လါအီကူာ် ၂၁ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ သုးကီၣ်ကးအဂၢၤကီၢ် သုး(ပြည်သူ့စစ်)လၢတၢ်ဒုးဖီၣ်အီၤကျိတဖၣ်ဖဲတလါအံၤလါအီကူာ်ထီၣ်ခံနွံဃၣ်ဃၣ်အခါန့ၣ် အ၀ဲသ့ၣ်က့ၤအးကဒါ ကျိဆူသုးကီၣ်ကးႇ(BGF)အအိၣ်ဒီး ဖဲန့ၣ်ၦၤက့ၤအးကျိလၢ(BGF)အိၣ်တဖၣ်အကျါပၣ်ဃုာ်အခိၣ်ဒိၣ်တနီၤအဂ့ၢ်န့ၣ် လီၢ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ
အပူၤကွံာ်လါအီကူာ် ၁၀ ဒီး ၁၂ သီအနံၤ သုးကီၣ်ကးအဂၢၤကီၢ်သုးလၢအိၣ်ဖၣ်အၣ်ကီၢ်ဆၣ် KNLA သုးရ့ၣ်(၁) ဟီၣ်က၀ီၤပူၤ တဖၣ်ခီဖျိတအဲၣ်ဒိးအိၣ်လၢသုးမီၤစိရိၤတၢ်ပၢဆှၢရဲၣ်ကျဲၤဖီလာ်လၢၤဘၣ်အဃိလဲအးက့ၤအကျိလၢ သုးကီၣ်ကးအအိၣ်တနီၤဒီးတနီၤန့ၣ်လဲၤအး၀ဲလၢသုးခိးကီၢ်ဆၢ(BGF) သုးဟီၣ်က၀ီၤ(၂)အခိၣ် သုးခိၣ်ဒိၣ်စိ စီၤတ့ၤ၀့ အအိၣ်အဂ့ၢ်န့ၣ် ဒူသထူၣ်ကီၢ်ရ့ၣ် ၦၤဘၣ်မူဘၣ်ဒါစံးဘၣ်တ့ၢ်ဃာ်ခ့ၣ်အဲးစံၣ်-ကညီတၢ်ကစီၣ်ဖဲ လါအီကူာ် ၁၉ သီအနံၤ န့ၣ်လီၤႉ
ဖဲဂၢၤကီၢ်သုးက့ၤအးကဒါကျိဆူသုးကီၣ်ကးအအိၣ်ဘျီ၀ဲအံၤအခါန့ၣ် က့ၤအး၀ဲလၢဖၣ်အၣ်၀့ၢ်(၁၅၁)သုးကီၣ်ကး တၢ်လီၢ်(၆၀)ခိၣ်ႇလၢသုးခိးကီၢ်ဆၢ(BGF)သုးဟီၣ်က၀ီၤ(၂)အခိၣ် သုးခိၣ်တ့ၤ၀့အအိၣ် ၁၁ ခိၣ်ဒီး ၦၤလၢအလဲၤအး ကျိလၢ(BGF)အအိၣ်တဖၣ်ဟဲက့ၤတတုၤလၢအဟံၣ်အဃီဒံးဘၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲန့ၣ်လီၤႉ
လၢတၢ်န့ၣ်အဃိဘၣ်ဃးတၢ်ဂ့ၢ်အံၤပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ် (BGF)သုးခိၣ်ဒိၣ်စိ စီၤတ့ၤ၀့ ဒီးအ၀ဲ စံး၀ဲလၢ“တၢ်ဂ့ၢ်တခါန့ၣ်အမ့ၢ်လီၤႉအဟဲက့ၤထီၣ်လၢပအိၣ်အံၤအိၣ်(၁၁)ဂၤဒံးလီၤႉအိၣ်တ့ၢ်တနီၤဒံးႉအ၀ဲသ့ၣ်န့ၣ်ဟဲထီၣ်အိၣ်ဒီးၦၤလီၤႉကျိန့ၣ်အ၀ဲသ့ၣ်က့ၤအးပယီၤသုးလၢၤလံႉတဟဲစိာ်ဃုာ်ကျိနီတခိၣ်ဘၣ်ႉအ၀ဲသ့ၣ်န့ၣ်အိၣ်လၢဒူသ၀ီမံလၢဟံၣ်တဘူၣ်ဘၣ်ဒီးလၢအတကပၤခီန့ၣ်တဲတၢ်တနီၤနီၤန့ၣ်တဘၣ်ဘျီးဘၣ်ဒါဘၣ်အဃိအ၀ဲသ့ၣ်အိိၣ်၀ဲတသ့လၢၤဘျီဟဲထီၣ်ပလဲးသးဒ်န့ၣ်ႉတကးဒံးဘၣ်မ့အိၣ်လၢန့ၣ်ဘၣ်ယိၣ်လၢကဒဲကဒဲတၢ်ဘၣ်ဂံာ်ဂူာ်ကအိၣ်ထီၣ်အဃိဟဲဆှဲး သးဟဲအိၣ် ကဒုတစိၢ်တလီၢ်ဒ်န့ၣ်လီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ
တချုးလၢသုးကီၣ်ကးအဂၢၤကီၢ်သုးက့ၤအးကျိကဲထီၣ်ဒံးဘၣ်အခါန့ၣ်ဖဲအပူၤကွံာ်လါယူၤလံ ၂၄ သီအနံၤန့ၣ် ဖၣ်အၣ်ကီၢ်ဆၣ်ၦၤဘၣ်မူဘၣ်ဒါဒုးသ့ၣ်ညါလံာ်ဆူအ၀ဲသ့ၣ်အအိၣ်လၢတဘၣ်မၤန့ၢ်သုးကီၣ်ကးအတၢ်ဖံးတၢ်မၤလၢၤ ဘၣ်ဒီးတၢ်မ့တလူၤပိာ်မၤထွဲတၢ်နဲၣ်လီၤဘၣ်န့ၣ်လီၢ်ခံတၢ်ဂ့ၢ်မ့ကဲထီၣ်သးတမံၤမံၤန့ၣ်တဟံမူဒါဘၣ်အဂ့ၢ်န့ၣ် လီၢ်က၀ီၤခ့ၣ်အဲၣ်ယူၣ်စံး၀ဲန့ၣ်လီၤႉ
တၢ်ဆှၢဒုးသ့ၣ်ညါသုးကီၣ်ကးအဂၢၤကီၢ်သုး၀ံၤလီၢ်ခံတနီၤန့ၣ်လဲၤအၢၣ်လီၤအသးလၢ(ခ့ၣ်အဲၣ်ယူၣ်)လီၢ်က၀ီၤၦၤဘၣ် မူဘၣ်ဒါအအိၣ်လၢတမၤသုးကီၣ်ကးအတၢ်ဖံးတၢ်မၤလၢၤဘၣ်ဒီးမ့မ့ၢ်တခီကအိၣ်ဆၢထၢၣ်က့ၤဒ်ကမျၢၢ်အသိးအိၣ်၀ဲဘၣ်ဆၣ် တနီၤန့ၣ်ပျံၤတၢ်ဒီးတုၤခဲအံၤဟဲအၢၣ်လီၤသးတအိၣ်ဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
ဘၣ်ဃးတၢ်ဂ့ၢ်အံၤန့ၣ် ဒူသထူၣ်ကီၢ်ရ့ၣ် ပှၤကတိၤတၢ်ပၢ ပဒိၣ်စီၤအ့နဲၤ စံး၀ဲလၢ“အ၀ဲသ့ၣ်ပျံၤလီၤသးဒ်လဲၣ်န့ၣ် ပတသ့ၣ်ညါဘၣ်ႉလၢပအိၣ်တကပၤဒုအ၀ဲသ့ၣ်မ့တဟံလၢၤဂၢၤကီၢ်သုးမူဒါဘၣ်န့ၣ်၀ံၤလီၤႉပသ့ၣ်ညါဘၣ်လၢအလဲၤလၢ (BGF)အကျါတနီၤႇလဲၤဃုဖံးဃုမၤလၢယိၤကီၢ်တနီၤႉအိၣ်တ့ၢ်ဒုအိၣ်တ့ၢ်တနီၤဒံးႉလၢအအိၣ်တ့ၢ်တဖၣ်န့ၣ်တဟဲအၢၣ်လီၤအသးနီဂၤဒံးဘၣ်ႉအ၀ဲသ့ၣ်မ့တမၤလၢၤသုးကီၣ်ကးတၢ်ဖံးတၢ်မၤလၢၤဘၣ်န့ၣ်ပတူၢ်လိာ်အ၀ဲသ့ၣ်ထီဘိလီၤႉတၢ်မၢၤဟဲတဲကျၢၦၤႇတလိၣ်လၢဟဲအၢၣ်လီၤၦၤထဲန့ၣ်တုၤန့ၣ်ဘၣ်ႉမ့တလူၤပိာ်မၤထွဲသုးကီၣ်ကးအတၢ်ဖံးတၢ်မၤဘၣ်ဒီးမ့အိၣ်ဒ်သိးကမျၢၢ် သ၀ီဖိအသိးန့ၣ်သ့လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ် န့ၣ်လီၤႉ
တကီၢ်ခါခဲအံၤလီၢ်က၀ီၤဖဲန့ၣ်အပူၤတၢ်ကစီၣ်ဟူထီၣ်လၢဂၢၤကီၢ်သုးလၢအက့ၤဆူ(BGF)အအိၣ်တဖၣ်အ၀ဲသ့ၣ်ကအိၣ် ဆၢၣ်ထၢၣ်ဒ်သုးခိးကီၢ်ဆၢ(BGF)အဂ့ၢ်ကမျၢၢ်စံး၀ဲအိၣ်ဒီးဒ်န့ၣ်အသိးတၢ်ဂ့ၢ်ကီလၢအကဲထီၣ်အံၤတၢ်ရဲၣ်တၢ်ကျဲၤ အိၣ်လၢ ကကျဲၤဃူကျဲၤဖိးက့ၤ၀ဲအဂ့ၢ်န့ၣ် သုးခိၣ်ဒိၣ်စိ စီၤတ့ၤ၀့ စံးအါထီၣ်၀ဲန့ၣ်လီၤႉ
“ၦၤလၢအဟဲလၢပအိၣ်တဖၣ်အံၤတနီၤအသးမ့ဆူၣ်အဲၣ်ဒိးဟဲက့ၤမၤသကိးတၢ်ဒီးၦၤဒု၀ဲဒၣ်ပတူၢ်လိာ်လီၤမီၤႉပကဲၦၤကညီဖိဒ်သိးသိးလီၤႉအ၀ဲသ့ၣ်ကအိၣ်လၢန့ၣ်အဂီၢ်တၢ်ကီတၢ်ခဲအိၣ်စ့ၢ်ႉယဆိမိၣ်တၢ်အိၣ်သးမ့ဂ့ၤထီၣ်န့ၣ်ယက့ၤထံၣ် ဖှိၣ်လိာ် သးဒီး(သုးက့ ၁)ၦၤဘၣ်မူဘၣ်ဒါ ပကကျဲၤသကိးက့ၤလၢအဂ့ၤကတၢၢ်န့ၣ်ပတၢ်ရဲၣ်တၢ်ကျဲၤအိၣ်လီၤမီၤနီၤႉ ဒ်သိးတကပၤ ဒီးတကပၤတၢ်ဘၣ်ဂံာ်ဂူာ်သုတအိၣ်တဂ့ၤန့ၣ်ပကဘၣ်ကျဲၤသကိးလၢအဂ့ၤကတၢၢ်လီၤမီၤတၢ်ဂ့ၢ်တခါအံၤ”အဂ့ၢ်န့ၣ် စံးအါထီၣ်၀ဲန့ၣ်လီၤႉ
ဖၣ်အၣ်ကီၢ်ဆၣ် KNLA သုးရ့ၣ်(၁)ဟီၣ်က၀ီၤပူၤ သုးကီၣ်ကးအဂၢၤကီၢ်သုးသ့ၣ်တဖၣ်အံၤစးထီၣ်အိၣ်ဆီလီၤသးဟူးဂဲၤ ၀ဲဖဲဟီၣ်က၀ီၤ၀ဲန့ၣ်အပူၤတချုးလၢသုးဟံန့ၢ်တၢ်စိတၢ်ကမီၤဒံးဘၣ်အခါလံဒီးသုးဟံန့ၢ်တၢ်စိတၢ်ကမီၤ၀ံၤလီၢ်ခံခီဖျိအ၀ဲသ့ၣ်ဆဲးမၤဒံး၀ဲသုးကီၣ်ကးတၢ်ဖံးတၢ်မၤအဃိတၢ်ထုးထီၣ်လံာ်ဒုးသ့ၣ်ညါအ၀ဲသ့ၣ်၀ံၤလီၢ်ခံ အ၀ဲသ့ၣ်က့ၤအးကဒါကျိဟဲအိၣ် ထီၣ်၀ဲဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
