လါအီးကထိဘၢၣ် ၃၁ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတၢ်သ့ၣ်နီၣ်ထီၣ်က့ၤခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှါလါဖါလၢ အလဲၤပူၤကွံာ်သးအံၤအဂီၢ် ကိးမုၢ်နံၣ်ဒဲးန့ၣ်တၢ်ဟ့ၣ်လၤကပီၤ၀ဲသးစၢ်ခိၣ်နၢ်ဖိခိၣ်ဖးအံၤဒီး တနံၣ်အံၤ(၂၀၂၃) ပဒိၣ်မါရှါ သးစၢ်ခိၣ်နၢ်ဖိခိၣ်ဖးအဂီၢ် တၢ်ဆှၢထီၣ်မံၤသ့၀ဲလံအဂ့ၢ်န့ၣ် ဖါဖီၣ်ဒ့ရှၢၣ် ထုးထီၣ်ပာ်ဖျါ၀ဲဖဲအပူၤကွံာ် လါအီးကထိဘၢၣ် ၂၅ သီအနံၤန့ၣ်လီၤႉ
ပဒိၣ်မါရှါသးစၢ်ခိၣ်နၢ်ဖိခိၣ်ဖးအံၤအဂီၢ်ကဘၣ်မ့ၢ်ၦၤအိၣ်(၃၅)နံၣ်ဆူဖီလာ်ဒီးတဘၣ်မ့ၢ်ၦၤလၢအကွၢ်လီၤနီၢ်ကစၢ် တၢ်ဘၣ်ဘျုးဘၣ်မ့မ့ၢ်တခီကဘၣ်မ့ၢ်ၦၤဟူးဂဲၤမၤတၢ်လၢကညီဒီးကလုာ်တၢ်အိၣ်ဆူၣ်အိၣ်ချ့ႇ ၦၤဂ့ၢ်၀ီခွဲးယာ်ႇ လံာ်လဲၢ်တၢ်ဆဲးတၢ်လၤႇကစိာ်မူစိာ်ဂဲၤပၢၤဃာ်ခိၣ်ဃၢၤန့ဆၢၣ်ဒီးမ့ၢ်ခိၣ်ဖးတခါလၢ(Phan Foundation) ဃုထၢဟ့ၣ်လၤ ကပီၤ၀ဲကိးမုၢ်နံၣ်ဒဲးန့ၣ်လီၤႉ
ပဒိၣ်မါရှါလါဖါအဖိမုၣ်နၣ်စိၤယၤဖါ စံး၀ဲလၢ“တၢ်ပညိၣ်အခိၣ်သ့ၣ်လၢပဟ့ၣ်တၢ်လၤကပီၤဆူကညီခိၣ်နၢ်သးစၢ်လၢ အဖျိးစိတဖၣ်အံၤမ့ၢ်ဒ်သိးလၢပကဟ့ၣ်ဂံၢ်ဟ့ၣ်ဘါဆီၣ်ထွဲဒီးကဲထီၣ်တၢ်တိစၢၤမၤစၢၤလၢအ၀ဲသ့ၣ်အတၢ်ဖံးတၢ်မၤ အဂီၢ်မီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ပဒိၣ်မါရှါသးစၢ်ခိၣ်နၢ်ဖိခိၣ်ဖးအဂီၢ်ကယဲၢ်မ့ၢ်ကညီသးစၢ်လၢအိၣ်တၢ်လီၢ်တီၤဂ့ၤတတီၤဂ့ၤႇတၢ်ကရၢကရိတဒူၣ်ဂ့ၤ တဒူၣ်ဂ့ၤဆှၢထီၣ်မံၤသ့၀ဲအသိးတၢ်ကရၢကရိဆှၢထီၣ်အုၣ်ကီၤအကရၢဖိအမံၤလၢခိၣ်ဖးအံၤအဂီၢ်သ့၀ဲဒီး ၦၤလၢအဒိးန့ၢ်ဘၣ်ခိၣ်ဖးအံၤတၢ်ကဟ့ၣ်လၤကပီၤ၀ဲလၢအမဲရံၣ်ကၤစ့ဒီၣ်လၣ်(၄၀၀၀)အဂ့ၢ်န့ၣ် ဖၣ်ဖီၣ်ဒ့ရှၢၣ် ထုးထီၣ်ပာ်ဖျါ၀ဲန့ၣ်လီၤႉ
“လၢအပူၤကွံာ်ပပါပဒိၣ်မါရှါလါဖါအိၣ်မူဒံးအဆၢကတီၢ်န့ၣ်အ၀ဲဟ့ၣ်ဂံၢ်ဟ့ၣ်ဘါဆီၣ်ထွဲ၀ဲဒၣ်ကညီသးစၢ်တဖၣ် အါမးလီၤမီၤနီၤႉလၢခံအ၀ဲသ့ၣ်တအိၣ်လၢၤဘၣ်၀ံၤလီၢ်ခံန့ၣ်ပ၀ဲဖိလံၤတဖၣ်ပဂုာ်ကျဲးစၢးမၤတၢ်သ့ၣ်နီၣ်က့ၤတၢ်လၢ အ၀ဲဂီၢ်မီၤနီၤ”အဂ့ၢ်န့ၣ် နါစိၤယၤဖါ စံးအါထီၣ်၀ဲန့ၣ်လီၤႉ
တၢ်ဆှၢထီၣ်မံၤအံၤန့ၣ်တၢ်ကတူၢ်လိာ်အီၤလီၢ်ခံကတၢၢ်ဖဲ(၂၀၂၃)လါဒံၣ်စ့ဘၢၣ် ၃၁ သီအနံၤဒီး ဒ်န့ၣ်အသိး ၦၤလၢအဒိးန့ၢ်ဘၣ်ခိၣ်ဖးအံၤတၢ်ကဘိးဘၣ်ရၤလီၤဒုးသ့ၣ်ညါက့ၤ၀ဲဖဲ(၂၀၂၄)ထီၣ်သီအတီၢ်ပူၤအဂ့ၢ်န့ၣ် ဖါဖီၣ်ဒ့ရှၢၣ် လံာ်တၢ်ထုးထီၣ်ပာ်ဖျါအပူၤ ပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါသးစၢ်ခိၣ်နၢ်ဖိခိၣ်ဖးအံၤအဂီၢ်ၦၤလၢအဆှၢထီၣ်မံၤတဖၣ်ကဘၣ်ကွဲးလီၤအမံၤႇသးနံၣ်ႇအိၣ်ဖျဲၣ်မုၢ်နံၤမုၢ်သီႇအိၣ်တၢ်လီၢ်ႇတၢ်ကရၢကရိအတၢ်ဂ့ၢ်တၢ်ကျိၤတဖၣ်အံၤလၢကညီကျိာ်၊ကီၤလၤ၀ါကျိာ်၊ပယီၤကျိာ်ဒီးကဘၣ်ဆှၢထီၣ်အီၤဆူ (bwabwa.phan@ phanfoundation.org)အအိၣ်အဂ့ၢ်န့ၣ် ဖါဖီၣ်ဒ့ရှၢၣ်ထုးထီၣ်ပာဖျါ၀ဲန့ၣ်လီၤႉ
လၢတၢ်သ့ၣ်နီၣ်ထီၣ်က့ၤ(ခ့ၣ်အဲၣ်ယူၣ်)နဲၣ်ရွဲၣ်ခိၣ်ကျၢၢ်လီၢ်လံၤ ပဒိၣ်မါရှါလါဖါဒီး အမါနၣ်ကၠ့ၤစွ့ၤအံၤအဂီၢ်န့ၣ် အဖိမုၣ်ဖိခွါလၢအအိၣ်တ့ၢ်တဖၣ်ဒုးအိၣ်ထီၣ်၀ဲဖါဖီၣ်ဒ့ရှၢၣ်အံၤဒီး ကညီသးစၢ်လၢအဟူးဂဲၤမၤတၢ်လၢကညီကလုာ် အဂီၢ်တဖၣ်န့ၣ် စးထီၣ်(၂၀၀၈)နံၣ်န့ၣ်တၢ်ဃုထၢဟ့ၣ်လၤကပီၤ၀ဲခိၣ်ဖးအံၤကိးမုၢ်နံၣ်ဒဲးဒီးတုၤလၢအပူၤကွံာ်မဟိ (၂၀၂၂)န့ၣ်တၢ်ဃုထၢထီၣ်အိၣ်၀ဲ(၁၅)လံန့ၣ်လီၤႉ
ဖဲအပူၤကွံာ်(၂၀၂၂)အခါၦၤလၢအဒိးန့ၢ်သးစၢ်ခိၣ်နၢ်ဖိခိၣ်ဖးန့ၣ်မ့ၢ်၀ဲဒၣ်သးစၢ်မုၣ်နီၢ်ဟ့ၤသံၤကၠူလၢအတီခိၣ်ရိၣ်မဲတၢ် လၢကညီတၢ်ကူၣ်ဘၣ်ကူၣ်သ့တကပၤဒီးဒ်န့ၣ်အသိးမ့ၢ်ၦၤတဂၤလၢအဒုးအိၣ်ထီၣ်၀ဲတီထီကၠိဒီးကၠူၣ်နံၣ်ယၢၣ်ခီလ့း (Junior College)ကၠိလၢအိၣ်ကညီကူၣ်သ့ဆဲးလၤ၀ဲၤကျိၤ(KECD)ဖီလာ်အံၤန့ၣ်လီၤႉ
ခ့ၣ်အဲၣ်ယူၣ်နဲၣ်ရွဲၣ်ခိၣ်ကျၢၢ်လီၢ်လံၤပဒိၣ်မါရှါလါဖါအံၤဖဲအပူၤကွံာ်(၂၀၀၈)နံၣ်လါဖ့ၤဘြူၤအါရံၤ ၁၄ သီအနံၤန့ၣ် ၦၤဖီၣ်စုက၀ဲၤဖိခံဂၤလၢတၢ်တသ့ၣ်ညါအမံၤအံၤဟဲခးသံအီၤလၢကီၢ်ကၠီၣ်တဲၣ် ၀့ၢ်မဲၢ်ဆီး လၢအဟံၣ်ပူၤန့ၣ်လီၤႉ
