လါမ့ၤ ၁၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ဒူသ၀ီတဖၣ်အပူၤ ခီဖျိပယီၤသုးကျိၤနုၥ်လီၤ(၄)ဘိအဃိ ဘၣ်ယိၣ်လၢတၢ်ဒုးကကဲထီၣ်အဖီခိၣ် ဒူသ၀ီကရူၢ်(၅)ဘ့ၣ်ပူၤကမျၢၢ်(၁၇၀၀၀)ဘျဲၣ် ဘၣ်ဃ့ၢ်ထီၣ်ဟးထီၣ်၀ဲလၢတၢ်ဘံၣ်တၢ်ဘၢ အလီၢ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
ဖဲအပူၤကွံၥ်လါမ့ၤ ၁၄ သီအနံၤန့ၣ် သုးကျိၤ(၄)ဘိလၢအမ့ၢ် ခီၣ်ချ့သုးရ့ၣ်(ခမရ-၁၀၁)သုး၀ဲၤလီၢ်ခိၣ်သ့ၣ်စုတီၤဖီလၥ် သုးကျိၤ(၂)ဘိ သုးဂံၢ်ဘါ(၂၀၀)ဘျဲၣ် ဒီး ခီၣ်ချ့သုးရ့ၣ်(ခမရ-၄၄)သုး၀ဲၤလီၢ်ခိၣ်သ့ၣ် စုတီၤဖီလၥ်(ခမရ-၂၀၇)တီခိၣ်ရိၣ်မဲ သုးကျိၤ(၂)ဘိ သုးဂံၢ်ဘါ (၁၅၀)ဘျဲၣ် ပၥ်ဖှိၣ်ခဲလၢၥ်အဂၤ(၄၀၀)ဃၣ်ဃၣ် နုၥ်လီၤဟူးဂဲၤ၀ဲလၢ ၀ီၢ်က့ကရူၢ်,ခရၢၢ်ကရူၢ်,ဖွ့ဖူကၢ်ကရူၢ်ဒီးပလိၥ်ခံကရူၢ် ဒူသ၀ီသ့ၣ်တဖၣ်ပူၤ အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိကရူၢ်(၄)အံၤအပူၤဒူသ၀ီဃုၥ်ဒီးကၠီၣ်ဖၠၤ(ဆီသုးခံ)ကရူၢ်ပူၤဒူသ၀ီသ့ၣ်တဖၣ် ပျံၤတၢ်ဘၣ်ယိၣ်၀ဲလၢတၢ်ဒုးမ့ကဲထီၣ် န့ၣ်ပယီၤသုးကခးလီၤကျိဖးဒိၣ်,ကဘီယူၤကဟဲခးလီၤတၢ်အဃိ ကရူၢ်(၅)ဘ့ၣ်အံၤသ၀ီပၥ်ဖှိၣ်(၃၆)ဖျၢၣ်, ဟံၣ်ခိၣ်(၃၃၁၁)ဖျၢၣ်, ပှၤနီၣ်ဂံၢ်(၁၇၆၀၂)ဘၣ်ဃ့ၢ်ထီၣ်၀ဲခဲလၢၥ်ကဲထီၣ်၀ဲဒ်အံၤလီၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံး၀ဲန့ၣ်လီၤ.
ဘၣ်ဃးပယီၤသုးကျိၤဟဲနုၥ်လီၤအါအါဂီၢ်ဂီၢ်အံၤအဖီခိၣ်န့ၣ် (သုးက့ ၁)သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံး၀ဲလၢ “တၢ်ကစီၣ် ဟဲထီၣ်ခဲအံၤလီၤ.ဖဲ(ဒမၣ်ဒူၤတၣ်)သီခါဖၠၣ်န့ၣ်ပယီၤသုးအိၣ်အဂၤ(၂၀၀)ညါ.ခဲအံၤအ၀ဲသ့ၣ်န့ၣ်နီၤဖးလီၤအသးခံဒူၣ်ဟးထီၣ်ဘျီနုၥ်လီၤဟးဂဲၤ၀ဲဖဲဒူသ၀ီ တၢ်ခိၣ်တၢ်ဃၢၤဖဲန့ၣ်လီၤ.လၢအအိၣ်တ့ၢ်တဖၣ်န့ၣ်ခူၣ်လီၤဃၥ်တၢ်ပူၤဖဲန့ၣ်.ဒုၣ်ဒါဟဲထီၣ်န့ၣ်အ၀ဲသ့ၣ်နၢ်ဟူ ၀ဲလၢပှၤကလဲၤနုၥ်လီၤ၀့ၢ်ပူၤ.ခံထံၣ်တထံၣ်န့ၣ်အဲၣ်ဒိးဟဲထီၣ်မၤဆှဲပတၢ်လီၢ်တဖၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်က စီၣ်န့ၣ်လီၤ.
ဒ်န့ၣ်အသိးစးထီၣ်ဖဲပယီၤသုးနုၥ်လီၤ၀ံၤလီၢ်ခံန့ၣ်တၢ်ဘၣ်သဂၢၢ်ခးလိၥ်သးကဲထီၣ်၀ဲဒီးဟီၣ်က၀ီၤတၢ်ပၢၢ်ဆၢသုးကရူၢ် အိၣ်၀ဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲအသိးသ့ၣ်ညါဘၣ်န့ၣ်လီၤ.
တကီၢ်ခါခဲအံၤလီၢ်က၀ီၤကမျၢၢ်လၢအဃ့ၢ်ထီၣ်တဖၣ်တနီၤန့ၣ်လဲၤစံၣ်အိၣ်၀ဲလၢ(သ့ၤစယၣ်)အိၣ်၀ဲအသိး တနီၤန့ၣ်ဃ့ၢ်ထီၣ် လဲၤအိၣ်၀ဲလၢပှၢ်ပူၤကစၢၢ်ကလိတၢ်ဘံၣ်တၢ်ဘၢအလီၢ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါလီၢ်က၀ီၤကမျၢၢ်ပှၤနီၣ်ဂံၢ်(၁၇၆၀၀)ဘျဲၣ်လၢအဘၣ်ဃ့ၢ်ထီၣ်သ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူ တၢ်အီၣ်တၢ်အီ,အိၣ်ဆိးလီၢ်ကျဲဒီးကသံၣ်ကသီတၢ်ဆီၣ်ထွဲမၤစၢၤလၢအဆိအချ့အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံး၀ဲန့ၣ်လီၤ.
ကၠဲးထိၣ်ကီၢ်ဆၣ်ပူၤ စးထီၣ်ဖဲအပူၤကွံၥ်လါအ့ဖြ့ၣ်ဘူးကလၢၤဒီးတုၤဃီၤ၀ဲဒၣ်လၢလါမ့ၤထီၣ်တစုန့ၣ် တၢ်ဒုးကဲထီၣ်တအိၣ်ပယီၤ သုးခးလီၤ၀ဲ ကျိဖးဒိၣ်,ကဘီယူၤစ့ၢ်ကီးလဲၤခးလီၤတၢ်လၢဒူသ၀ီပူၤတလီၢ်လီၢ်၀ံၤလီၢ်ခံ အသုးကျိၤနုၥ်လီၤဟူးဂဲၤလၢသ၀ီပူၤကဲထီၣ် ဒ်အံၤန့ၣ်လီၤ.
