လါယူၤလံ ၁၁သီ, ၂၀၂၅နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်, ဘျံးဒဝဲၢ်ကီၢ်ရ့ၣ်,သုးက့(၄) တနီသရံၣ်ဒီးပလီ ဟီၣ်ကဝီၤပူၤ တကီၢ်ခါခဲအံၤန့ၣ် သုးကီၣ်ကးရၤလီၤကမၣ်တၢ်စီၣ်ဟဲအါထီၣ်ဝဲဒၣ်အသိးအဆၢဟဲဘူးထီၣ်ဝဲဒၣ်အဂ့ၢ် သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါစံးဝဲဒၣ်အသိးန့ၣ်လီၤ.
တကီၢ်ခါခဲအံၤန့ၣ် တနီသရံၣ်ဒီးပလီဟီၣ်ကဝီၤပူၤဒ်သိးတၢ်ပၢၢ်ဆၢအသွံၣ်ကလီၤဖးဒီး တၢ်ပၢၢ်ဆၢအသူးသ့ၣ်လၤကပီၤကလီၤအဂီၢ် သုးကီၣ်ကးအပှၤသ့ၣ်တဖၣ် ရၤလီၤကမၣ်ဝဲတၢ်စီၣ်အါထီၣ်အသိးအဆၢဟဲဘူးဒိၣ်ထီၣ်အဂ့ၢ် သုးက့(၄) ကညီဒီကလုၥ်ဂၢၤသးကရၢ KNDO သုးရ့ၣ်(၇),သုးဒ့(၅)အသုးဒ့ခိၣ် သုးခိၣ်စိ ဘးဟူၣ် စံးဘၣ်ဝဲ ခ့ၣ်အဲးစံၣ်ကညီတၢ်ကစီၣ် ဒ်အံၤန့ၣ်လီၤ.
အဝဲစံးဝဲလၢ“facebook account သ့ၣ်တဖၣ်န့ၣ်မ့ၢ် Account လၢအယီၤအဘျၣ်ဒီးမ့ၢ်ဝဲ သုးကီၣ်ကးရၤလီၤကမၣ်တၢ်ကစီၣ်(ဝါဒဖြန့်) န့ၣ်လီၤ.ဟီၣ်ခိၣ်မဲၥ်ဖံးခိၣ်တၢ်အိၣ်သးဒီးအဝဲသ့ၣ်တဲဝဲန့ၣ်တဘၣ်ဃးလိၥ်သးဘၣ်.ပှၤသ့ၣ်တဖၣ်န့ၣ် ရၤလီၤကမၣ်ဝဲတၢ်ကစီၣ်ဒ်သိးကမၤလီၤဖးဝဲတၢ်ပၢၢ်ဆၢအသွံၣ်ဒီး မၤဝဲဒ်သိးတၢ်ပၢၢ်ဆၢအသူးအသ့ၣ်လၤကပီၤကလီၤအဂီၢ်န့ၣ်လီၤ.ဒ်ပတၢ်ဃုသ့ၣ်ညါအသိးန့ၣ်ပှၤသ့ၣ်တဖၣ်န့ၣ်မ့ၢ်ဝဲသုးကီၣ်ကးအတၢ်မဲၥ်ချံန့ၣ်လီၤ.အခဲအံၤအဝဲသ့ၣ်တၢ်ဖံးတၢ်မၤဒ်အံၤန့ၣ်အဆၢဘူးထီၣ်ဒီးအါထီၣ်န့ၣ်ပထံၣ်ဘၣ်ဝဲဒၣ်န့ၣ်လီၤ.ဟီၣ်ခိၣ်မဲၥ်ဖံးခိၣ်တၢ်အိၣ်သးန့ၣ်တမ့ၢ်ဒ်သိးအဝဲသ့ၣ်တဲဝဲဘၣ်.”အဂ့ၢ်စံးဝဲဒၣ်န့ၣ်လီၤ.
သုးကီၣ်ကးရၤလီၤကမၣ်တၢ်ကစီၣ်(ဝါဒဖြန့်) Facebook account သ့ၣ်တဖၣ်အံၤန့ၣ်အါတက့ၢ်ယုၢ်လီၤအမံၤပၣ်ဃုၥ်ဝဲဒီး“ပလီ”,“တနီသရံၣ်”ဒီးအိၣ်တစှၤန့ၢ်အဖျၢၣ်(၁၀)ဘၣ်ဒီး စးထီၣ်ဖဲလါအ့ဖြ့ၣ်အတီၢ်ပူၤန့ၣ်အဝဲသ့ၣ်တၢ်ဖံးတၢ်မၤဒ်အံၤအဆၢဟဲဘူးဒိၣ်ထီၣ်ဝဲဒၣ်အဂ့ၢ် သုးခိၣ်စိ ဘးဟူၣ်တဲအါထီၣ်ဝဲဒၣ်စ့ၢ်ကီးန့ၣ်လီၤ.
သုးကီၣ်ကးအတၢ်ရၤလီၤကမၣ်တၢ်ကစီၣ်သ့ၣ်တဖၣ်အံၤန့ၣ် အါတက့ၢ်စံးဝဲဒၣ်လၢ KNU သုးက့(၄)စုတီၤဖီလၥ် KNLA ဒီး KNDOသ့ၣ်တဖၣ်န့ၣ်ဆီလီၤတၢ်အိၣ်ခိးတြဲၤဝံၤထၢကျိၣ်ထၢစ့လၢကမျၢၢ်အိၣ်,နီဟးထီၣ်န့ၢ်ဆူၣ်ကမျၢၢ်လၢဒူသဝီပူၤ,ထၢန့ၣ်ဆူၣ်ပှၤသုးဖိဒီးဟးထၢကျိၣ်စ့လၢဟံၣ်သ့ၣ်တဖၣ်အိၣ်ဝဲအဂ့ၢ် သ့ၣ်ညါဘၣ်ဒ် သုးက့(၄)လီၢ်ကဝီၤ KNDOအပှၤဘၣ်မူဘၣ်ဒါအတၢ်မၤနီၣ်အိၣ်ဝဲအသိးန့ၣ်လီၤ.
လၢန့ၣ်အမဲၥ်ညါ တၢ်လီၢ်,ဒူသဝီအမံၤလၢ သုးကီၣ်ရၤလီၤကမၣ်တၢ်ကစီၣ် Account သ့ၣ်တဖၣ်န့ၣ်ပၥ်ဖျါဝဲဒၣ်န့ၣ်မ့ၢ်ဝဲတၢ်လီၢ်လၢပယီၤသုးကလၢၤအိၣ်ဆီလီၤသးအလီၢ်အသိးအိၣ်ဝဲဒၣ်လၢဒုးယၤရဲၣ်ကျဲၤဟီၣ်ကဝီၤပူၤအဃိ ဒူသဝီကမျၢၢ်ဖိတအိၣ်လၢဒူသဝီပူၤထီၣ်ဘးလၢ(၃)နံၣ်ဘျဲၣ်လံအဂ့ၢ် သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါစံးဝဲဒၣ်အသိးန့ၣ်လီၤ.
