လါယူၤ ၉ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤ လါမ့ၤတလါအတီၢ်ပူၤ ခီဖျိပယီၤသုးခးလီၤ ကျိဖးဒိၣ်ဒီးကဘီယူၤလဲၤတ့ၢ်လီၤမ့ၣ်ပိၢ်ခဲလၢၥ်(၃၉)ဘျီအဃိ ကမျၢၢ်သံ(၂)ဂၤ,ဘၣ်ဒိ(၆)ဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တၢ်မၤနီၣ်စရီ အပူၤန့ၣ်လီၤ.
ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ် ဒူသထူၣ်ကီၢ်ရ့ၣ်ပူၤ စးထီၣ်ဖဲလါမ့ၤ ၁ သီတုၤ ၃၁ သီ လၢတလါအတီၢ်ပူၤ ကဘီယူၤ လဲၤတ့ၢ်လီၤ၀ဲမ့ၣ်ပိၢ်(၁၆)ဘျီ, ပယီၤသုးခးလီၤကျိဖးဒိၣ်(၂၃)ဘျီ အဃိ လီၢ်က၀ီၤကမျၢၢ်ပိၥ်မုၣ်သံ(၂)ဂၤဒီး ဘၣ်ဒိဘၣ်ထံး၀ဲ(၆)ဂၤ အကျါပၣ်ဃုၥ်၀ဲဖိသၣ်(၂)ဂၤန့ၣ်လီၤ.
တကးဒံးဘၣ်လၢကျိဖးဒိၣ်ဒီးကဘီယူၤအဃိ ကမျၢၢ်သံ(၂)ဂၤအံၤအမဲၥ်ညါ ဖဲလါမ့ၤ ၃၀ သီအနံၤစ့ၢ်ကီး ပယီၤသုးကျိၤလၢအဟဲ ထီၣ် ဆီတလဲအသုးလၢလ့က့ၣ်ဒီးတးပီသုးကလၢၤအံၤတဖၣ် ဖဲဟဲထီၣ်လၢကျဲအခါဖီၣ်၀ဲကးဒီးနံၤသ၀ီဖိ၀ံၤ မၤသံကွံၥ်၀ဲဒၣ်န့ၣ် လီၤ.
တကတီၢ်ဃီတလါအတီၢ်ပူၤခီဖျိလၢကဘီယူၤဒီးကျိဖးဒိၣ်အဃိအံၤစ့ၢ်ကီး ကမျၢၢ်ဟံၣ်ဟးဂီၤလီၤပှီၢ်(၁၄)ဖျၢၣ်, ဘၣ်ဒိတဆံးတက့ၢ် (၄၃)ဖျၢၣ်, တၢ်ဆါဟံၣ်စ့ၢ်ကီးလီၤပှီၢ်ဟးဂီၤ၀ဲ(၁)ဖျၢၣ်အမဲၥ်ညါ ကမျၢၢ်အတၢ်ထူၣ်တၢ်ဘိ,ရီဘၢၣ်ထူၣ်သ့ၣ်တဖၣ်ဟးဂီၤဘၣ်ဒိဘၣ် ထံး ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ပယီၤသုးအံၤခီဖျိခးလီၤကျိဖးဒိၣ်,သူ၀ဲကဘီယူၤဟးတ့ၢ်လီၤမ့ၣ်ပိၢ်အဃိ လီၢ်က၀ီၤကမျၢၢ်သ့ၣ်တဖၣ်ဘၣ်အိၣ်လၢ တၢ်ပျံၤတၢ်ဖုး, ဟးထီၣ်က့ၤလီၤလဲၤက့ၤဖံးမၤတၢ်တသဘျ့လၢၤဘၣ်အဖီခိၣ် တၢ်ဃံးတၢ်စ့ၤအိၣ်ထီၣ်၀ဲလၢတၢ်လုၢ်အီၣ်နီၢ်ခိသးသမူတကပၤ အဂ့ၢ်န့ၣ် ဒူသထူၣ်ကီၢ်ရ့ၣ်ပှၤဘၣ်မူဘၣ်ဒါစံး၀ဲန့လီၤ.
ဒ်န့ၣ်အသိးလၢတလါအတီၢ်ပူၤ ဒုးယၤတၢ်ဖ့ၣ်စၢကဲထီၣ်၀ဲလၢဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီး ပယီၤသုးအဘၢၣ်စၢၤ(၆)ဘျီအဃိ ပယီၤသုးတကပၤသံ(၇)ဂၤ,ဘၣ်ဒိ(၆)ဂၤဒီးသိလ့ၣ်ဟးဂီၤတခိၣ်န့ၣ်လီၤ.
လၢန့ၣ်အမဲၥ်ညါပယီၤသုးတကပၤဖီၣ်မၤသံ၀ဲ ကၠဲးထိၣ်ကီၢ်ဆၣ်ပူၤ ဒူသ၀ီတၢ်ဒီသဒၢကရူၢ်အပှၤ(၂)ဂၤကဲထီၣ်စ့ၢ်ကီး၀ဲအသိး ဖဲအပူၤကွံၥ်လါမ့ၤ ၁၃ သီပယီၤသုးကျိၤနုၥ်လီၤဟူးဂဲၤလၢ၀ီၢ်က့ကရူၢ်ပူၤအခါန့ၣ် နုၥ်လီၤဃုခွံခွးမၤဟးဂီၤဟံ၀ဲကမျၢၢ်ဟံၣ်ပူၤ, ကျးဆါတၢ်တၢ်ဖိတၢ်လံၤလီၤလၢ၀ဲလၢစ့အကလီၢ်လွံၢ်ကယၤဘျဲၣ်(၄၄၆,၅၀၀,၀၀၀) ကၠးအဂ့ၢ် န့ၣ် ခ့ၣ်အဲၣ်ယူၣ်လံၥ်တၢ်ပၥ်ဖျါအပူၤ စံး၀ဲန့ၣ်လီၤ.
ဘၣ်ဃးတၢ်ဂ့ၢ်အံၤ ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲလၢ “၀ီၢ်က့သ၀ီန့ၣ်ပယီၤသုးထုးလီၤပြံပြါပြၤလီၤတၢ်ဖိတၢ်လံၤဒီဒူၣ် လၢအ၀ဲသ့ၣ်ဟံၣ်ပူၤန့ၣ်.ကမၤလီၤတံၢ်စရီအဂီၢ်န့ၣ်နလဲၤဃုအ၀ဲသ့ၣ်တအိၣ်လၢဟံၣ်ဘၣ်အ၀ဲသ့ၣ်စံၣ်မီၤနီၤ.မ့မ့ၢ်လၢ ထံပူၤပျီ (ကျောက်ရေတွင်း)သ၀ီခီန့ၣ်ပယီၤသုးဟးဃုခွံခွးတၢ်အိၣ်စှၤကိၥ်ဖျၢၣ်လီၤ.မ့မ့ၢ်လၢ၀ီၢ်က့သ၀ီန့ၣ်ဟံၣ်လၢအဒိၣ်အထီညါန့ၣ်ပယီၤသုးဃိ၀ဲကိးဖျၢၣ်ဒဲးဃၣ်ဃၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒူသထူၣ်ကီၢ်ရ့ၣ်ပူၤဒ်ခ့ၣ်အဲၣ်ယူၣ်ကိးလါဒဲးတၢ်မၤနီၣ်စရီပူၤအိၣ်၀ဲအသိးန့ၣ် လၢသုးကီၣ်ကးအကဘီယူၤဒီးကျိဖးဒိၣ်အံၤအဃိ ကမျၢၢ်သံဘၣ်ဒိဘၣ်ထံးကဲထီၣ်အိၣ်၀ဲကိးလါဒဲးဃၣ်ဃၣ်လီၤဒီး ဖဲအပူၤကွံၥ်လါအ့ဖြ့ၣ်တလါအတီၢ်ပူၤန့ၣ်စ့ၢ်ကီး ခီဖျိကဘီယူၤ ဒီးကျိဖးဒိၣ်အံၤအဃိကမျၢၢ်သံ(၃)ဂၤ,ဘၣ်ဒိ(၁၁)ဂၤကဲထီၣ်ဒံး၀ဲန့ၣ်လီၤ.
