လါမ့ၤ ၁၇ သီ, ၂၀၂၅ နံၣ်, ခ့ၣ်အဲးစံၣ်
မကွံၢ်လူၢ်ပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇) တၢ်ကြဲၢ် ကီၢ်ဆၣ်အပူၤအံၤ တချုးသုးကလၢၤလီၤတၢ်လဲၤထီၣ်ခး၀ဲအဃိကမျၢၢ်လၢဃ့ၢ်ထီၣ်ဆူထံ၀ၢ်ခီ မဲၢ်လးယိၤသ၀ီပူၤအံၤတဖၣ် ဖဲတနံၤအံၤ ဂီၤခီအဆၢကတီၢ်န့ၣ် တၢ်ဆှၢက့ၤအ၀ဲသ့ၣ်လၢအတၢ်လီၢ်တၢ်ကျဲခဲလၢၥ်လံအဂ့ၢ်န့ၣ် ကၠီၣ်တဲၣ်တၢ်ကစီၣ်ထုးထီၣ်ပၥ်ဖျါ၀ဲအသိး သ့ၣ်ညါ ဘၣ်န့ၣ်လီၤ.
မကွံၢ်လူၢ်ပယီၤသုးကလၢၤလၢတၢ်ထီၣ်န့ၢ်၀ဲဖဲမဟါအံၤ ခီဖျိတၢ်မၤဆှဲလဲ၀ဲ၀ံၤလံအဃိ ကမျၢၢ်လၢအိၣ်သုးကလၢၤ၀ဲန့ၣ်အခိၣ်အဃၢၤ (၅၁၀)ဂၤလၢအဃ့ၢ်ထီၣ်ဆူသူမှဲကျိ၀ၢ်ခီ ကၠီၣ်တဲၣ် မဲၢ်လးသ၀ီပူၤတဖၣ် ဖဲတနံၤအံၤလါမ့ၤ ၁၇ သီ ဂီၤခီ ၉း၀၀ နၣ်ရံၣ်အဆၢကတီၢ်န့ၣ် ကၠီၣ်တဲၣ်ပှၤဘၣ်မူဘၣ်ဒါက့ၤဆှၢအ၀ဲသ့ၣ်ကိးဂၤဒဲးလၢထံကျိကၢၢ်နံၤလၢကက့ၤဆူအတၢ်လီၢ်တၢ်ကျဲအဂ့ၢ်န့ၣ် ကၠီၣ်တဲၣ်လံၥ်တၢ်ပၥ်ဖျါ အပူၤ စံး၀ဲန့ၣ်လီၤ.
ဖဲလါမ့ၤ ၇ သီအခါန့ၣ် လၢမဲၢ်လးသူမှဲကျိ၀ၢ်ခီ ကညီဖီၣ်စုက၀ဲၤတၢ်မုၥ်တၢ်ခုၣ်ကီၣ်ကးကရၢ(PC)ဟီၣ်က၀ီၤအပူၤ တၢ်စးထီၣ် ထီၣ်၀ဲလ့ပနၢ်ဒ့ၣ်(ကိး)တခိးဘံၣ်ကွံအံၤဒီး ဖဲလါထီၣ် ၉ သီအနံၤ တၢ်ထီၣ်န့ၢ်၀ဲ၀ံၤ ဖဲလါမ့ၤ ၁၄ န့ၣ်တၢ်စးထီၣ်ဆဲးထီၣ်၀ဲ မကွံၢ်လူၢ် သုးကလၢၤအံၤဒီးဖဲမဟါလါမ့ၤ ၁၆ သီ ဂီၤခီ ၅း၀၀ နၣ်ရံၣ်ဘျဲၣ်အဆၢကတီၢ်န့ၣ် တၢ်ထီၣ်န့ၢ်ဆှဲလဲ၀ဲခဲလၢၥ်လံန့ၣ်လီၤ.
လၢတၢ်န့ၣ်အဃိတကီၢ်ခါခဲအံၤခီဖျိပယီၤသုးကလၢၤခံဖျၢၣ်လၢၥ်တၢ်ထီၣ်မၤန့ၢ်၀ဲလံအဖီခိၣ် ကမျၢၢ်သ့ၣ်တဖၣ်ဟဲက့ၤ အိၣ်ဆိးလၢအဒူသ၀ီတၢ်လီၢ်တၢ်ကျဲသ့၀ဲဂ့ၤဂ့ၤလံအဂ့ၢ်န့ၣ် ဟီၣ်က၀ီၤပှၤဘၣ်မူဘၣ်ဒါလၢအိၣ်ဖဲန့ၣ် တဖၣ်စံး၀ဲန့ၣ်လီၤ.
ဒ်ခ့ၣ်အဲၣ်ယူၣ်တၢ်မၤနီၣ်စရီပူၤအိၣ်၀ဲအသိးန့ၣ် စးထီၣ်(၂၀၂၅)လါအ့ဖြ့ၣ်တုၤလၢလါမ့ၤ ၁၆ သီမဟါတစုန့ၣ် သုးက့(၇)ဟီၣ်က၀ီၤအပူၤ တၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်၀ဲ ပယီၤသုးကလၢၤ(၆)ဖျၢၣ်လၢအမ့ၢ် မကွံၢ်လူၢ်,တညၣ်ကၠိ,တခိးဘံၣ်ကွံ,ပူၣ်လူၣ်တူၣ်,ချၢၣ်ဒ့, မီဖါသူ သုးကလၢၤသ့ၣ်တဖၣ်န့ၣ်လီၤ.
