လါမ့ၤ ၁ သီႇ ၂၀၂၁ နံၣ်ႇ ခ့ၣ်အဲးစံၣ်
ကၠီၣ်တဲၣ်သုးဆှၢဟ့ၣ်မၤစၢၤ၀ဲဒၣ်သုးမီစိရိၤအသုးလၢအအိၣ်ဖဲသုးက့(၅)ဟီၣ်က၀ီၤပူၤတဖၣ်တၢ်အီၣ်တၢ်အီတၢ်ဂ့ၢ်အံၤန့ၣ် ကဲထီၣ်၀ဲလၢအတဖိးမံလိာ်သးဒီးထံဖိကီၢ်ဖိအတၢ်တူၢ်ဘၣ်ခီၣ်ဘၣ်ဘၣ်အဂ့ၢ်န့ၣ် KNU စံး၀ဲန့ၣ်လီၤႉ
ဖဲတလါအံၤ(လါမ့ၤ ၂၄ သီတုၤလၢ ၂၈)သီအနံၤ ကၠီၣ်တဲၣ်သုးအချံ ၄ ဘ့ၣ် ဒီးကမျၢၢ်ချံ Honda ၁ ဘ့ၣ်လၢ မျၢၢ်သူ၀ဲအံၤ လဲၤဆှၢန့ၢ်၀ဲသုးကီၣ်ကးတၢ်အီၣ်တၢ်အီစးထီၣ်လၢယံကၠၤထၣ်သုးကလၢၤတုၤလၢ မုၢ်တြီၢ်ကီၢ်ရ့ၣ်ႇ လူၢ်သီကီၢ်ဆၣ်ႇကီၤလူဒဲသ၀ီကရူၢ် လၢၢ်စ့(စီထၣ်)တၢ်လီၢ်အဂ့ၢ်န့ၣ် KNU တၢ်ဘိးဘၣ်ရၤလီၤသူလ့ၤတၢ်ကစီၣ်သန‹ထုးထီၣ်ပာ်ဖျါ၀ဲဖဲလါမ့ၤ ၃၀ သီအနံၤန့ၣ်လီၤႉ
KNU သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲလၢ“သုးက့(၅)တြီတံၢ်ဃာ်၀ဲ ပယီၤသုးတၢ်အီၣ်တၢ်အီအံၤ ဒ်သိးကထိၣ်လီၤဆှၣ်က့ၤအသးလၢအသုတဆီၣ်သနံးလၢၤ ထံဖိကီၢ်ဖိကမျၢၢ်လၢၤတဂ့ၤအဂီၢ်လီၤႉ ကၠီၣ်တဲၣ်သုးဟ့ၣ်ဂံၢ်ဟ့ၣ်ဘါ၀ဲဒ်အံၤ ကဲထီၣ်၀ဲလၢအတဖိး မံလိာ်သးဒီးထံဖိကီၢ်ဖိအတၢ်တူၢ်ဘၣ်ခီၣ်ဘၣ်ဘၣ်လီၤႉ အဲၣ်ဒိးဒုးသ့ၣ်ညါကၠီၣ်တဲၣ်အသုးလၢ တၢ်ဆီၣ်ထွဲမၤစၢၤဟ့ၣ်ဂံၢ်ဟ့ၣ်ဘါ၀ဲဒၣ်သုးလၢအဟံးန့ၢ်ဆူၣ်တၢ်စိတၢ်မီၤအံၤ တမ့ၢ်တၢ်လၢအဘၣ်ဘျီးဘၣ်ဒါဘၣ်လီၤႉ”အဂ့ၢ် စံး၀ဲန့ၣ်လီၤႉ
ဒ်သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံး၀ဲအသိးန့ၣ် ကၠီၣ်တဲၣ်သုးခိးကီၢ်ဆၢဆှၢစၢၤ၀ဲဒၣ်သုးမီၤစရိၤအသုးတၢ်အီၣ် တၢ််အီလၢ သုးချံအသူ ၄ဘ့ၣ်န့ၣ် ၉ ဘျီ ဒီး (Honda)သုးချံတခိၣ်ခီန့ၣ်ဟဲဆှၢ၀ဲဒၣ် ၈ ဘျီလီၤႉ ဆှၢ၀ဲဒၣ်လၢယံကၠၤထၣ်တၢ်လီၢ်တတီၤဒီး သုးကီၣ်ကးသုးကလၢၤလၢအအိၣ်ဖဲလၢၢ်စ့တတီၤန့ၣ်လီၤႉ
ကၠီၣ်တဲၣ်သုးအံၤလၢ(၅)သီအတီၢ်ပူၤ လဲၤဆှၢန့ၢ်၀ဲတၢ်အီၣ်တၢ်အီဒီး သုးချံစဲး ၄ ဘ့ၣ် အိၣ်၀ဲ ၉ ဘျီဒီး သုးချံ ၁ ဘ့ၣ် အိၣ်၀ဲ ၈ ဘျီ ခဲလၢာ်ပာ်ဖှိၣ်အိၣ်၀ဲ ၁၇ ဘျီဘၣ်ဆၣ်ႇ တကီၢ်ခါလီၢ်က၀ီၤထံဖိကီၢ်ဖိကမျၢၢ်လၢအဘၣ်ဃ့ၢ်မှံဟးဖျိးတဖၣ်အဂီၢ် ကၠီၣ်တဲၣ်ၦၤဘၣ်မူဘၣ်ဒါတဖၣ် တြီတံၢ်ဃာ်၀ဲတၢ်မၤစၢၤတၢ်ဖိတၢ်လံၤလၢတၢ်ကလဲၤမၤစၢၤ၀ဲလၢဟီၣ်က၀ီၤအပူၤတဖၣ်န့ၣ်လီၤႉ
ဖဲအပူၤကွံာ်(လါမ့ၤ ၂၉)သီအနံၤစ့ၢ်ကီး မီၤစိရိၤအသုးဆှၢထီၣ်၀ဲဒၣ်တၢ်အီၣ်တၢ်အီတဖၣ်ဆူ ခ့ပူၤဟီၣ်က၀ီၤတကပၤဒီး ခီဖျိတုၤဃီၤ၀ဲဒၣ်လၢတမ့ၤထၣ်တၢ်လီၢ်အဃိ ဖဲဂီၤခီ ၈ နၣ်ရံၣ် ၄၀ မံးနံးအဆၢကတီၢ်် တၢ်ဒုးကဲထီၣ်၀ဲဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရ့ၣ်(၁)အဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ပာ်ဖျါအသိး သ့ၣ်ညါဘၣ်န့ၣ်လီၤႉ
