လါမ့ၤ ၁၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကီၢ်ဆၣ်ခံဘ့ၣ် လါအ့ဖြ့ၣ်တလါအတီၢ်ပူၤ ပယီၤသုးခးလီၤကျိ ဖးဒိၣ်ဒီးကဘီယူၤလဲၤတ့ၢ်လီၤမ့ၣ်ပိၢ်ခဲလၢၥ်(၁၄)ဘျီအဃိ လီၢ်က၀ီၤကမျၢၢ်သံ(၃)ဂၤ,ဘၣ်ဒိ(၁၁)ဂၤအဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ် တၢ်မၤနီၣ်စရီအပူၤန့ၣ်လီၤ.
ကၠဲးထိၣ်ဒီးဘံလ့ကီၢ်ဆၣ်အပူၤ လါအ့ဖြ့ၣ် ၁ သီတုၤ ၃၀ သီ လၢတလါအတီၢ်ပူၤ ပယီၤသုးခးလီၤကျိဖးဒိၣ်(၁၁)ဘျီ,ကဘီယူၤလဲၤ တ့ၢ်လီၤမ့ၣ်ပိၢ်(၃)ဘျီ ခဲလၢၥ်(၁၄)ဘျီအဃိ ကမျၢၢ်ဘၣ်ဒိ(၁၄)ဂၤအံၤအကျါပၣ်ဃုၥ်၀ဲတပွဲဖိ(၁)ပါဒီး ဘၣ်ဒိ(၁၁)ဂၤအကျါစ့ၢ်ကီးပၣ် ဃုၥ်၀ဲသီခါ(၃)ပါအဂ့ၢ်န့ၣ် တလါတဘျီလံၥ်တၢ်မၤနီၣ်ပူၤပၥ်ဖျါ၀ဲန့ၣ်လီၤ.
တကးဒံးဘၣ်ခီဖျိလၢကဘီယူၤဒီးကျိဖးဒိၣ်အံၤအဃိ လီၢ်က၀ီၤကမျၢၢ်အဟံၣ်,သီခါဖၠၣ်တၢ်သူၣ်ထီၣ်,အရီဘၢၣ်ထူၣ်ဃုၥ်ဒီးတၢ်ထူၣ် တၢ်ဘိလၢအဂၤစ့ၢ်ကီးဟးဂီၤဘၣ်ဒိဘၣ်ထံး၀ဲဒၣ်အါမးန့ၣ်လီၤ.
ဒ်န့ၣ်အသိးလၢတလါအတီၢ်ပူၤ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးပၥ်ဖှိၣ်ဒီးပယီၤသုးအဘၢၣ်စၢၤ ဒုးယၤတၢ်ဖ့ၣ်စၢကဲထီၣ်၀ဲ(၁၃)ဘျီအဃိ ပယီၤသုးတကပၤသံ၀ဲ(၁၃)ဂၤဒီးဘၣ်ဒိ(၈)ဂၤအသိး မ့မ့ၢ်လၢတၢ်ပၢၢ်ဆၢသုးပၥ်ဖှိၣ်ကရူၢ် တကပၤခီန့ၣ် ဘၣ်ဟ့ၣ်လီၤကွံၥ်အသးသမူ(၁)ဂၤ,ဘၣ်ဒိစ့ၢ်ကီး(၁)ဂၤအဂ့ၢ်န့ၣ် တၢ်မၤနီၣ်စရီပူၤအသိး သ့ၣ်ညါဘၣ်န့ၣ်လီၤ.
ပယီၤသုးအံၤ စးထီၣ်ဖဲလါအ့ဖြ့ၣ် ၂၃ သီအနံၤန့ၣ် တၢ်ဒုးကဲထီၣ်တအိၣ်ပညိၣ်ခးလီၤ၀ဲကျိဖးဒိၣ်န့ၣ်အမဲၥ်ညါ ကဘီယူၤစ့ၢ်ကီး လဲၤတ့ၢ်လီၤ၀ဲမ့ၣ်ပိၢ်လၢကၠဲးထိၣ်ကီၢ်ဆၣ် ဒူသ၀ီတဖၣ်အပူၤတပယူၥ်ဃီ အဖီခိၣ်ကမျၢၢ်တဖၣ်ဘၣ်အိၣ်လၢ တၢ်ဘၣ်ယိၣ်လဲၤ က့ၤဖံးမၤတၢ်တသ့လၢၤဘၣ်သဂၢၢ်ဘၣ်၀ဲတၢ်လုၢ်အီၣ်နီၢ်ခိသးသမူတၢ်ဂ့ၢ်ကီ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
လၢန့ၣ်အမဲၥ်ညါဖဲလါမ့ၤ ၁၀ သီအနံၤစ့ၢ်ကီး တၢ်ဒုကဲထီၣ်တအိၣ်ပယီၤသုးခးလီၤကျိဖးဒိၣ်ဒီးကဘီယူၤစ့ၢ်ကီးလဲၤတ့ၢ်လီၤ မ့ၣ်ပိၢ်အဃိ ကရၣ်၀့ဆ့ၣ်သ၀ီဖိသံ(၁)ဂၤဒီး ၀ီၢ်က့သ၀ီဖိဘၣ်ဒိ(၂)ဂၤ,ဟံၣ်အူအီၣ်(၄)ဖျၢၣ်အသိး မုၢ်ဆ့ၣ်ထီၣ် ၁၁ သီအနံၤ ပယီၤသုးကဘီယူၤ(၂)ဘ့ၣ်လဲၤတ့ၢ်လီၤကဒီးမ့ၣ်ပိၢ်အဃိ ၀ီၢ်က့သ၀ီဖိဘၣ်ဒိကဒီး(၂)ဂၤ ဒီး ဟံၣ်ဟးဂီၤ(၁၃)ဖျၢၣ်ကဲထီၣ်ဒံး၀ဲန့ၣ်လီၤ.
တကီၢ်ခါခဲအံၤကၠဲးထိၣ်ကီၢ်ဆၣ်ဒီးကီၢ်ဘံလ့ကီၢ်ဆၣ်အပူၤ ခီဖျိလၢပယီၤသုးကဘီယူၤလဲၤတ့ၢ်လီၤမ့ၣ်ပိၢ်,ခးလီၤကျိဖးဒိၣ်ကဲထီၣ် တလီၢ်လီၢ်အဃိဒူသ၀ီကမျၢၢ်လၢအကထိဘၣ်ဃ့ၢ်ပလဲၥ်သးလၢတၢ်ဘံၣ်တၢ်ဘၢလီၢ်ဒီးတုၤလၢခဲအံၤက့ၤဆူအဒူသ၀ီတဘူၣ်ဒံးဘၣ် ထံၣ်၀ဲတၢ်ကီတၢ်ခဲအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
