လါယူၤ ၁၇သီ, ၂၀၂၅နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ကီၢ်ပယီၤကီၢ်ဆၢ,မဲၢ်ဆီးဝ့ၢ်ပူၤတၢ်ဖီၣ်ဝဲ(Three-wheeled motorcycle)သိလ့ၢ်ယီၢ်လၢအအိၣ်သၢပၣ်သ့ၣ်တဖၣ်အဃိ,ခီကီၢ်ပှၤမၤတၢ်ဖိလၢအနီသိလ့ၢ်ယီၢ်(၃)ပၣ်သ့ၣ်သဂၢၢ်ဘၣ်ဝဲတၢ်ကီတၢ်ခဲအဂ့ၢ်,ပှၤနီ(Three-wheeled motorcycle)တဖၣ်စံးဝဲဒၣ်န့ၣ်လီၤ.
မဲၢ်ဆီးဝ့ၢ်ကီၢ်ပယီၤခီကီၢ်ပှၤမၤတၢ်ဖိလၢအလုၢ်အီၣ်သးသမူလၢတၢ်နီသိလ့ၣ်ယီၢ်(၃)ပၣ်သ့ၣ်တဖၣ်အံၤညီနုၢ်ဟးဆါဝဲထံ,ဟးတီဆှၢဝဲတၢ်ဖိတၢ်လံၤဒီးဟးတီဆှၢဝဲဒၣ်ကီၢ်ပယီၤပှၤဟးထီၣ်က့ၤလီၤဖိဖဲဝ့ၢ်ပူၤတဖၣ်န့ၣ်လီၤ.
တကီၢ်ခါခဲအံၤ,ခီဖျိကၠီၣ်တဲၣ်ခိၣ်နၢ်ပှၤဘၣ်မူဘၣ်ဒါတဖၣ်ခိးဖီၣ်ဝဲတၢ်လၢကျဲတီၤဒီးတနီၤကူသိးဝဲဒ်မုၢ်ဆ့ၣ်မုၢ်ဂီၤမၤဝဲတၢ်သမံသမိးလၢကျဲကဆူးကတ့ၤတဖၣ်အပူၤအိၣ်ဝဲအဃိ,ခီကီၢ်ပှၤမၤတၢ်ဖိလၢအနီဝဲသိလ့ၣ်ယီၢ်(၃)ပၣ်သ့ၣ်တဖၣ်သဂၢၢ်ဘၣ်ဝဲကျိၣ်စ့တၢ်ဟဲနုၥ်တၢ်ကီတၢ်ခဲအဂ့ၢ်,ပှၤဆါထံဖိတဂၤစံးဝဲဒ်အံၤန့ၣ်လီၤ.
“တနံၤအံၤတီမီဖီၣ်တၢ်သပှၢ်လီၤ.ဖီၣ်ဝဲအါတစဲးအဃိလၢယနၢ်ဟူတဘျီဃီန့ၣ်ယအိၣ်ဘှံးလီၤ.ယတဟးဆှၢထံလၢၤဘၣ်.ပတဟးဆါဘၣ်ထံလၢၤအဃိတၢ်ကီတၢ်ခဲအိၣ်ဝဲ,ပစ့ဟဲနုၥ်တအိၣ်လၢၤဘၣ်မီၤ.ဒ်န့ၣ်အသိးန့ၣ်,ပှၤလၢညီနုၢ်ဟံထံလၢပအိၣ်ဒ်သိးခီနီကျး,လးဖးထံကျးတၢ်အီၣ်ကျးတၢ်လီၢ်သ့ၣ်တဖၣ်န့ၣ်အထံလၢၥ်ကိးနံၤလီၤ.အသုတန့ၢ်ဘၣ်ထံအဃိကဲထီၣ်ဝဲတၢ်ကီတၢ်ခဲန့ၣ်လီၤ.ဘၣ်ခိးကွၢ်တၢ်အိၣ်သးလၢဂီၤမ့ဂ့ၤမး,ကဘၣ်ဆဲးဆှၢဖှိၣ်န့ၢ်က့ၤအဝဲသ့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
မဲၢ်ဆီးဝ့ၢ်ပူၤကီၢ်ပယီၤခီကီၢ်ပှၤမၤတၢ်ဖိလၢအနီဝဲ(Three-wheeled motorcycle)ဟးဆါဝဲထံတဖၣ်အံၤညီနုၢ်ဘၣ်ဟ့ၣ်လီၤဝဲကၠီၣ်တဲၣ်ပၢၤကီၢ်ခိသွဲ(၅၀၀)ဘးကိးလါဒဲးအိၣ်ဝဲဒီးမ့မ့ၢ်ပှၤလၢအတီဆှၢတၢ်ဖိတၢ်လံၤဒီးတီဆှၢတၢ်ဟးထီၣ်က့ၤလီၤသ့ၣ်တဖၣ်တခီဘၣ်ဟ့ၣ်ဝဲပၢၤကီၢ်(၃၀၀၀)ဆူဖီခိၣ်အိၣ်ဝဲအဂ့ၢ်,ခီကီၢ်ပှၤမၤတၢ်ဖိတဖၣ်စံးဝဲဒၣ်န့ၣ်လီၤ.
ဒီးတၢ်ဖီၣ်ဝဲသိလ့ၣ်ယီၢ်အံၤမ့ၢ်ကၠီၣ်တဲၣ်ပှၤဘၣ်မူဘၣ်ဒါလၢထးတဖၣ်အတၢ်ရဲၣ်တၢ်ကျဲၤအဂ့ၢ်,သ့ၣ်ညါဘၣ်လၢခီကီၢ်ပှၤမၤတၢ်ဖိတဖၣ်အအိၣ်န့ၣ်လီၤ.
ဒ်န့ၣ်အသိး,ခီကီၢ်ပှၤမၤတၢ်ဖိလၢအနီဝဲသိလ့ၣ်ယီၢ်(၃)ပၣ်သ့ၣ်တဖၣ်အံၤတၢ်ဖီၣ်ဝဲအီၤခီဖျိမၤဝဲတၢ်ဖံးတၢ်မၤလၢကၠီၣ်တဲၣ်ပၥ်ပနီၣ်ဝဲလၢထံဂုၤကီၢ်ဂၤပှၤမၤတၢ်ဖိတဖၣ်မၤဝဲခွဲးယၥ်တအိၣ်ဘၣ်သ့ၣ်တဖၣ်အဃိအဂ့ၢ်ဒီး,ဂုၥ်န့ၢ်ဝဲကၠီၣ်တဲၣ်ပှၤမၤတၢ်ဖိတဖၣ်အတၢ်ဖံးတၢ်မၤခွဲးယၥ်အဃိအဂ့ၢ်,သ့ၣ်ညါဘၣ်ဒ်ခီကီၢ်ပှၤမၤတၢ်ဖိတဖၣ်စံးဝဲအသိးန့ၣ်လီၤ.
