သုးမီၤစိရိၤအကဘီယူၤအဃိ လ့တလူ ကမျၢၢ်ပှၤလီၢ်အိၣ်ကမှံဖိသံ(၂၂)ဂၤဒီးဘၣ်ဒိ(၅၀)ဃၣ်ဃၣ်အဂ့ၢ် NUG ထုးထီၣ်ပၥ်ဖျါ

လါယူၤလံ ၁၂ သီ, ၂၀၂၅ နံၣ်, ခ့ၣ်အဲးစံၣ်

လ့တလူ(လင်းတလူး)သ၀ီလၢအိၣ်စကဲကီၢ်ခီ စကဲကီၢ်ဆၣ်အပူၤအံၤ ဖဲမဟါလါယူၤလံ ၁၁ သီအနံၤ ပယီၤသုးမီၤစိရိၤကဘီယူၤ ပညိၣ်လဲၤ တ့ၢ်လီၤ၀ဲမ့ၣ်ပိၢ်လၢသီခါဖၠၣ်ကရၢၢ်ပူၤအဃိ ကမျၢၢ်ပှၤလီၢ်အိၣ်ကမှံဖိသံ(၂၂)ဂၤဒီးဘၣ်ဒိ၀ဲ(၅၀)ဃၣ်ဃၣ်အဂ့ၢ်န့ၣ် (NUG)ပဒိၣ် ပှၤဂ့ၢ်၀ီခွဲးယၥ်ဘၣ်ထွဲ၀ဲၤကျိၤ(Ministry of Human Rights)ထုးထီၣ်ပၥ်ဖျါ၀ဲဖဲမဟါအနံၤန့ၣ်လီၤ.

ဖဲမဟါဂီၤခီဂီၤဂီၤ ၁း၀၀ နၣ်ရံၣ်ဃၣ်ဃၣ်အဆၢကတီၢ် လၢတတါအူကဘီသန့သုးကလၢၤအံၤအဆီသုးမီၤစိရိၤအကဘီယူၤ ဟးထီၣ်ဝဲဒီး လဲၤတ့ၢ်လီၤ၀ဲပီၣ်(၂၅၀)မ့ၣ်ပိၢ်ဒီးခးလီၤ၀ဲရီးကဲးဒိသ့ၣ်တဖၣ်လၢ လ့တလူ (မဟာသစ္စဝါဒီ) သီခါဖၠၣ်လၢကမျၢၢ် ပှၤဃ့ၢ်မှံဟးဖျိးလဲၤအိၣ်ဆိး၀ဲဒၣ် အံၤန့ၣ်လီၤ.

လၢတၢ်န့ၣ်အဃိကဘီယူၤလဲၤခးလီၤတၢ်ဘျီ၀ဲအံၤ ကမျၢၢ်ပိၥ်ခွါ(၇)ဂၤ,ပိၥ်မုၣ်(၁၅)ဂၤ ခဲလၢၥ်(၂၂)ဂၤသံ၀ဲဒၣ်ဒီး ပှၤသံတဖၣ်အံၤ အကျါန့ၣ်ပၣ်ဃုၥ်၀ဲဖိသၣ်ပိၥ်ခွါ(၁၄)နံၣ်ဆူဖီလၥ်(၃)ဂၤအသိး ဘၣ်ဒိဘၣ်ထံး၀ဲခဲလၢၥ်အဂၤ(၅၀)ဃၣ်ဃၣ်ဘၣ်ဟဲ ကဲထီၣ်၀ဲဒ်အံၤ န့ၣ်လီၤ.

လၢန့ၣ်အမဲၥ်ညါခီဖျိလၢကဘီယူၤအံၤအဃိ သီခါဖၠၣ်တၢ်သူၣ်ထီၣ်အါဖျၢၣ်ဃုၥ်ဒီးစဲးကၢး(သိလ့ၣ်ယီၢ်)သ့ၣ်တဖၣ်ဟးဂီၤ လီၤကရဲ၀ဲဒိၣ်ဒိၣ်မုၢ်မုၢ်အဂ့ၢ်န့ၣ် ထံၣ်ဘၣ်လၢလံၥ်တၢ်ပၥ်ဖျါတၢ်ဂီၤပူၤအသိးန့ၣ်လီၤ.

လ့တလူသီခါဖၠၣ်လၢကဘီယူၤလဲၤခးလီၤတၢ်ခဲအံၤန့ၣ် ကမျၢၢ်ပှၤဃ့ၢ်မှံဟးဖျိးလဲၤအိၣ်ကဒုသးအနီၣ်ဂံၢ်အိၣ်၀ဲအဂၤ(၂၀၀)ဃၣ်ဃၣ် ညါဒီး တၢ်လဲၤခးလီၤတၢ်အံၤလၢအအိၣ်ဒီးတၢ်ပညိၣ်လိၤလိၤအဃိ ကမျၢၢ်သံအဂၤ(၅၀)အံၤအကျါစ့ၢ်ကီး တၢ်သံတၢ်ပှၢ်အနီၣ်ဂံၢ် ကဟဲအါထီၣ်အါန့ၢ်အ၀ဲအံၤသ့၀ဲအဂ့ၢ်န့ၣ် (NUG)စံး၀ဲန့ၣ်လီၤ.

တကးဒံးဘၣ်မုၢ်နံၤလၢသုးမီၤစိရိၤလဲၤတ့ၢ်လီၤမ့ၣ်ပိၢ်အံၤဘၣ်၀ဲလၢမုၢ်နံၤဒိၣ်မုၢ်နံၤထီပှၤမၤဘူၣ်မၤဘါလါအဃိ သုးမီၤစိရိၤလၢ အလုၢ်သ့ၣ်ခါပတၥ်မၤကမၣ်၀ဲတၢ်တဖၣ်အံၤဒ်သိးတၢ်ကဟံဂ့ၢ်၀ီဟ့ၣ်အီၤတၢ်ကမၣ်အဂီၢ် ကဂုၥ်ကျဲးစၢးထဲးဂံၢ်ထဲးဘါ၀ဲအဂ့ၢ်န့ၣ် (NUG)စံး၀ဲန့ၣ်လီၤ.

ဒ်န့ၣ်အသိးစကဲကီၢ်ဆၣ် လ့တလူသ၀ီပူၤ တချုးသုးမီၤစိရိၤကဘီယူၤလဲၤခးလီၤတၢ်ကဲထီၣ်ဒံးဘၣ်ဖဲအပူၤကွံၥ်လါယူၤ ၁၇ သီ အနံၤန့ၣ် သုးမီၤစိရိၤအပှၤ နီၣ်ဂံၢ်(၄၀၀)ဃၣ်ဃၣ်ဟဲထီၣ်၀ဲဒီး တၢ်ဒုးကဲထီၣ်၀ဲဒီးဟီၣ်က၀ီၤတၢ်ပၢၢ်ဆၢသုးကရူၢ်အဖီခိၣ် ကျိဖးဒိၣ် အမဲၥ်ညါပယီၤသုးကဘီယူၤခးလီၤတၢ်ကိးမုၢ်နံၤဒဲးအဃိ ဒူသ၀ီ(၇)ဖျၢၣ် ကမျၢၢ်အဂၤ(၁၀၀၀၀)ဘျဲၣ်ဘၣ်ဃ့ၢ်ထီၣ်၀ဲ န့ၣ်လီၤ.

ဒ်အပူၤကွံၥ်လါယူၤလံ ၉ သီ NUG စုတီၤဖီလၥ်(Ministry of Human Rights)ပှၤဂ့ၢ်၀ီခွဲးယၥ်ဘၣ်ထွဲ၀ဲၤကျိၤ ထုးထီၣ်ပၥ်ဖျါတ့ၢ် ၀ဲအသိးန့ၣ် လါယူၤ ၁ သီတုၤ ၃၀ သီ လၢတလါအတီၢ်ပူၤ စကဲကီၢ်ခီဟီၣ်က၀ီၤအပူၤခီဖျိသုးမီၤစိရိၤအကဘီယူၤအံၤအဃိ ကမျၢၢ်သံ(၁၄)ဂၤ,ဘၣ်ဒိ(၅၄)ဂၤအမဲၥ်ညါကၠိတၢ်သူၣ်ထီၣ်(၄)ဖျၢၣ်,ဟံၣ်(၂၉)ဖျၢၣ်ဒီး သီခါဖၠၣ်ဟးဂီၤ၀ဲဒၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.