လါယူၤလံ ၁၇ သီ, ၂၀၂၅ နံၣ်, ခ့ၣ်အဲးစံၣ်
ဖဲမဟါဂီၤခီအဆၢကတီၢ် လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်တရံးဆၢလၥ် မဲၢ်တ၀ီဆၢခိၣ် မုၣ်အ့ပူၤတၢ်လီၢ် န့ၣ် စၢၤသွဲၣ်သီကၠိဖိပိၥ်ခွါတဂၤလၢအလီၤတဲၥ်လၢချံပူၤဖဲသူမှဲကျိအံၤတုၤလၢတနံၤအံၤတၢ်တထံၣ်က့ၤဝဲဒံးဘၣ်အဂ့ၢ်န့ၣ် လီၢ်က၀ီၤကမျၢၢ်ဒီးပှၤဘၣ်မူဘၣ်ဒါ လၢအိၣ်ဖဲန့ၣ်တဖၣ် စံး၀ဲန့ၣ်လီၤ.
ဖဲမဟါလါယူၤလံ ၁၆ သီလၢအလီၤဘၣ်၀ဲကညီဒီကလုၥ်ဂၢၤသးကရၢ(KNDO)မုၢ်နံၤဆၢက့ၤအံၤ ကဘၣ်ဖဲဂီၤခီ ၇း၀၀ နၣ်ရံၣ် ဃၣ်ဃၣ် အဆၢကတီၢ်လၢကလဲၤမၤလၤကပီၤ တၢ်ရဲၣ်တၢ်ကျဲၤအံၤအဂီၢ် စၢၤသွဲၣ်သီကၠိဖိကအိၣ်လၢ(၈)ဂၤခိၣ်ဃၢၤအံၤ ဖဲအဝဲသ့ၣ် ဒိးထီၣ်ချံလဲၤတုၤဝဲလၢထံခၢၣ်သးအခါချံလီၤတကျၢၢ်လီၤတဲၥ်ကွံၥ်ဝဲလၢချံပူၤကိးဂၤဒဲးန့ၣ်လီၤ.
သးစၢ်ကၠိဖိဃုၥ်ဒီးချံကစၢ်လၢအလီၤအုးလီၤထွံလၢမုၣ်အ့ပူၤ သူမှဲကျိသ့ၣ်တဖၣ်အံၤခီဖျိချံကစၢ်လၢအဂၤတဖၣ် ထံၣ်၀ဲတၢ်ကဲ ထီၣ်သးတဘျီဃီလဲၤလူၤဝဲအဃိပူၤဖျဲးဝဲကိးဂၤဘၣ်ဆၣ် မ့မ့ၢ်သးစၢ်ပိၥ်ခွါလၢအသးနံၢ်ကအိၣ်(၂၀)ခိၣ်ဃၢၤတဂၤအံၤ တၢ်တထံၣ်ဝဲ ဘၣ်ဒီး တုၤလၢမုၢ်ဆ့ၣ်ထီၣ်တနံၤအံၤတၢ်ဟးဃုဝဲတဘၣ်ဒံးဘၣ်အဃိ တၢ်တယးဝဲလၢအသးသမူတအိၣ်လၢၤဘၣ်အဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါတဖၣ် စံး၀ဲန့ၣ်လီၤ.
ဘၣ်ဃးတၢ်ကဲထီၣ်သးအံၤ လီၢ်ခၢၣ်သးပၢၤကီၢ်ခိၣ် စီၤအဲၣ်ကလုၥ်ဖိ စံး၀ဲလၢ “အလီၤအုးလၢထံဒုခဲအံၤမးပှၤတထံၣ်လၢၤ ဘၣ်ဒု တၢ်မုၢ်လၢ်တအိၣ်လၢၤဘၣ်.တၢ်န့ၣ်အပျံၤတၢ်ဘျီအဖုလီၤယံၤတစဲးဘျီလီၤဘျၢပှၤလူၤတချုးလၢၤဘၣ်.မ့မ့ၢ်ပှၤအဂၤတဖၣ်န့ၣ်လီၤဘျၢဘၣ်ဆၣ်ပှၤထုးထီၣ်န့ၢ်.အသကိးဟဲတဲပၠးဖဲမဂီၤန့ၣ်ချံန့ၣ်ဃၢတစဲး,အဝဲန့ၣ်ကမ့ၢ်ဒၣ်အပျံၤတၢ်ဧါသၢၣ်.ချံန့ၣ်ဒ့ခံဒီၣ်ဃီၤဘျီအလဲၤယီၢ်ချံကနူၤခိၣ်ဘျီကဲထီၣ်လၢအယီၢ်တကျၢၢ်ချံဒ်န့ၣ်”အဂ့ၢ်န့ၣ် စံး၀ဲန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢဒီတကျိၤစးထီၣ်ဖဲအပူၤကွံၥ်နွံအခါန့ၣ်တုၤလၢခဲအံၤန့ၣ် တၢ်စူၤဝဲတပယူၥ်ဃီကိးမုၢ်နံၤဒဲးအဖီခိၣ် သူမှဲကျိ,ဃိၣ်လိၥ်ကျိ,မုၢ်ယုၢ်ကျိဃုၥ်ဒီးထံကျိးဖးဒိၣ်လၢအဂၤတဖၣ် ထံဒိၣ်ထီၣ်ဝဲလၢတၢ်လီၢ်ကိးတီၤဒဲးဃၣ်ဃၣ်န့ၣ်လီၤ.
ဒ်လီၢ်က၀ီၤပှၤဘၣ်မူဘၣ်ဒါစံးဝဲအသိးန့ၣ် စၢၤသွဲၣ်သီကၠိဖိသးစၢ်လၢအလီၤတဲၥ်လၢချံပူၤတဖၣ်အံၤ လၢကလဲၤမၤလၤကပီၤ၀ဲ (KNDO)အဂီၢ် လၢကညီကီၢ်တကပၤခီဖျိတၢ်စူၤကျဲဟးဂီၤအဃိ အ၀ဲသ့ၣ်အိၣ်လၢသ့ၣ်ဘ့ၣ်ထၣ်ခီဃီၤဝဲဆူယိၤကီၢ်တကပၤဝံၤ လဲၤလီၤဝဲဒီးသိလ့ၣ်ဆူ မုၣ်အ့ပူၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကတီၢ်ဃီဘၣ်ဃးတၢ်ဂ့ၢ်ကဲထီၣ်သးဘျီဝဲအံၤ ခီဖျိအိၣ်ထီၣ်တုၤလၢတၢ်လီၤမၢ်တၢ်သံတၢ်ပှၢ်အဃိ တကီၢ်ခါခဲအံၤ ဟီၣ်က၀ီၤ ကညီဒီကလုၥ်ပၢၤကီၢ်သုး(KNPF)လဲၤသမံသမိး ပှၤနီချံဖိလံဒီး လၢတၢ်သမံသမိးအဆၢအဖီခိၣ်အံၤတၢ်ကပၥ်ဖျါထီၣ်က့ၤဆူ ပှၤဘၣ်မူဘၣ်ဒါဘၣ်ထွဲအအိၣ်အဂ့ၢ်န့ၣ် ပၢၤကီၢ်ခိၣ် စံးအါထီၣ်ဝဲန့ၣ်လီၤ.
မဲၢ်သ၀ီဆၢခိၣ် မုၣ်အ့ပူၤတၢ်လီၢ်အံၤ ဖဲအပူၤကွံၥ်လါအ့ဖြ့ၣ်အခါန့ၣ်စ့ၢ်ကီး သးစၢ်ပိၥ်ခွါလၢအိၣ်ဟဲက့ၤလၢကီၢ်ချၢတဂၤ လီၤအုးသံဒံးလၢသူမှဲကျိ ပူၤကဲထီၣ်တ့ၢ်အသးဒံးန့ၣ်လီၤ.
