လါအီကူး ၁၅ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤ ကဝီၤဒိၣ်(Zone-c)အပူၤ ဖဲတနံၤအံၤဟါခီအဆၢ ကတီၢ်န့ၣ် သးစၢ်ပိၥ်ခွါတဂၤကျီဝဲပှၤဒီဖိမိၢ်(၂)ဂၤလၢဃဲၤကဲထီၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲတနံၤအံၤလါအီကူး ၁၄ သီ ဟါခီ ၂း၃၀ နၣ်ရံၣ်ဃၣ်ဃၣ်အဆၢကတီၢ် လၢကဝီၤဒ့(C-5)အပူၤ စီၤဖါဖံလံ(၂၈)နံၣ်တဂၤအံၤ ဖီၣ်ထီၣ်ဃဲၤကျီဝဲ နီၢ်မၠးလ့ကၠံၤ(၄၇)နံၣ်အံၤဒီးအဖိမုၣ် နီၢ်ကညီဖီ(၁၈)နံၣ် ၂ ဂၤအံၤ အဃိ ပှၤဒီဖိမိၢ်(၂)ဂၤအံၤ အစု,အခိၣ်, အမဲၥ်သၣ်,အကပၤအိၣ်ထဲဃဲၤလီၢ်အဃိ တၢ်ဆှၢအီၤဆူဒဲကဝီၤတၢ်ဆါဟံၣ်န့ၣ်လီၤ.
ဘၣ်ဆၣ်ခီဖျိပှၤဒီဖိမိၢ်ခံဂၤအံၤဘၣ်ဒိနးနးကျံၤကျံၤ,အမိၢ်ပှၢ်အိၣ်ထဲဃဲၤလီၢ်အဃိ ဘၣ်တၢ်ဆှၢကဒီးအဝဲသ့ၣ်ဆူ ထၣ်ဆီၤယါ(မဲၢ်တီၢ်) ကၠီၣ်တဲၣ်တၢ်ဆါဟံၣ်န့ၣ်လီၤ. ဘၣ်ဆၣ်သးစၢ် စီၤဖါဖံလံ လၢအမၤကမၣ်တၢ်တဂၤအံၤ တၢ်ဖီၣ်ဝဲတချုးဘၣ်ဃ့ၢ်ဖျိးထီၣ်ကွံၥ်တုၤ လၢခဲအံၤတၢ်ဟးဃုအီၤအဖၢမုၢ်အဂ့ၢ်န့ၣ် ဒဲကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
သးစၢ်စီၤဖါဖံလံလၢအမၤကမၣ်တၢ်တဂၤအံၤ အဟံၣ်အိၣ်ဘူးဝဲဒီးပှၤဒီဖိမိၢ်(၂)ဂၤအံၤဘၣ်ဆၣ် လၢအဝဲသ့ၣ်ကဒဲကဒဲအဘၢၣ်စၢၤ တၢ်တဲအါလိၥ်သးကဲထီၣ်တအိၣ်ဘၣ်ဒီး ဘၣ်ဆၣ်သးစၢ်ပိၥ်ခွါအံၤမ့ၢ်ပှၤလၢအသူကသံၣ်မူၤဘှီးနီၣ်သးတထံဘၣ်အဖီခိၣ် တၢ်ဘၣ်ဟဲကဲထီၣ်သးဒ်အံၤ လီၤအဂ့ၢ်န့ၣ် မဲၢ်လးဒဲ ကဝီၤခိၣ် စီၤဆါဒ့ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
အဝဲစံးဝဲလၢ“တၢ်ဂ့ၢ်တၢ်ကျိၤဟဲကဲထီၣ်သးန့ၣ်ပှၤတဂၤန့ၣ်အသူတၢ်မူၤတၢ်ဘှီးအမၠိအါ,အတနီၣ်သးဘၣ်ဘျီကျီပှၤကညီဒီးဃဲၤန့ၣ်လီၤ.အဘၣ်ဝဲအခိၣ်သၣ်ဃံ,အခီၣ်ကံၣ်ဒုၣ်ဒီးအစုတဖၣ်.တၢ်ဘၣ်ယိၣ်အိၣ်လၢအစု,အစုအထူၣ်တဲၥ်.ဒ်သိးပသ့ၣ်ညါတၢ်ဂ့ၢ်တၢ်ကျိၤန့ၣ်အဝဲသ့ၣ်အဘၢၣ်စၢၤန့ၣ်တၢ်ဘၣ်ဂံၥ်ဂူၥ်တအိၣ်နီတမံၤဘၣ်.လီၤဂၥ်ဒ်သိးအဝဲသူတၢ်မူၤဘှီးအကလုၥ်အါအခိၣ်နူၥ်တမၤတၢ်မၤလၢၤဘၣ်ဒ်န့ၣ်.”အဂ့ၢ်န့ၣ် စံးဝဲန့ၣ်လီၤ.
ဒ်ဒဲကဝီၤပှၤဘၣ်မူဘၣ်ဒါစံးဝဲအသိးန့ၣ် သးစၢ်လၢအကျီပှၤကညီဒီးဃဲၤတဂၤအံၤ အပူၤကွံၥ်တ့ၢ်လၢညါခါစ့ၢ်ကီး တၢ်ဖီၣ်အီၤလၢ တၢ်သူကသံၣ်မူၤဘှီးတၢ်ဂ့ၢ်ကဲထီၣ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကီၢ်ခါခဲအံၤတၢ်လူၤဖီၣ်အီၤမ့တချုးဒံးဘၣ်ဘၣ်ဆၣ် တၢ်ဖီၣ်အီၤမ့ချုးန့ၣ် ဒဲကဝီၤခိၣ်နၢ်ကအးလီၤက့ၤဆူ ကၠီၣ်တဲၣ် ပှၤဘၣ်မူဘၣ်ဒါအစုပူၤဒီးဒ်တၢ်သိၣ်တၢ်သီအိၣ်အသိးတၢ်ကဟံထီၣ်ဖီၣ်ထီၣ်အရ့တုၤလီၤတီၤလီၤအဂ့ၢ်န့ၣ် ဒဲကဝီၤခိၣ် စီၤဆါဒ့ စံးအါ ထီၣ်ဝဲန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲကဝီၤပၥ်ဖှိၣ်အိၣ်ဝဲ(၉)ဘ့ၣ်အကျါလီၤဆီဒၣ်တၢ်မဲၢ်လးဒဲကဝီၤလၢပှၤနီၣ်ဂံၢ်အိၣ် အါကတၢၢ်အံၤ တၢ်ဖီၣ်န့ၢ်ဝဲပှၤသူကသံၣ်မူၤဘှီးဖိ,ပှၤစိၥ်ဆါကသံၣ်မူၤဘှီးကစၢ်ကဲထီၣ်တလီၢ်လီၢ်ဒီး ဒ်န့ၣ်အသိးတၢ်မၤသံလီၤ ကစၢ်သး,တၢ်ကျီသံလိၥ်သးလၢဃဲၤလၢဒီကဲထီၣ် အိၣ်ဝဲတလီၢ်လီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
