လါယူၤလံ ၁၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ် သလွဲထီၣ်ကရူၢ်အပူၤ အပူၤကွံၥ်စှၤသီအခါ ခီဖျိကျိဖးဒိၣ်အကလုၢ်သီၣ်သထြုးအံၤအဃိ လီၢ်က၀ီၤကမျၢၢ်ပိၥ်မုၣ်တဂၤဖုးဘၣ်သးသံဒီးသံ၀ဲအဂ့ၢ်န့ၣ် ကီၢ်ရ့ၣ်တၢ်ကစီၣ် ထုးထီၣ် ပၥ်ဖျါ၀ဲဖဲ တနံၤအံၤလါယူၤလံ ၁၂ သီအံၤန့ၣ်လီၤ.
ဖဲအပူၤကွံၥ်လါယူၤလံ ၉ သီ မုၢ်နၤခီ ၁၀း၀၀ အဆၢကတီၢ်န့ၣ် ကြုၢ်တု၀့ၢ်ပူၤ ပယီၤသုးခီၣ်ချ့သုးရ့ၣ်(ခမရ-၅၄၅)ခးလီၤ၀ဲ(၁၂၀ မမ) ကျိဖးဒိၣ် လီၤတဲၥ်ပိၢ်ဖးထီၣ်၀ဲလၢသလွဲထီၣ်ကရူၢ် အီၤပလၣ်ကိ(အောင်ဗလကုန်း)သ၀ီပူၤဒီး ခီဖျိလၢကျိးဖးဒိၣ်အကလုၢ်အံၤ အဃိ သ၀ီဖိပိၥ်မုၣ်(၅၅)နံၣ်တဂၤအံၤ ဖုးဘၣ်သးသးဖျၢၣ်တၢ်ဆါထီၣ်၀ဲဒီးသံ၀ဲဒၣ်ဘၣ်ဟဲကဲထီၣ်ဒ်အံၤန့ၣ်လီၤ.
တကးဒံးဘၣ်ကြုၢ်တုကီၢ်ဆၣ်အပူၤ ဖဲအပူၤကွံၥ်လါယူၤ ၉ သီအနံၤစ့ၢ်ကီး ခီဖျိလၢသုးမီၤစိရိၤအကဘီယူၤလဲၤခးလီၤတၢ် လၢပဲၤယၣ်(ပိုင်ရပ်)သ၀ီပူၤ ကမျၢၢ်ဟံၣ်တၢ်သူၣ်ထီၣ်ဖီလၥ်ပှၤကၠိဖိမၤလိလံၥ်အဆၢကတီၢ်အဃိ ဖဲန့ၣ်ပှၤကၠိဖိဖိသၣ်ဆံး (၃)ဂၤ, ကၠိသရၣ်မုၣ်(၁)ဂၤဒီးသ၀ီဖိ(၁)ဂၤသံ၀ဲအသိး ကမျၢၢ်ဘၣ်ဒိဘၣ်ထံး၀ဲ(၂၂)ဂၤကဲထီၣ်ဒံး၀ဲန့ၣ်လီၤ.
ကြုၢ်တု-ကီးတရံးကျဲလၢဟီၣ်က၀ီၤ(KNLA)သုးပၥ်ဖှိၣ်ကရူၢ်ဒိၣ်စိ၀ဲအံၤ လၢကထီၣ်ဒိၣ်စိက့ၤ၀ဲအဂီၢ် ဖဲအပူၤကွံၥ်လါယူၤလံ ၈ သီ အနံၤန့ၣ် သုးမီၤစိရိၤအသုးကျိၤဟဲထီၣ်၀ဲ(၂)ဘိအဃိ တၢ်ဒုးကဲထီၣ်၀ဲဒီးဟီၣ်က၀ီၤတၢ်ပၢၢ်ဆၢသုးကရူၢ်ဒိၣ်ဒိၣ်မုၢ်မုၢ်အဂ့ၢ်န့ၣ် သ့ၣ်ညါဘၣ် လၢ ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံး၀ဲအသိးန့ၣ်လီၤ.
ဒ်န့ၣ်အသိးဖဲတၢ်ဒုးကဲထီၣ်အကတီၢ်န့ၣ်စ့ၢ်ကီး သုးမီၤစိရိၤ(Y12)ကဘီယူၤဟဲဆှၣ်တၢ်လၢတၢ်ဖီခိၣ်တ့ၢ်လီၤမ့ၣ်ပိၢ်တအိၣ်ဘၣ် ဘၣ်ဆၣ်ခးလီၤ၀ဲ(ရီးကဲးဒိ)ဒီးပယီၤသုးအိၣ်သုးကလၢၤတဖၣ်စ့ၢ်ကီးခးလီၤ၀ဲကျိဖးဒိၣ်အဃိ ကြုၢ်တု-ကီးတရံးကျဲမုၢ်အံၤ ဟးဂီၤ၀ဲဒီး ကမျၢၢ်ဟံၣ်ဃုၥ်ဒီးကၠိတၢ်သူၣ်ထီၣ်သ့ၣ်တဖၣ်ဟးဂီၤ၀ဲအိၣ်အဂ့ၢ်န့ၣ် ဂံၢ်ခီၣ်ထံးတဂၤဃီ၀ဲန့ၣ်စံးအါထီၣ်၀ဲန့ၣ်လီၤ.
စးထီၣ်ဖဲအပူၤကွံၥ်လါအ့ဖြ့ၣ်(၁၀)သီဘျဲၣ်အခါန့ၣ် ပယီၤသုးကလၢၤလၢအိၣ်ဆီလီၤသးဖဲကြုၢ်တု၀့ၢ်အခိၣ်အဃၢၤအံၤတဖၣ် တၢ်ပၢၢ်ဆၢသုးပၥ်ဖှိၣ်ကရူၢ်နုၥ်လီၤခး၀ဲဒီး ပယီၤသုးတကပၤစ့ၢ်ကီးဘၣ်ဟ့ၣ်ဆှူကွံၥ်အတၢ်လီၢ်အိၣ်အသိး သုးကလၢၤလၢအိၣ်တ့ၢ် ဒံးတဖၣ်ခီဖျိတၢ်ဆဲးထီၣ်၀ဲအဃိတၢ်ဒုးဆဲးကဲထီၣ်အဖၢမုၢ်တုၤလၢခဲအံၤန့ၣ်လီၤ.
လၢန့ၣ်အမဲၥ်ညါစးထီၣ်လၢတၢ်ဒုးကဲထီၣ်ဒီတကတီၢ်အပူၤန့ၣ် ခီဖျိလၢကျိဖးဒိၣ်ဒီးကဘီယူၤအံၤအဃိ ကမျၢၢ်သံဘၣ်ဒိဘၣ်ထံး အိၣ်၀ဲ အါမးအသိးသီခါဖၠၣ်,ကၠိတၢ်သူၣ်ထီၣ်ဃုၥ်ဒီးကမျၢၢ်အဟံၣ်အဃီစ့ၢ်ကီးဟးဂီၤဘၣ်ဒိဘၣ်ထံး၀ဲအါမးအဂ့ၢ်န့ၣ် ခ့ၣ်အဲၣ်ယူၣ် တၢ်မၤနီၣ် ပူၤအသိးသ့ၣ်ညါဘၣ်န့ၣ်လီၤ.
