လါယူၤ ၁၅ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ်လီၢ်လံၤ သုးခိၣ်ဒိၣ်ကျၢၢ်ဒိၣ်စိ စီၤဘိၣ်မၠး အမါ ကညီပိၥ်မုၣ်ကရၢ(KWO) ကရၢခိၣ်လီၢ်လံၤ ပဒိၣ်နီၢ်လါဖိ အံၤ ဖဲတနံၤအံၤဂီၤခီ အဆၢကတီၢ်န့ၣ် စူၥ်ကွံၥ်သးလၢသးပှၢ်တၢ်ဆါအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲတနံၤအံၤကီၢ်သူလ့ၤမုၢ်နံၤပှဲၤထီၣ်(၇၆)၀ီတ၀ီ လါယူၤ ၁၄ သီ ဂီၤခီ ၄း၁၅ မံးနံးအဆၢကတီၢ် သုးခိၣ်ကျၢၢ်ဒိၣ်စိ စီၤဘိၣ်မၠး အမါ ပဒိၣ်နီၢ်လါဖိ (၈၆)နံၣ်အံၤ စူၥ်ကွံၥ်သးလၢသးပှၢ်တၢ်ဆါ ဖဲကီၢ်ကၠီၣ်တဲၣ် မဲၢ်ဆီးတၢ်ဆါဟံၣ်ဖးဒိၣ်အဂ့ၢ်န့ၣ် အဟံၣ်ဖိဃီဖိစံး၀ဲဒၣ် န့ၣ်လီၤ.
အဟံၣ်ဖိဃီဖိတဂၤစံး၀ဲလၢ“အသးသမူဟးထီၣ်ကဘၣ်ဖဲတဂီၤအံၤ ၄း၀၀ ဒ်န့ၣ်လီၤ.ခဲအံၤအသးနံၣ်အိၣ်လၢ (၈၆)နံၣ်လံ အဃိအတအိၣ်လၢၤဘၣ်အံၤလၢ သးပှၢ်တၢ်ဆါအဃိလီၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤပဒိၣ်နီၢ်လါဖိအစိၣ်န့ၣ်တၢ်တဟဲက့ၤစိၥ်ဘၣ်ဒံး၀ဲလၢအဟံၣ်အိၣ်ဒံးဘၣ်အဖီခိၣ် မုၢ်နံၤမုၢ်သီလၢတၢ်ကလဲၤဆှၢအီၤလၢ အဒဲဟီၣ်ခိၣ် လီၢ်န့ၣ် တဲလီၤတံၢ်တသ့ဒံးဘၣ်ဘၣ်ဆၣ်တၢ်ရဲၣ်တၢ်ကျဲၤအိၣ်လၢတၢ်ကပၥ်လီၤအဒဲဟီၣ်ခိၣ်လီၢ်ဖဲ မဲၢ်ကဆး ခရံၥ်ဖိ တၢ်သွၣ်ခိၣ်အဂ့ၢ်န့ၣ် ပှၤလၢအဘူးဒီးအဟံၣ်ဖိဃီဖိစံး၀ဲ အသိး သ့ၣ်ညါဘၣ်န့ၣ်လီၤ.
ပဒိၣ်နီၢ်လါဖိအံၤ စးထီၣ်ဖဲအပူၤကွံၥ်(၁၉၈၅)နံၣ်တၢ်က့ၤဒုးအိၣ်ထီၣ်ကဒါက့ၤကညီပိၥ်မုၣ်ကရၢ(KWO)အခါ စးထီၣ်ဖဲန့ၣ် တုၤလၢ (၂၀၁၂)နံၣ်န့ၣ် အ၀ဲမ့ၢ်၀ဲပိၥ်မုၣ်ကရၢခိၣ်အဆိကတၢၢ်လၢပိၥ်မုၣ်ကျါတဂၤဒီး တကတီၢ်ဃီအ၀ဲမ့ၢ်စ့ၢ်ကီး၀ဲ(ခ့ၣ်အဲၣ်ယူၣ်) ကမံးတံၥ်ဖိ တဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်(၂၀၁၂)လီၢ်ခံ၀ံၤခီဖျိလၢတၢ်အိၣ်ဆူၣ်အိၣ်ချ့တဂ့ၤလၢၤဘၣ်အိၣ်ဘှံးက့ၤ၀ဲလၢ(KWO)တၢ်ကရၢကရိအပူၤဘၣ်ဆၣ် အ၀ဲမ့ၢ်ဒံး၀ဲပှၤဟ့ၣ်ကူၣ်ဟ့ၣ်ဖးက့ၤတၢ်ဖိတဂၤလၢတၢ်ကရၢကရိအပူၤဒီးဒ်န့ၣ်အသိးအ၀ဲမ့ၢ်စ့ၢ်ကီးပိၥ်မုၣ်ခိၣ်နၢ်တဂၤလၢအအိၣ်ဒီးအကံၢ်အစီ,ဟ့ၣ်လီၤသးလၢကညီကမျၢၢ်အဂီၢ်ဒီးတၢ်ကရၢကရိတၢ်ဖံးတၢ်မၤပူၤ အဂ့ၢ်န့ၣ် (KWO)အတၢ်သးအုးလံၥ်ပၥ်ဖျါအပူၤ စံး၀ဲန့ၣ်လီၤ.
ဘၣ်ဃး(KWO)ကရၢခိၣ်လီၢ်လံၤ ပဒိၣ်နီၢ်လါဖိ စူးကွံၥ်သးအဖီခိၣ်အံၤ ကရၢခိၣ်-၂ နီၢ်စ့ဟဲ စံး၀ဲလၢ“ဖဲ ၁၉၈၅ နံၣ် တၢ်က့ၤဒုးအိၣ်ထီၣ် ပိၥ်မုၣ်ကရၢအခါန့ၣ်ဖံလါဖိမ့ၢ်ပိၥ်မုၣ်ခိၣ်နၢ်အဆိကတၢၢ်တဂၤလၢအတီခိၣ်ရိၣ်မဲပိၥ်မုၣ်ကရၢဒီတဖုညါမီၤ.ဖဲန့ၣ် ခါန့ၣ်တၢ်ဃံးတၢ်စ့ၤဆၢကတီၢ်ဘၣ်ဟ့ၣ်လီၤသးဂုၥ်ကျဲးစၢးမၤကဲထီၣ်လိၣ်ထီၣ်ပိၥ်မုၣ်ကရၢတၢ်ဖံးတၢ်မၤတဖၣ်.ဟ့ၣ်လီၤသးတုၤလီၤတီၤလီၤ.ဖဲအဟးထီၣ်လီၢ်ခံနါက့အ၀ဲသ့ၣ်ဟံစုနဲၣ်ကျဲဟ့ၣ်ကူၣ်ဟ့ၣ်ဖးပှၤဆဲးကျိးပှၤထီဘိလီၤ.နမ့ကွၢ်ခဲအံၤပိၥ်မုၣ်ကရၢန့ၣ်အိၣ်ထဲပှၤသးစၢ်လီၤပှၤသးပှၢ်တအိၣ်လၢၤဘၣ်အဃိပလီကီထွဲအီၤဒိၣ်မးပတန့ၢ်ကဒါက့ၤခိၣ်နၢ်အလုၢ်ဒိၣ်ပှ့ၤဒိၣ်လၢပတၢ်ကရၢကရိအဂီၢ်လၢၤဘၣ်”အဂ့ၢ်န့ၣ် စံး၀ဲန့ၣ်လီၤ.
သုးခိၣ်ကျၢၢ်ဒိၣ်ဒိ စီၤဘိၣ်မၠး အမါ ပဒိၣ်နီၢ်လါဖိ အံၤမ့ၢ်၀ဲဒၣ် ကီၢ်သူလ့ၤသုးမုၢ်ဒိၣ်(KTLA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤနၢၤဒါမၠး အမိၢ်တဂၤန့ၣ်လီၤ. ဒ်န့ၣ်အသိးပဒိၣ်နီၢ်လါဖိစူၥ်ကွံၥ်သးအံၤ အဖိခွါသုးခိၣ်စီၤနၢၤဒါမၠး,အဖိမုၣ်(၃)ဂၤဃုၥ်ဒီး အလံၤမုၣ်(၁၂)ဂၤ, အလံၤခွါ(၉)ဂၤအိၣ်လီၤတဲၥ်ကွံၥ်၀ဲအဂ့ၢ်န့ၣ် သ့ၣ်ညါဘၣ်လၢအဟံၣ်ဖိအဃီဖိအအိၣ်န့ၣ်လီၤ.
