢ်ပူၤအံၤစ့ၢ်ကီး တၢ်ပၢၢ်ဆၢသုးပၥ်ဖှိၣ်ကရူၢ်သံဘၣ်ဒိဘၣ်ထံးအါ၀ဲအသိး ပယီၤသုးတကပၤ စ့ၢ်ကီးသံဘၣ်ဒိဘၣ်ထံးအိၣ်၀ဲဒၣ်အါမးန့ၣ်လီၤ.ဘၣ်ဆၣ်ဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးအံၤန့ၣ် ခံခီခံကပၤထုးထီၣ်ပၥ်ဖျါ၀ဲ တအိၣ်ဒံးဘၣ်န့ၣ်လီၤ.
တကးဒံးဘၣ်ခီဖျိလၢကျိဖးဒိၣ်,ဒြိဒီးကဘီယူၤအံၤအဃိ လီၢ်က၀ီၤကမျၢၢ်စ့ၢ်ကီးသံဘၣ်ဒိဘၣ်ထံးအိၣ်၀ဲဒၣ်အါမးအမဲၥ်ညါဟံၣ်တၢ်သူၣ် ထီၣ်,တၢ်ဘူၣ်တၢ်ဘါတၢ်သူၣ်ထီၣ်အါမးဘၣ်ဟးဂူၥ်ဟးဂီၤ၀ဲဒၣ်န့ၣ်လီၤ.
