လါယူၤလံ ၂၄ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဆီးဝ့ၢ်ဟီၣ်ကဝီၤအပူၤ စှၤသီအတီၢ်ပူၤခီဖျိတၢ်စူၤတပယူၥ်ဃီထံဒိၣ်ထီၣ်ထံနုၥ်လီၤ လၢတၢ်လီၢ်တဘျုး တီၤအဃိ ခီကီၢ်ကၠိတစှၤန့ၢ်(၅)ဖျၢၣ်ဘၣ်တၢ်ပံၥ်ဃၥ်ဝဲတစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
စးထီၣ်ဖဲအပူၤကွံၥ်လါယူၤလံ ၂၁ သီတုၤလၢမဟါ ၂၃ သီအနံၤန့ၣ် ကီၢ်ကၠီၣ်တဲၣ်ဒီးကီၢ်ပယီၤတၢ်လီၢ်အါတီၤအပူၤ တၢ်စူၤဖးဒိၣ် စူၤဝဲကိးမုၢ်နံၤဒဲးအဃိ တၢ်လီၢ်လီၤဖုၣ်သ့ၣ်တဖၣ်ထံနုၥ်လီၤဝဲဒီး ဖဲန့ၣ်အကျါမၠၣ်ဝတံၣ်ဒီးမဲၢ်ဆီးဝ့ၢ်လၢအိၣ်ဘူးဝဲဒီးသူမှဲကျိအံၤ စ့ၢ်ကီး ထံနုၥ်လီၤဝဲလၢ တၢ်လီၢ်တဘျုးတီၤန့ၣ်လီၤ.
အဃိမဲၢ်ဆီးဝ့ၢ်ဟီၣ်က၀ီၤအပူၤ တၢ်လီၢ်တနီၤထံထီၣ်မ့တတုၤလၢကၠိကရၢၢ်ပူၤဘၣ်ဘၣ်ဆၣ် ပှၤကၠိဖိတနီၤလၢအိၣ်တၢ်လီၢ်လီၤဖုၣ် သ့ၣ်တဖၣ် သဂၢၢ်ဘၣ်ဝဲထံဒိၣ်ဃိၣ်ယွၤအဖီခိၣ် တၢ်ကီတၢ်ခဲအိၣ်လၢကဟးထီၣ်က့ၤလီၤအဃိ ကီၢ်ပယီၤခီကီၢ်ကူၣ်သ့ပှၤမၤတၢ်ဖိ (BMWEC) အဖီလၥ် ကၠိ(၅)ဖျၢၣ် စးထီၣ်ဖဲတနံၤအံၤန့ၣ် ဘၣ်တၢ်ပံၥ်ဃၥ်ဝဲတၢ်မၤလိမၤဒိးတစိၢ်တလီၢ်တုၤလၢ(၂၈)သီအဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးတၢ်ဂ့ၢ်အံၤ BMWEC ပှၤနဲၣ်တၢ် သရၣ်မုၣ် နီၢ်ဆၣ်အဲၣ် စံးဝဲလၢ“လၢထံဒိၣ်အလီၢ်တဖၣ်န့ၣ်ပှၤဖိသၣ်ဟဲထီၣ်ဘၣ်ကၠိကီ အဃိဘၣ်တၢ်ပံးဝဲကၠိလီၤ.လၢမဲၢ်ကၠလီန့ၣ်တဖျၢၣ်.မ့မ့ၢ်လၢမဲၢ်ဆီးပူၤအံၤခီန့ၣ် (Champion Learning Center)ကၠိ, ဆၣ်သူလ့ၤကၠိ, (Muditar)ကၠိ,(Sun Set)ကၠိ ကၠိပၥ်ဖှိၣ်(၅)ဖျၢၣ်အဝဲသ့ၣ်ဒုးသ့ၣ်ညါပှၤလၢအပံးဝဲကၠိန့ၣ်”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီ တၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိး ခီဖျိလၢထံၣ်ထီၣ်လၢ၀့ၢ်ပူၤအံၤအဃိ ခီကီၢ် (Children’s Development Centre-CDC)ကၠိအံၤစ့ၢ်ကီး စးထီၣ်ဖဲတနံၤအံၤလါယူၤလံ ၂၄ သီတုၤ ၂၅ သီ ဘၣ်တၢ်ပံးဃၥ်ဝဲ ကၠိတစိၢ်တလီၢ်အဂ့ၢ်န့ၣ် ကၠိထုးထီၣ်ဒုးသ့ၣ်ညါလီၤ ဝဲစ့ၢ်ကီးန့ၣ်လီၤ.
တကးဒံးဘၣ်လၢကီၢ်ပယီၤမၠၣ်၀တံၣ်တကပၤစ့ၢ်ကီးခီဖျိသူမှဲကျိထံဒိၣ်ထီၣ်အံၤအဃိ လီၢ်က၀ီၤကမျၢၢ်လၢအိၣ်ဘူးထံကျိနံၤဒီး အိၣ်လၢတၢ်လီၢ်ဖုၣ်အလီၢ်သ့ၣ်တဖၣ်သဂၢၢ်ဘၣ်ဝဲထံဒိၣ်ဃိၣ်ယွၤဘၣ်သုးလီၢ်သုးကျဲအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်အပူၤကွံၥ်လါယူၤလံ(၂၀)သီ ကီၢ်ကၠီၣ်တဲၣ်တၢ်ထိၣ်ဒွးမူခိၣ်ကလံၤသီၣ်ဂီၤဝဲၤကျိၤ(DDPM)ထုးထီၣ်ဒုးသ့ၣ်ညါဟ့ၣ်ပလီၢ်ဝဲ အသိးန့ၣ် ကီၢ်ကၠီၣ်တဲၣ်ပူၤလၢအမ့ၢ် တးကီၢ်ရ့ၣ်,မဲၢ်ဟီးဆီးကီၢ်ရ့ၣ်,ကံၢ်ခဲကီၢ်ရ့ၣ်,ခၠ့ရဲကီၢ်ရ့ၣ်သ့ၣ်တဖၣ်အံၤအပူၤ စးထီၣ်လါယူၤလံ ၂၂ သီတုၤ ၂၄ သီ လၢသၢသီအတီၢ်ပူၤ တၢ်ကစူၤဖးဒိၣ် ထံကဒိၣ်,ကၢၢ်ကလၥ်အဃိ ကမျၢၢ်တဖၣ်ကအိၣ်လၢတၢ်ပလီၢ်ပူၤအဂ့ၢ်န့ၣ် စံးဝဲန့ၣ်လီၤ.
ကိးမုၣ်နံၣ်ဒဲးမ့တုၤဃီၤလၢတၢ်စူၤခါလံန့ၣ် လီၤဆီဒၣ်ကီၢ်ပယီၤဒီးကီၢ်ကၠီၣ်တဲၣ်အပူၤ ဟီၣ်ကဝီၤတၢ်လီၢ်လၢအိၣ်ဘူးထံကျိကပၤ တၢ်လီၢ်လီၤဖုၣ်သ့တဖၣ်န့ၣ် သဂၢၢ်ဘၣ်ဝဲထံဒိၣ်ဃိၣ်ယွၤထီဘိဒီး အပူၤကွံၥ်ခီဖျိတၢ်စူၤထံဒိၣ်ထီၣ်အံၤအဃိ တၢ်သံတၢ်ဘၣ် ဒိဘၣ်ထံးတၢ်ဟးဂူၥ်ဟးဂီၤ ကဲထီၣ်တ့ၢ်ဝဲအိၣ်န့ၣ်လီၤ.
တနံၣ်အံၤစ့ၢ်ကီးခီဖျိတၢ်စူၤထံဒိၣ်ဃိၣ်ယွၤအံၤအဃိ ထံကီၢ်ခံဘ့ၣ်အံၤအပူၤသိလ့ၣ်တကျၢၢ်,သိလ့ၣ်ကဒဲကဒဲဘျၢၣ်လိၥ်သး, ဟီၣ်ခိၣ်လၥ်,သ့ၣ်ကၢ်လီၤ,ဟံၣ်ဟးဂီၤဘၣ်ဒိဘၣ်ထံးဒီးကမျၢၢ်လၢအိၣ်တၢ်လီၢ်လီၤဖုၣ်တဖၣ်ဘၣ်သုးလီၢ်သုးကျဲအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ကီၢ်ပယီၤမူခိၣ်ကလံၤသီၣ်ဂီၤထုးထီၣ်ပၥ်ဖျါဝဲဖဲတနံၤအံၤလါယူၤလံ ၂၄ သီဂီၤခီအသိးန့ၣ် မၠၣ်၀တံၣ် သူမှဲကျိအံၤ တကီၢ်ခါခဲအံၤ ထံထီၣ်တၢ်လီၤဘၣ်ယိၣ်အိၣ်တုၤဝဲလၢ(၉)ပ့ၣ်ဘျဲၣ်လံဒီး ဒ်န့ၣ်အသိးဆူမဲၥ်ညါတသီအတီၢ်ပူၤ ထံတၢ်လီၤဘၣ်ယိၣ်အတၢ်ပနီၣ် ကဟဲအါထီၣ်တုၤလၢ(၃)ပ့ၣ်ဃၣ်ဃၣ်ညါသ့ဝဲ အဂ့ၢ်န့ၣ် စံးဝဲန့ၣ်လီၤ.
