လါယူၤ ၄သီ, ၂၀၂၅နံၣ်, ခ့ၣ်အဲးစံၣ်.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုတီၤဖီလၥ် ကီၢ်ရ့ၣ်(၇)ဘ့ၣ်ပူၤ တၢ်ပၢတၢ်ြပးခိၣ်နၢ်ဒီးသုးမုၢ်ဒိၣ်ခိၣ်နၢ်တဖၣ်မ့ၢ်မၤသကိးတၢ်ဒီး KTLA ကီၢ်သူလ့ၤသုးမုၢ်ဒိၣ် န့ၣ်ဝဲၤကျိၤဘၣ်ထွဲဒီးအသုးထံးဒၣ်ဝဲစုၥ်စုၥ်ကထုးထီၣ်ကွံၥ်အီၤလၢတၢ်ကရၢကရိပူၤအဂီၢ် ခ့ၣ်အဲၣ်ယူၣ်-လီၢ်ခၢၣ်သးဝဲၤလီၢ်ခိၣ်သ့ၣ်အလံၥ်နဲၣ်လီၤတဘ့ၣ်ဖျါထီၣ်ဝဲဒၣ်လၢ Social Media အပူၤန့ၣ်လီၤ.
ဒ်လါယူၤ ၂၅သီ ၂၀၂၅နံၣ် ခ့ၣ်အဲၣ်ယူၣ် လီၢ်ခၢၣ်သး အလံၥ်နဲၣ်လီၤဝဲန့ၣ်ပၥ်ဖျါဝဲဒၣ်အသိးန့ၣ် ဖဲလါယူၤ ၂သီတုၤ၆သီ တၢ်မၤဝဲကညီဒီကလုၥ်စၢဖှိၣ်ကရၢလီၢ်ခၢၣ်သးပၢဆှၢတၢ်ကမံးတံၥ်တၢ်အိၣ်ဖှိၣ်(၁၁)ဝီအဆၢကတီၢ်အိၣ်ဝဲဒီး တၢ်စံၣ်ညီၣ်တဲၥ်နီၣ်ဂံၣ်(၁၀) လၢ လီၢ်ခၢၣ်သး ကနဲၣ်လီၤက့ၤဝဲၤကျိၤဝဲဒ့ တၢ်ပၢတၢ်ြပးခိၣ်နၢ်သ့ၣ်တဖၣ်ဒီးတၢ်ဒီသဒၢဝဲၤကျိၤတၢ်တီခိၣ်ရိၣ်မဲအဖီလၥ်သုးမုၢ်ဒိၣ်ခိၣ်နၢ်သ့ၣ်တဖၣ် လၢမ့ၢ်မၤသကိးတၢ်ဒီး KTLA မ့ၢ်အိၣ်န့ၣ် ဝဲၤကျိၤဘၣ်ထွဲဒီးအသုးထံးဒၣ်ဝဲစုၥ်စုၥ်ကထုးထီၣ်ကွံၥ်အီၤလၢတၢ်ကရၢကရိအပူၤအဂ့ၢ် ပၥ်ဖျါဝဲဒၣ်န့ၣ်လီၤ.
ဘၣ်ဃးဒီလံၥ်ဝဲတၢ်နဲၣ်လီၤဝဲအံၤန့ၣ်“ပၥ်ဂၢၢ်ပၥ်ကျၢၤအီၤသ့လီၤ.မ့ၢ်ကွၢ်လၢတၢ်မဲၥ်ညါန့ၣ် သုးမုၢ်ဒိၣ်ဒီး KTLA န့ၣ်တၢ်မၤသကိးတမ့ၢ်အိၣ်ထဲသိးပှၤဆိမိၣ်ဘၣ်.လံၥ်တၢ်နဲၣ်လီၤဝဲအံၤကမ့ၢ်ဝဲလၢ KNU ဖီလၥ်ဝဲၤကျိၤဘၣ်ထွဲဒီးတုၤလၢကီၢ်ဆၣ်ခိၣ်ပတီၢ်လီၤ.တတုၤလၢသဝီသးပှၢ်သ့ၣ်တဖၣ်အပတီၢ်ဘၣ်.”အဂ့ၢ် ခ့ၣ်အဲၣ်ယူၣ်လီၢ်ခၢၣ်သးကမံးတံၥ်ဖိတဂၤစံးဘၣ်ဝဲဒၣ် ခ့ၣ်အဲၣ်စံၣ်ကညီတၢ်ကစီၣ်အိၣ်ဝဲဒၣ်န့ၣ်လီၤ.
KTLA ကီၢ်သူလ့ၤသုးမုၢ်ဒိၣ်အံၤ အိၣ်ဆီလီၤဝဲအသးလၢ ခ့ၣ်အဲၣ်ယူၣ်-သုးက့(၆)-ဒူပျၥ်ယၥ်ကီၢ်ရ့ၣ် ကီတရံးကီၢ်ဆၣ် တီနီၢ်မုၢ်ထီၣ်ဟီၣ်ကဝီၤ ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢတဒူၣ်ဒီးလၢ ခ့ၣ်အဲၣ်ယူၣ်-သုးက့(၄),ဘျံးဒဝဲၢ်ကီၢ်ရ့ၣ် ထံမိၢ်ပှၢ်ဟီၣ်ကဝီၤ ကီၢ်ကၠီၣ်တဲၣ်-ကီၢ်သူလ့ၤကီၢ်ဆၢသရံးတဒူၣ်အဂ့ၢ် သ့ၣ်ညါဘၣ်န့ၣ်လီၤ.
ဘၣ်ဃးဒီး KNU အလံၥ်တၢ်နဲၣ်လီၤဝဲအံၤန့ၣ် “ဖျါလၢခ့ၣ်အဲၣ်ယူၣ် အံၤ တအဲၣ်ပှၤကလုၥ်ဘၣ်,တမ့ၢ်လၢမၤတၢ်လၢထံကီၢ်ဒီးပှၤကလုၥ်အဂီၢ်ဘၣ်.တမ့ၢ်လၢအကမၤဃူမၤဖိးက့ၤအသုးမုၢ်သံၣ်ဘိလၢအလီၤမုၢ်ြပံပြါတဖၣ်ဘၣ်.ခ့ၣ်အဲၣ်ယူၣ်အံၤမၤကတၢၢ်ကွံၥ်ဝဲဒၣ်တၢ်ထံၣ်လိၥ်သးကျဲဒီးခါဆူတၢ်ဃူတၢ်ဖိးအကျဲခဲလၢၥ်အဃိပထံၣ်လၢတမ့ၢ်တၢ်မၤနၢၤဖီတၢၣ်အကျဲဘၣ်.”အဂ့ၢ် KTLA သုးရိၣ်မဲခိၣ်ကျၢၢ် သုးခိၣ်ကျၢၢ်နၢၤဒါစံးဘၣ်ဝဲဒၣ် KPTV တၢ်ကစီၣ်အိၣ်ဝဲဒၣ်စ့ၢ်ကီးန့ၣ်လီၤ.
ဒ်န့ၣ်အသိး ဖဲအပူၤကွံၥ်လါအ့ဖြ့ၣ်အတီၢ်ပူၤစ့ၢ်ကီး ခီဖျိ ခ့ၣ်အဲၣ်ယူၣ် ကရၢခိၣ်(၂)လီၢ်လံၤ ပဒိၣ်ဒ့ဖ့ၣ်သးကပီၤ မၤဘၣ်ထွဲသးဒီး KTLAအမဲၥ်ညါဟံးန့ၢ်မူဒါဒ်အမ့ၢ်ကီၢ်ခိၣ်(၂)အဖီခိၣ် သုတမၤဘၣ်ထွဲမၤဃးသးဒီး KTLA မ့တမ့ၢ် ကဃ့ဟးထီၣ်ကွံၥ်သးလၢတၢ်ကရၢကရိပူၤအဂ့ၢ် ခ့ၣ်အဲၣ်ယူၣ်လီၢ်ခၢၣ်သး ဆှၢဃီၤဝဲလံၥ်တဘ့ၣ်ဆူပဒိၣ်ဒ့ဖ့ၣ်သးကပီၤအအိၣ် အိၣ်စ့ၢ်ကီးဝဲဒၣ်န့ၣ်လီၤ.
တကတီၢ်ဃီ“လၢပၢြပးတကပၤန့ၣ် ဒူသဝီဒီးကရူၢ်ခိၣ်နၢ်သ့ၣ်တဖၣ် တၢ်အိၣ်သးအဖီခိၣ်မ့ၢ်ဘၣ်မၤဘၣ်ထွဲလိၥ်သးမ့အိၣ်ဘၣ်ဆၣ် မ့မ့ၢ်လၢကီၢ်ဆၣ်ပတီၢ်န့ၣ် တၢ်မၤဘၣ်ထွဲလိၥ်သးဒီး KTLA တအိၣ်ဘၣ်အဂ့ၢ် ”ခ့ၣ်အဲၣ်ယူၣ်-ဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်ခိၣ် ပဒိၣ်စီၤဖၣ်တယါစံးဝဲဒၣ်စ့ၢ်ကီးန့ၣ်လီၤ.
လၢန့ၣ်အမဲၥ်ညါ သုးက့(၄)သုးက့ခိၣ် သုးခိၣ်ကျၢၢ်ဖိစီၤဖိလ့ စ့ၢ်ကီးစံးဝဲလၢ“ တလိၣ်လၢလံၥ်တၢ်နဲၣ်ဘၣ်. ဒ်သုးမုၢ်ဒိၣ်တၢ်သိၣ်တၢ်သီအိၣ်အသိးန့ၣ် နမ့ၢ်ကဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်န့ၣ် နမၤဘၣ်ထွဲဘၣ်ဃးဒီးတၢ်ကရၢကရိလၢအဂၤတသ့ဘၣ်.ပသ့ၣ်ညါပၥ်ဝဲဒၣ်လံန့ၣ်လီၤ.”အဂ့ၢ်စံးဝဲဒၣ်န့ၣ်လီၤ.
ဖဲအပူၤကွံၥ် ၂၀၂၂နံၣ်လါယူၤလံ ၁၇သီအနံၤန့ၣ် ကရၢကရိဒုးအိၣ်ထီၣ်ဝဲဒၣ် ကီၢ်သူလ့ၤသုးမုၢ်ဒိၣ်(KTLA)အဂ့ၢ် သုးခိၣ်ကျၢၢ်နၢၤဒါဘိးဘၣ်ရၤလီၤဝဲဒီး ဖဲလါယူၤလံအသီ(၂၀)အနံၤန့ၣ် သုးခိၣ်ကျၢၢ်နၢၤဒါလၢအတီခိၣ်ရိၣ်မဲကရၢကရိဒုးအိၣ်ထီၣ်ဝဲ (KTLA)အံၤထုးထီၣ်ကွံၥ်ဝဲဒၣ်လၢတၢ်ကရၢကရိပူၤဒီးတဘၣ်ထွဲဘၣ်ဃးသးဒီးအဝဲသ့ၣ်လၢၤဘၣ်အဂ့ၢ် (KNU)လီၢ်ခၢၣ်သးဘိးဘၣ်ရၤလီၤဝဲအိၣ်အသိး ဘၣ်ဃးတၢ်ဒုးအိၣ်ထီၣ်ဝဲကီၢ်သူလ့ၤသုးမုၢ်ဒိၣ်(KLTA)ဝဲအံၤန့ၣ် ထီဒါဝဲဒၣ် KNLA/KNDO ဂ့ၢ်ဂီၢ်အူခိၣ်နၢ်ဒိၣ်ထီတၢ်အိၣ်ဖှိၣ်တၢ်ဆၢတဲၥ်အမဲၥ်ညါ ဒုးကဲထီၣ်ဝဲတၢ်ထံၣ်ကမူၤထံၣ်ကမၣ်လၢအဝဲသ့ၣ်အဖီခိၣ်ဒီးဘၣ်ဃးတၢ်ဂ့ၢ်ဝဲအံၤအဝဲသ့ၣ်တၢ်ပၥ်သးတပၣ်ဘၣ်အဂ့ၢ် KNLA သုးဝဲလီၢ်ခိၣ်သ့ၣ်ထုးဝဲဒၣ်အတၢ်ပၥ်သးအိၣ်တ့ၢ်ဝဲဒၣ်စ့ၢ်ကီးန့ၣ်လီၤ.
